1   Forsothe pask and the feeste of therf looues `withou&yogh;ten sourdow&yogh; was aftir `the secunde day. And the hi&yogh;este prestis and scribis sou&yogh;ten, hou thei schulden holde him with gile, and sle. 2   Sothli thei seiden, Not in the feeste day, lest perauenture noyse were maad in the peple. 3   And whanne he was at Betanye, in the hous of Symount leprous, and restid, a womman comynge, hauynge a box of precious oynement spikanard; and the box brokun, helde out on his heed. 4   Forsoth `ther weren summe beringe vnworthily, `or heuyli, with ynne hem silf, `and seyinge, Wherto is this loss of oynement maad? 5   For this oynement my&yogh;te haue be sold more than for thre hundrid pens, and be &yogh;ouun to pore

men. And thei groyneden `in to hir. 6   Sothli Jhesus seide, Suffre hir; what be &yogh;e heuy to hir? she hath wrou&yogh;t good work in me. 7   For `euer more &yogh;e schulen haue pore men with &yogh;ou, and whanne &yogh;e schulen wolle, &yogh;e mown do wel to hem; forsoth &yogh;e schulen not euermore haue me. 8   She dide that that she hadde; sche bifore cam for to anoynte my body into buriynge. 9   Treuli I seie to &yogh;ou, where euere this gospel schal be prechid in al the world, and that this womman hath done, schal be told in to mynde of hir. 10   And Judas Scarioth, oon of the twelue, wente to the hi&yogh;este prestis, that he schulde bitray him to hem. 11   The whiche heerynge ioyeden, and bihi&yogh;ten hem to &yogh;yue `him money. And he sou&yogh;te how he schulde bitraye him couenably. 12   And the firste day of therue loues, whenne `pask was offrid, disciplis seyn to him, Whidir wolt thou we go, and make redy to thee, that thou ete pask? 13   And he sendith tweyne of his disciplis, and seith to hem, Go &yogh;e in to the citee, and a man beringe a galoun of watir schal `renne to &yogh;ou, `or come a&yogh;ens &yogh;ou; suwe &yogh;e him. 14   And whidir euere he schal entre, seye &yogh;e to the lord of the hous, For the maister seith, Wher is my fulfilling, `or etyng place, where I schal ete pask with my disciplis? 15   And he schal shewe to &yogh;ou a greet souping place strewid, and there make &yogh;e redy to vs. 16   And his disciplis wenten forth, and camen in to the citee, and founde as he hadde seid to hem; and thei maden redy pask. 17   Sothli euen maad, he cam with twelue. 18   And hem sittinge at the mete, and etinge, Jhesus seith, Treuli I seie to &yogh;ou, for oon of &yogh;ou that etith with me, schal bitraye me. 19   And

thei bigunnen for to be sori, and `to seie, ech by hym silf, Whether I? 20   The which seith to hem, Oon of twelue that puttith yn the hond with me in the plater. 21   And sothli mannis sone goth, as it is writun of him; forsoth wo to that man, bi whom `mannis sone schal be bitrayd. It were good to him, if `that ilke man hadde not be borun. 22   And hem etinge, Jhesus took bred, and blessinge brak, and &yogh;af to hem, and seith, Take &yogh;e; this is my body. 23   And the cuppe takun, he doynge gracis &yogh;af to hem, and alle drunkun therof. 24   And he seith to hem, This is my blood of the newe testament, the which schal be shedd out for manye. 25   Treuly I seie to &yogh;ou, for now I schal not drynke of this fruit of vyne, til in to that daye whanne I schal drynke it newe in the rewme of God. 26   And the ympne, `or heriynge, seid, thei wenten out in to the hil of Olyues. 27   And Jhesus seith to hem, Alle &yogh;e schulen be sclaundrid in me in this ni&yogh;t; for it is writun, I schal smyte the schepherde, and the scheep of the floc schulen be disparplid. 28   But aftir that I schal ryse a&yogh;en, I schal go bifore &yogh;ou in to Galilee. 29   Forsoth Petre seith to him, `And if alle schulen be sclaundrid, but not I. 30   And Jhesus seith to him, Treuly I seie to thee, for thou to day bifore the cok in this ny&yogh;t `twyes &yogh;yue vois, thries thou `ert to denye me. 31   And he spak more, `And if it bihoue me to dye to gidere with thee, I schal not denye thee. 32   Sothli and lyk manere alle seiden. And thei camen in to a place, to whom the name Gethsamany. And he seith to his disciplis, Sitte &yogh;e here, the while I preie. 33   And he takith Petre and James and John

