Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XVI.
1 Forsothe he seide also to his disciplis,
Ther was sum riche man, that hadde a
`fermour, ethir a baily; and this was
defamyd anentis him, as he hadde wastid
his goodis.
2 And he clepide him, and seide
to him, What heere I this thing of thee?
&yogh;eld resoun of thi ferme, for now thou
schalt `not mowe holde thi ferme.
3 Forsoth
the fermour seide with ynne him silf,
What schal I do, for my lord takith
awey fro me the ferme? `I may not delue,
I `am aschamyd to begge.
4 I woot what
I schal do, that whanne I schal be remouyd
fro the ferme, thei receyue me in to her
housis.
5 And alle the dettours of the
lord clepid to gidere, he seide to the firste,
Hou moche owist thou to my lord?
6 And he
seide to him, An hundrid barelis of oyle.
And he seide to him, Taak thin obligacioun,
and sitte soon, and wryt fyfti.
7 Aftirward he seyde to another, Sothli hou
moche owist thou? `Which seide, An
hundrid mesuris of whete. And he seide
to him, Tak thi lettris, and wryt foure
score.
8 And the lord preiside the fermour
of wickidnesse, for he hadde don prudently;
for the sones of this world ben
more prudent in her generacioun than
the sones of li&yogh;t.
9 `And I seie to &yogh;ou,
make to &yogh;ou frendes of the richesse of
wickidnesse, that whan &yogh;e shulen fayle,
thei receyue &yogh;ou in to euerlastynge tabernaclis.
-- --
10 He that is feithful in the leeste
thing, `is feithful also in more; and he
that `is wickid in a litil thing, `is wickid
also in the more.
11 Therfore if &yogh;e weren
not trewe in wicked riches, `who schal
bitake to &yogh;ou this that is verri?
12 And if
&yogh;e weren not trewe in `alien thing, who
schal &yogh;yue to &yogh;ou `this that is &yogh;oure?
13 No
man seruaunt may serue twey lordis;
forsothe ether he schal hate oon, and
loue the tothir; ether `he schal cleue
to oon, and dispise `the tohir. &YOGH;e mown
not serue to God and to riches.
14 Forsoth
Farisees, that weren coueytouse, herden
alle thes thingis, and thei scornyden him.
15 And he seide to hem, &YOGH;e it ben, that iustifyen
&yogh;ou bifore men; sothli God knowith
&yogh;oure hertis, for `that thing that is hi&yogh;
to men, is abominacioun anemptis God.
16 The lawe and prophetis til to John; fro
that tyme the rewme of God is prechid,
and ech man `makith violence in to it.
17 Forsothe it is li&yogh;ter heuene and erthe to
passe ouer, than o titil falle fro the lawe.
18 Ech man that forsakith his wyf, and
weddith another, doith auotrie; and he
that weddith the wyf forsakun of the
hosebonde, doith auoutrie.
19 Sum man was
rich, and was clothid in purpur, and
biys, `ether whit silk, and he eet ech
day schynyngli.
20 And ther was sum beggere,
Lazarus by name, that lay ful of
bylis at his &yogh;ate,
21 coueytinge to be fillid
of the crummes, that felden doun fro
-- --
the riche mannis boord, and no man &yogh;af
to him; but and houndis camen, and
lickiden his bylis.
22 Forsothe it was don,
that the beggere deiede, and was borun
of aungels in to Abrahams bosum.
23 Forsothe
and the riche man is deed, and is
biried in helle. Forsothe he reysinge
his y&yogh;en, whanne he was in turmentis, sy&yogh;
Abraham afer, and Lazarus in his bosum.
24 And he `criynge seyde, Fadir Abraham,
haue mercy on me, and send Lazarus,
that he dippe the laste part of his fyngur
in watir, and kele my tunge; for I am
turmentid in this flawme.
25 And Abraham
seide to him, Sone, haue mynde, for thou
hast receyued good thingis in thi lyf, and
Lazarus also yuele thingis; sothli he is now
comfortid, but thou art turmentid.
26 And
in alle thes thingis a greet derk place,
`ether depthe, is stablischid `by twixe vs
and &yogh;ou; that thei that wolen fro hennis
passe to &yogh;ou, mown not, nether fro thennis
passe ouer hidur.
27 And he seide, Therfore
I preye thee, fadir Abraham, that
thou sende him in to the hous of my fadir.
For I haue fyue bretheren, that he witnesse
to hem, lest also thei come in to
this place of turmentis.
29 And Abraham
seide to him, Thei han Moyses and the
prophetis; heere thei hem.
30 And he seide,
Nay, fadir Abraham, but if ony of deede
men schal go to hem, thei schulen do
penaunce.
31 Forsothe he seyde to him, If
thei heere not Moyses and the prophetis,
neither if ony of deede men schal ryse
a&yogh;en, thei schulen bileue to him.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
