Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XVIII.
1 Forsothe he seide `also a parable to
hem, for it bihoueth to preie euere, and
`to fayle not;
2 seyinge, `Sum iuge was in
sum citee, which dredde not God, nether
schamede of men.
3 Forsothe sum widowe
-- --
was in that citee, and sche cam to him,
seyinge, Venge me of myn aduersarie;
and he wolde not by myche tyme.
4 Sothli
aftir thes thingis he seide with ynne him
silf, Thou&yogh; I drede not God, and schame
not of man,
5 netheles for this widowe is
heuy, `or diseseful, to me, I schal venge
hir; lest at the laste sche comynge
strangle me.
6 Sothli the Lord seide,
Heere &yogh;e, what the domesman of wickidnesse
seith;
7 forsoth wher God schal not
do the veniaunce of his chosene, criynge
to him ny&yogh;t and day, and schal haue pacience
in hem?
8 Sothli I seie to &yogh;ou, for
soone he schal do the veniaunce of hem.
Netheles gessist thou, mannis sone comynge
schal fynde feith in erthe?
9 Forsoth
he seide also to sum men, that
tristiden in hem silf, as ri&yogh;tful, and dispiseden
othere, this parable, seyinge,
10 Tweye men sti&yogh;eden in to the temple for
to preie; oon a Pharise, and `the tothir
a pupplican.
11 Forsothe the Farise stondinge,
praiede anentis him silf thes thingis,
seyinge, God, I do thankingis to thee, for
I am not as othere men, raueynouris,
vniust, auouters, `as also this pupplican;
I faste twyes in the woke,
12 I &yogh;yue tythis
of alle thingis whiche I haue in possesioun.
13 And the pupplican stondinge `a
fer nolde nethir reyse the y&yogh;en to heuene,
but smoot his brest, seyinge, God
be mercyful to me, synnere.
14 Treuli I
seye to &yogh;ou, this `cam doun in to his hous
iustified of him. For ech that enhaunsith
him silf schal be maad lou&yogh;, and he
that mekith him silf, schal be enhaunsid.
15 Forsothe thei brou&yogh;ten to him &yogh;onge children,
that he schulde touch hem; which
-- --
thing whanne disciplis sy&yogh;en, thei blamyden
hem.
16 Sothli Jhesu clepinge to
gidere hem, seide, Suffre &yogh;e children to
come to me, and nyle &yogh;e forbede hem,
for of siche is the rewme of heuenes.
17 Treuli I seie to &yogh;ou, who euere schal not
take the kyngdom of God as a child, he
schal not entre in to it.
18 And sum prince
axide him, seyinge, Good maistir, what
thing doynge schal I welde euerlastyng
lyf?
19 Sothli Jhesu seyde to him, What
seist thou me good? No man is good, no
but God aloone.
20 Thou knowist the comaundementis,
Thou schalt not sle, Thou
schalt not do leccherie, Thou schalt not
do thefte, Thou schal not seye fals witnessyng,
Worschipe fadir and modir.
21 Which seide, I haue kept alle thes
thingis fro my &yogh;outhe.
22 Which thing
herd, Jhesu seide to him, &YOGH;it o thing
faylith to thee; sille thou alle, what
`euere thingis thou hast, and &yogh;yue to pore
men, and thou schalt haue tresour in
heuene; and come, and sue me.
23 Thes
thingis herd, he was sorwful, for he was
ful riche.
24 Sothli Jhesu seinge him maad
sorwful seide, How hard thei that han
richessis schulen entre in to the rewme
of God;
25 forsoth it is esyer a camel to
passe thur&yogh; `a nedlis y&yogh;e, than a riche
man for to entre in to the kingdom of
God.
26 And thei that herden thes thingis
seiden, And who may be maad saf?
27 And
he seide to hem, Tho thingis that ben
vnpossible anemptis men, ben possible
anemptis God.
28 Forsoth Petre seide, Loo!
we han forsake alle thingis, and `han
sued thee.
29 Which seyde to hem, Treuly
I seye to &yogh;ou, `no man is, that schal forsake
-- --
hous, ether fadir, ethir modir, ethir
britheren, ether wyf, ether sones, ether
feeldis,
30 for the rewme of God, and schal
not receyue myche mo thingis in this
tyme, and in the world to comynge euerelasting
lyf.
31 Forsothe Jhesu took twelue
disciplis, and seide to hem, Lo! we
sti&yogh;en to Jerusalem, and alle thingis schulen
be endid, that ben writun by the
prophetis of mannis sone.
32 Forsoth he
schal be bitrayed to hethen men, and he
schal be scorned, and scourgid, and bispet;
and aftir that thei han scourgid,
33
thei schulen sle him, and the thridde day
he schal ryse a&yogh;ein.
34 And thei vnderstoden
no thing of these; and this word
was hid fro hem, and thei vndirstoden
not tho thingis that weren seid.
35 Forsothe
it was don, whanne Jhesu cam ny&yogh;
to Jerico, sum blynd man saat bisydis the
weye beggynge.
36 And whanne he herde
the cumpany passynge, he axide, what
this thing was.
37 Sothli thei seiden to him,
that Jhesu of Nazareth passide.
38 And he
cryede, seyinge, Jhesu, the sone of Dauith,
haue mercy on me.
39 And thei that wenten
bifore blamyden him, that he schulde be
stille; sothli he `cryede myche more. Thou
sone of Dauith, haue mercy on me.
40 Forsothe
Jhesu stondinge comaundide him
to be brou&yogh;t forth to him. And whanne
he cam ny&yogh;,
41 he axide him, seyinge, What
wolt thou I schal do to thee? And he
seide, Lord, that I se.
42 And Jhesu seide
to him, Bihold thou; thi feith hath maad
thee saaf.
43 And a non he sy&yogh;, and suede
him, magnyfiynge God. And al the peple,
as it sy&yogh;, &yogh;af heriynge to God.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
