Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. III.
1 In thilke days came Joon Baptist,
prechynge in the desert of Jude,
2 sayinge,
`Do &yogh;e penaunce, for the kyngdom of
heuens shal nei&yogh;, `or cume ni&yogh;e.
3 Forsothe
-- --
this is he, `of whom it is said by Ysaye,
the prophete, A voice of a cryinge in
desert, `Make &yogh;e redy the wayes of the
Lord; `make &yogh;e ri&yogh;tful the pathes of hym.
4 Forsothe `that ilk Joon hadde cloth of
the heeris of cameylis, and a girdil of skyn
aboute his leendis; sothely his mete weren
locustis, and hony of the wode.
5 Thanne
Jerusalem wente out to hym, and al Jude,
and al the cuntre aboute Jordan;
6 and thei
weren cristenyd of hym in Jordan, knowlechynge
there synnes.
7 Sothely he seeynge
many of Pharisees and of Saducese commynge
to his bapteme, saide to hem, Generaciouns
of eddris, who shewide to &yogh;ou for
to flee fro wrath to cumme?
8 Therfore do
&yogh;ee worthi fruytis of penaunce,
9 and nyl
&yogh;e say with ynne &yogh;ou, We han the fadir
Abraham; sothely Y saye to &yogh;ou, for whi
God is mi&yogh;ti to reyse vp of these stonys
the sonys of Abraham.
10 For now the axe is
putt to the rote of the tree; sothely euery
tree that makith nat good fruyt, shal be
kitt doun, and shal be sent in to fijr.
11 Forsothe Y cristene &yogh;ou in water, in to
penaunce; forsothe he that is to cumme
after me is strenger than Y, whos shon Y
am not worthi to bere; he shal baptise, `or
cristen, &yogh;ow in the Holy Goost and fijr.
12 Whos wynwing cloth, `or fan, in his
hond, and he shal fully clense his corne
floore, and shal gedre his corne in to his
berne; but chaffis he shal brenne with
fyr unquenchable, `or that neuer shal be
quenchid.
13 Thanne Jhesus came fro Galilee
in to Jordan to Joon, `for to be
cristned of hym.
14 Soothly Joon forbeed
hym, sayinge, `I owe for to be cristned of
thee, and `thou commest to me?
15 Forsothe
Jhesus answeringe saide to hym, Suffre
-- --
now, `for so it becummeth vs for to fulfille
all ri&yogh;twisnesse. Than Joon leete hym, `or
left hym.
16 Forsothe Jhesus cristened stei&yogh;
vp anoon fro the water; and loo! heuens
ben opened to hym, and he say the Spirit
of God cummynge doun as a culuer, and
cummynge vpon hym; and loo!
17 a voice
fro heuenes, sayinge, This is my byloued
sone, in the whiche Y haue plesid to me.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
