Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XI.
1 And the Lord spak to Moyses and
Aaron,
2 seiynge, Sey &yogh;e to the sones of
Yrael, Kepe &yogh;e alle thingis that Y haue
writun to &yogh;ow, that I be &yogh;oure God.
Thes ben the beestis that &yogh;e shulen eete,
of alle that beren lijf on erthe;
3 alle that
han the clee dyuydid, and chewith kude,
in beestis &yogh;e mowen eete;
4 what euer forsothe
chewith kude, and hath clee, but
dyuydith it not, as camel and othere, &yogh;e
shulen not eete it, and among vnclenne
thinges &yogh;e shulen holde it.
5 An vrchon,
that chewith kude, and dyuideth not the
clee, is vnclene;
6 an haar forsothe, for and
he chewith kude, but the clee he dyuidith
not;
7 and a sowe, that al be it that sche
dyuidith the clee, she chewith not kude.
8 Of the flesh of thes eete &yogh;e not, ne towche
&yogh;e the careyns, for thei ben vnclene to
&yogh;ow.
9 Thes ben also that ben getun in
watris, and it is leeful to eete;
10 alle that
han fynnes and scaales, as wel in the
see, as in the floodes and stondynge watris,
&yogh;e shulen eete; what euer forsothe
hath no fynnes and scaales, of hem that
in watris ben meued and lyuen, shulen
be abhomynable to &yogh;ou, and as cursid;
11
&yogh;e shulen not eete the flesh of hem, and
the faln to deeth &yogh;e shulen shonne.
12 Alle
that han not fynnes and scaales in watris,
shulen be polute.
13 Thes ben that
&yogh;e shulen not eete of bryddes, and ben to
be shoned of &yogh;ow; an egle, and a griffyn,
and a merlyoun;
14 and kijt, and a grijp
after his kynde;
15 and alle of crowe kynde
into his liknes;
16 `an ostriche, and a ny&yogh;t
-- --
crowe, and a coote, and an hawke after
his kynde;
17 an owle, and a deuedep, and
the vnclene watir foule, that with his
bille puttynge water into his ars, purgith
hym silf;
18 a swan, a cormaraunt, and a
pellicane;
19 and a gerfawcoun, and a iay
after his kynde; and a lapwynk, and a
reremous.
20 Alle of foules that goth on
foure feete, shal be abhomynable to &yogh;ow;
what euer forsothe goth on foure feete,
21
but hath lenger theis bihynde, bi the
whiche he lepith vpon the erthe, &yogh;e shulen
eete;
22 as is bruk in his kynde, `that is
the kynde of locust er it haue wenges,
and attachus, `that is the kynde of locust,
whanne it bigynneth to flee, and opymachus,
`that is a foule enemy to serpentes,
and a locust, eche after his kynde.
23 What euer forsothe of foules that oonli
hath foure feete, shal be to &yogh;ow as cursid
thing;
24 and who so euer towchith the faln
to deeth of hem, shal be polutid and vnclene
vnto the euentyde;
25 and if it were
nede that he bere eny of hem deed, he
shal washe his clothes, and he shal be
vnclene vnto the goyng doun of the
sunne.
26 Eche forsothe beeste that hath
a clee, but dyuideth not it, ne chewith
kude, shal be vnclene; and what euer
touchith it, shal be defoulid.
27 That that
goth vpon hondes, of al that berith lijf
that goon on foure feete, shal be vnclene;
who so touchith the faln to deth of hem,
shal be polutid vnto euen;
28 and who so
berith siche maner careyns, shal wasshe
his clothis, and he shal be vnclene vnto
the euen; for alle thes ben vnclennes
to &yogh;ou.
29 Thes forsothe among polutid
thinges shulen be holde, of hem that ben
meued in erthe; a wesil, and a mouse,
and a cokedril, eche after his kynde; `that
-- --
is a beest of foure feete, hauynge the nether
cheke lap vnmeuable, and meuynge
the ouere;
30 a mygal, `that is a beeste
born trecherows to bigile, and moost gloterous,
a camelion, `that is a beeste varyed
in to diuerse colours, after diuerse lokingis,
and a stellioun, `that is a werme
depeyntid as with sterris, and a lacert,
`that is a serpent that is clepid a liserd,
and a moldwerp.
31 Alle thes ben vnclene;
who toucheth the faln to deth of hem,
shal be vnclene vnto the euen;
32 and vpon
what thing fal eny thing of the faln to
deth of hem, shal be polut, as wel the
treen vessel and clothing, as skynnes and
heren shertes; and in what thing is werk
maad, it shal be wett with water, and
thei shulen be polut vnto the euen, and
so afterward thei shulen be clensid.
33 A
britel vessel forsothe, in the which eny of
thes fallith with ynne, shal be polut, and
therfor it is to be broke.
34 Al the meete
that &yogh;e shulen eete, if water were shed
vpon it, shal be vnclene; al meltynge
thing, that shal be dronke of eny vessel,
shal be vnclene;
35 and what thing of
siche thing faln to deeth falle vpon it,
shal be vnclene, other forneyses, `or ketels,
shulen be destruyed, and shulen be
vnclene.
36 The welles forsothe and sisterns,
and al the gederyng togidere of watris,
shulen be clene. He that touchith the
faln to deth of hem, shal be polutid.
37 If
it falle vpon the seede, it shal not polute
it;
38 if forsothe eny man with water helde
vpon the seede, and afterward with the
faln to deth were touchid, anone it shal
be polutid.
39 If the beeste that is leeful to
&yogh;ow to eete were deed, he that touchith
the careyn of it shal be vnclene vnto
-- --
euen;
40 and he that etith of it eny thing,
or berith, shal wasshe his clothes, and he
shal be vnclene vnto euen.
41 Al that crepith
vpon erthe shal be abhomynable, ne shal
be take vnto meet.
42 What thing of foure
feete goth vpon the breest, and hath
many feete, or bi the erthe is drawun, &yogh;e
shulen not eete, for it is abhomynable.
43 Nyl &yogh;e defoule &yogh;oure soules, ne touche
eny thing of hem, lest &yogh;e ben vnclene;
44 Y
forsothe am the Lord &yogh;oure God; be &yogh;e
holy, for Y am hooli. Ne defoule &yogh;e &yogh;oure
soules in eny crepynge thing that is
meuyd vpon erthe;
45 Y forsothe am the
Lord, that hath ladde &yogh;ow fro the loond
of Egipte, that Y shulde be to &yogh;ow into
God; &yogh;e shulen be holy, for Y am holy.
46 This is the lawe of the berynge lijf, and
of foules, and of al lyuynge soule that is
meuyd in water, and crepith in erthe;
47 that
&yogh;e mowen knowe the differences of clene
and of vnclene, and that &yogh;e witen what
&yogh;e owen to eete, and what to forsake.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|