with him, and bigan for to drede, and to heuye. 34   And he seith to hem, My soule is sorwful til to the deeth; susteyne &yogh;e, `or abide &yogh;e, here, and preie &yogh;e `with me. 35   And whanne he hadde gon forth a litel, he felde down on the erthe, and preiede, `that, if it my&yogh;te be, the our schulde passe fro him. 36   And he seide, Fadir, alle thingis ben possible to thee, turne fro me this cuppe; but not that I wole, but `that that thou. 37   And he cam, and fond hem slepynge. And he seith to Petre, Symount, slepist thou? my&yogh;tist thou not wake with me oon our? 38   Wake &yogh;e, and `preie &yogh;e, that &yogh;e entre not `in to temptacioun; forsothe the spirit is redy, but the fleisch syk. 39   And eftsoone he goynge preiede, the same word seyinge. 40   And he turnyd a&yogh;en eftsoone, fond hem slepinge; sothli her y&yogh;en were greuyd. And thei knewen not, what thei schulden answere to him. 41   And he cam the thridde tyme, and seith to hem, Slepe &yogh;e nowe, and `reste &yogh;e; sothli it sufficith. The our cometh; loo! mannis sone schal be bitrayed in to hondis of `synful men. 42   Ryse &yogh;e, go we; loo! he that schal bytraye me is ny&yogh;. 43   And, &yogh;it him spekinge, Judas Scarioth, oon of the twelue, cam, and with him moche cumpeny with swerdis and staues, sent fro the hi&yogh;este prestis, and scribis, and `fro the eldere men. 44   Forsothe the traitour hadde &yogh;ouun to hem a tokene, seyinge, Whom euere I schal kisse, he it is; holde &yogh;e him, and lede &yogh;e warly, `or queyntely. 45   And whanne he cam, anon he cominge to him, seith, Maistir; and he kisside him. 46   And thei layden hondis `in to him, and heelden him. 47   Sothli oon of men stondinge

aboute, ledinge out a swerd, smot the seruaunt of the hi&yogh;este prest, and kitte of to him an eere. 48   And Jhesus answeringe seith to hem, As to a thef &yogh;e han gon out with swerdis and staues, for to take me? 49   Forsoth day by day I was at &yogh;ou, techinge in the temple, and &yogh;e heelden not me; but that the scripturis be fulfillid. 50   Thanne `him forsakun, alle his disciplis fledden. 51   Sothli sum &yogh;ong man, clothid with `lynnen cloth on the bare, suede him; and thei heelden him. 52   And the lynnen cloth forsakun, he nakid flei&yogh; awey fro hem. 53   And thei ledden Jhesu to the hi&yogh;este prest. And all camen to gidere `in to oon, the prestis and the scribis and eldere men. 54   Forsoth Petre suede him afer til with ynne `in to the halle of the hi&yogh;este prest. And he sat with the mynystris, and warmyde him at the fier. 55   Forsothe the hi&yogh;este prestis, and al the counceil, sou&yogh;ten witnessinge a&yogh;ens Jhesu, that thei schulen &yogh;yue him to deeth; nether thei founden. 56   Sothli manye seiden fals witnessinge a&yogh;ens him, and the witnessingis weren not couenable. 57   And summe risynge sou&yogh;ten fals witnessing a&yogh;ens hym, 58   seyinge, For we `han herd him seiynge, I schal vndo this temple maad with hondis, and aftir the thridde day I schal bilde a nother not maad with hondis. 59   And the witnessing of hem was not couenable. 60   Forsothe the hi&yogh;este prest rysinge vp in to the myddel, axide him, seyinge, Answerist thou `not ony thing to tho thingis that ben put to thee of these? 61   Sothli he was stille, and no thing answeride. Eftsoone the hi&yogh;est prest axide him, and seide to him, Ert thou Crist, the sone of blessid God? 62   Sothli Jhesus seide to him, I am; and &yogh;e schulen

se mannis sone sittinge on the ri&yogh;t half of `the vertu of God, and comynge in cloudis of heuene. 63   Forsoth the hi&yogh;est prest, kittinge his clothis, seith, What &yogh;it desyren we witnessis? 64   &YOGH;e han herde blasphemye. What semeth to &yogh;ou? The whiche alle condempneden him for to be gilty of deeth. 65   And summe bigunnen for to bispitte him, and to hide his y&yogh;en, and smyte him with boffatis, and seie to him, Prophecie thou. And the mynystris beeten him with strokis, `or boffatis. 66   And whanne Petre was in the halle bynethen, oon of the hand maydens of the hi&yogh;est prest cam. 67   And whanne sche hadde seyn Petre warmynge him, sche biholdinge him seith, And thou wast with Jhesu of Nazareth. 68   And he denyede, seyinge, Nethir I woot, nether I haue knowun, what thou seist. And he wente forth bifore the halle; and anon the cok song. 69   `Eftsone forsothe whanne `a nother `hand mayde hadde seyn him, she bigan for to seie to men stondinge aboute, For this is of hem. 70   And he eftsone denyede. And aftir a litil, eftsoone thei that `stooden ny&yogh;, seiden to Petre, Verily thou ert of hem, forwhi and thou ert of Galilee. 71   Sothli he bigan for to curse and swere, For I knowe not this man, whom &yogh;e seyn. 72   And anon eftsoones the cok song. And Petre bithou&yogh;te on the werd that Jhesus hadde seid to him, Bifore the cok synge twyes, thries thou schalt denye me. And he bigan for to wepe. And anon `the morwe maad, the hi&yogh;este prestis, makinge counceil with the eldere men, and scribis, and al the counceil, byndinge Jhesu, ledden, and bitooken to Pilat.

Previous section

Next section