Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXVIII.
1 Forsothe in the euenyng of the saboth,
`or haliday, that schyneth in the firste
day of the woke, Marie Mawdeleyn cam,
and another Marie, for to se the sepulcre.
2 And lo! `ther was maad a greet erthe
mouyng; forsoth the aungel of the Lord
cam doun fro heuene, and `comynge to
turnide awey the stoon, and sat theron.
3 Sothli his lokyng was as leyt, and his
clothis as snow;
4 forsothe for drede of
him the keperis ben afferid, and thei ben
maad as deede men.
5 Forsothe the aungel
answeringe seide to the wymmen, Nyle &yogh;e
drede, for I woot that &yogh;e seken Jhesu, that
is crucified;
6 he is not here, sothli he
roos, as he seide; come &yogh;e, and seeth the
place, where the Lord was putt.
7 And &yogh;e
-- --
goynge sone, seie to his disciplis `and to
Petre, for he hath risun. And lo! he
schal go bifore &yogh;ou in to Galilee; there &yogh;e
schulen se him. Lo! I haue bifore seid
to &yogh;ou.
8 And `Marie Mawdeleyn, and another
Marie wenten out soone fro the
buryel, with drede and greet ioye, rennynge
for to telle his disciplis.
9 And lo!
Jhesus `ran a&yogh;ens hem, seyinge, Heil &yogh;e.
Forsothe thei `camen to, and heelden his
feet, and worschipiden him.
10 Thanne Jhesus
seith to hem, Nyle &yogh;e drede; go &yogh;e,
`telle &yogh;e to my britheren, that thei go in
to Galilee; there thei schulen se me.
11 `The
whiche whanne thei hadden gon, loo!
summe of the keperis camen in to the
cytee, and tolden to the princes `of prestis
alle thingis that weren don.
12 And thei
gedrid to gidre with the eldere men, a
counceil takun, &yogh;aue to the kny&yogh;tis plenteuous
money,
13 seyinge, Seie &yogh;e, for his disciplis
camen by ni&yogh;te, and han stolen him,
vs slepinge.
14 And if this be herd of the
`presedent, or iustise, we schulen conceile
him, and make &yogh;ou sikir.
15 And the money
takun, thei diden, as thei weren
tau&yogh;t. And this word is pupplissid at the
Jewis, til in to this day.
16 Forsothe enleuene
disciplis wenten in to Galilee, in to
an hil, where Jhesus hadde ordeyned to
hem.
17 And thei seynge him, worschipiden;
sothli summe of hem doutiden.
18 And
Jhesus `comynge to, spak to hem, seyinge,
Al power is &yogh;ouun to me, in heuene
and in erthe.
19 Therfore &yogh;e goynge
teche alle folkis, cristenynge hem in the
name of the Fadir, and of the Sone, and
of the Hooly Gost;
20 techinge hem for
to kepe alle thingis, what euere thingis
I haue comaundid to &yogh;ou; and lo! I
-- --
am with &yogh;ou in alle dayes, til the endyng
of the world.
Here endith the gospel of Matheu, and
bigynneth the prolog of Mark.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
