Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XVI.
47 Marie Mawdeleyn forsothe, and Marie
of Joseph biheelden, where he was putt.
1 And whanne the saboth hadde passid,
Marie Mawdeleyn, and Marie of James,
and Salome bou&yogh;ten oynementis, that thei
comynge schulden anoynte Jhesu.
2 And
ful eerly in oon of woke dayes, thei
camen to the sepulcre, the sunne now
`sprungen vp.
3 And thei seiden to gidere,
Who schal `turne a&yogh;en to vs the stoon fro
the dore of the sepulcre?
4 And thei biholdinge
sy&yogh;en the stoon walewid awey,
forsoth it was ful greet.
5 And thei goynge
yn into the sepulcre sy&yogh;en a &yogh;ong
oon, hilid with a whit stoole, sittinge at
the ri&yogh;t half; and thei weren abaist, `or
greetli aferd.
6 The which seith to hem,
Nyle &yogh;e drede; &yogh;e seken Jhesu of Nazareth
crucified; he hath risun, he is not heere;
lo! the place where thei puttiden him.
7 But go &yogh;e, `seye &yogh;e to his disciplis, and to
Petre, for he schal go byfore &yogh;ou in to
Galilee; there &yogh;e schulen se him, as he
seide to &yogh;ou.
8 And thei goynge out fledden
-- --
fro the sepulcre; forsothe drede and
quakynge hadde assaylid hem, `or gon in
to hem, and to no man thei seiden ony
thing, forsoth thei dredden.
9 Sothly
Jhesus, rysinge erly in the first day of the
wouke, apperide firste to Mary Mawdeleyn,
of whom he hadde cast out seuene
deuelis.
10 She goynge tolde to hem that
weren with him, `hem weylinge and wepynge.
11 And thei heeringe that he
lyuede, and was seyn of hir, bileueden
not.
12 Sothli after thes thingis `tweyne
of hem wandringe, he is schewid in an
other lyknesse, `or figure, to hem goynge
in to a toun.
13 And thei goynge toolden
to othere, nethir thei bileuyden to hem.
14 Forsoth at the laste, hem enleuene restinge,
Jhesus apperide to hem, and reprouyde
the vnbileue of hem, and the
hardnesse of herte, for thei bileuyden not
to hem, that hadden seyn him to haue
risun fro deede.
15 And he seide to hem, &YOGH;e
goynge in to al the world, preche the
gospel to ech creature.
16 He that schal bileue,
and schal be baptisid, `or cristenyd,
schal be sauyd; sothli he that schal `bileue
not, schal be dampned.
17 Forsoth
these tokenes schulen sue hem, that
schulen bileue. In my name thei schulen
cast out fendis; thei schulen speke with
newe tungis;
18 thei schulen do awey serpentis;
and if thei schulen drynke ony
venym, `or deedli thing, `that bryngith
deeth, it schal not noye hem. Thei
schulen putte hir hondis vpon sike men,
and thei schulen haue wel.
19 And sothli
the Lord Jhesu, aftir that he `hadde spoke
to hem, is takun vp in to heuene, and
-- --
sittith on the ri&yogh;thalf of God.
20 Sothli
thei gon forth prechiden euerywhere, the
Lord worchinge with, and conferminge
the word with signes folowinge.
Here endith the gospel of Mark, and
bigynneth the prolog of Luk.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
