Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. VII.
1 In the hundrid &yogh;eer and oon and fifty
Demetrie, sone of Seleuci, wente out fro
-- --
Rome citee, and stiede with fewe men in
to a citee ni&yogh; the see, and regnyde there.
2 And it is don, as he entride in to hous
of the rewme of his fadris, the oost cau&yogh;te
Antiochus, and Lisias, for to brenge hem
to hym.
3 And the thyng was knowen to
hym, and he saith, Nyl &yogh;e shewe to me
the face of hem.
4 And the oost slew&yogh;
hem. And Demetrie sate vpon the sete
of his rewme;
5 and wickid men and vnpitous
of Yrael camen to hym, and Alchymus,
duyke of hem, that wolde be
maad prest.
6 And thei accusiden the peple
anentus the kyng, sayinge, Judas and
his bretheren han loste thi freendus, and
scateride vs fro oure lond.
7 Now therfore
sende thou a man, to whom thou
byleeuyst, that he go, and see all the
distruying that he hath don to vs, and
to cuntrees of the kyng; and he punyshith
alle his frendis, and the helpers of
hem.
8 And the kyng chese of his freendis
Bachides, that was lord ouer the grete
flood in the rewme, and trewe to the
kyng,
9 and he sente hym, for to see the
distruying that Judas dide; and he ordeynyde
vnpytous Alchymus in to presthode,
and badde hym do veniaunce in to
the sonys of Yrael.
10 And thei rysen, and
camen with greete oost in to the lond of
Juda; and thei senten messangers, and
spaken to Judas and his bretheren, with
pesible wordis in gyle.
11 And thei &yogh;auen
not tente to her wordis; sothely thei
sawen, for thei camen with greet oost.
12 And the congregacioun of scribes camen
to gydre to Alchymus and Bachides, for
to axe what thingus be iust;
13 and the
first Assideys, that weren in the sonys
of Yrael, and thei axiden of hem pees.
14 Sothely thei saiden, A man, prest of the
seed of Aaron, cummeth, he shal not
disceyue vs.
15 And he spac with hem
pesible wordis, and swore to hem, sayinge,
We shuln not &yogh;eue to &yogh;ou yuels,
nether to &yogh;oure frendus.
16 And thei bileeuyden
-- --
to hym. And he cau&yogh;te of hem sixti
men, and slew&yogh; hem in oo day, after the
word that is wryten,
17 Thei shedden out
fleshis of thi sayntis, and blood of hem
in cumpas of Jerusalem, and there was
not that biryede.
18 And dreed and tremblyng
lay, or felle, in to al the peple,
for thei saiden, Ther is not trewthe and
dom to hym; sothely thei han broken
the statute, and the ooth that thei
sworen.
19 And Bachides mouede tentis
fro Jerusalem, and appliede in to Bethsecha;
and sente, and cau&yogh;te many of
hem that fledden fro hym; and he killide
sum of the peple, and castide in to a
grete pitt.
20 And he bitoke the regioun
to Alchimus, and left with hym help, in
to helpyng of hym. And Bachides wente
to the kyng,
21 and Alchymus dide ynew&yogh;,
for the princehod of his presthod.
22 And
alle camen to gidre to hym, whiche distourbliden
her peple, and weldiden the
lond of Juda; and thei diden grete veniaunce
in Yrael.
23 And Judas see&yogh; alle
the yuels, that Alchymus dide, and thei
that weren with hym, to the sonnys of
Yrael, myche more than heithen men.
24 And he wente out in to alle coostis of
Judee in cumpas, and dide veniaunce in
to men forsakers, and thei cesiden for to
go out ferther in to the cuntree.
25 Forsothe
Alchymus see&yogh;, for Judas hadde
victorie, and thei that weren with hym;
and he knew&yogh; for he may not susteyne
hem, and he wente a&yogh;ein to the kyng,
and accuside hem in many synnys.
26 And
the kyng sent Nychanor, oon of his nobler
princis, that was hauntynge enmytees
a&yogh;einus Yrael; and he comaundide
him for to distruye the peple.
27 And
Nychanor came in to Jerusalem, with
grete oost, and he sente to Judas and his
bretheren with gyle, by pesible wordis,
sayinge, Fi&yogh;t be not bitwixe me and &yogh;ou;
28
I shal cume with fewe men, for to see
-- --
&yogh;oure faces with pees.
29 And he cam to
Judas, and thei gretten hem to gidre
pesibli; and enmyes weren redy for to
rauyshe Judas.
30 And the word was
knowen to Judas, for with gyle he came
to hym; and he is broken togidre of
hym, and he wolde namore see his face.
31 And Nychanor knewe, that his conceile
is knowen, and he wente out a&yogh;einus
Judas in to fi&yogh;t, bisidis Capharsalma.
32 And there fellen doun of Nychanoris
oost almest fyue thousand men, and thei
fledden in to the citee of Dauyd.
33 And
after these wordis Nychanore stiede in
to the hille of Syon, and there wenten
out of prestis of the peple, for to greete
hym in pees, and for to shewe to hym
brent sacrifices, that thei offriden for the
kyng.
34 And he scornynge dispiside hem,
and defoulide,
35 and spake proudly, and
swore with wrath, sayinge, &YOGH;if Judas
shal not be taken, and his oost, in myn
hoondis, anoon whanne Y shal turne a&yogh;ein
in pees, Y shal brenne this hous. And
he wente out with grete wrath.
36 And
the prestis entriden, and stoden bifore
face of the autir and of the temple, and
weepynge saiden,
37 Thou, Lord, hast chosen
this hous, for to inclepe thi name in it,
that it were an hous of preyer and bisechyng
to thi peple;
38 do venieaunce in
this man, and his oost, and falle thei in
swerd; haue mynde of the blasfemyes of
hem, and &yogh;eue not hem that thei abide.
39 And Nychanor wente out fro Jerusalem,
and appliede tentis to Betheron; and
the oost of Syrie cam to hym.
40 And
Judas appliede in Adarsa, with three
thousand men.
41 And Judas preyide, and
saide, Lord, an aungel wente out, and
smote an hundrid fourescore and fyue
thousandis of hem, that weren sent fro
kyng Senacherib, for thei blasfemyden
thee;
42 so breke thou togidre this oost in
oure si&yogh;t to day, and wite other men, for
-- --
yuel he spak on thin holy thingus, and
deme thou hym vp the malice of hym.
43 And the oostis ioynyden bateil, in the
thrittenthe day of the moneth Adar;
and the tentis of Nychanor ben broken
to gidre, and he felle doun the first in
bateil.
44 Sothely as his oost see&yogh;, for Nychanor
felle doun, thei castiden awey her
armers, and fledden.
45 And thei pursueden
hem the way of oo day, fro Adasor
vnto me come in to Gazera; and thei
sungen in trumpis after hem with signyfiyngus.
46 And thei wenten out of alle
the castellis of Judee in cumpas, and
wynnewiden hem with hornys, and eftsoone
weren conuertid to hem; and thei
fellen alle in swerd, and ther is not left
of hem nether oon.
47 And thei token the
spuylis of hem in to pray; and thei kittiden
of the hed of Nychanor, and his
ri&yogh;thond whiche he strechide proudly,
and thei brou&yogh;ten to, and hangiden a&yogh;einis
Jerusalem.
48 And the peple gladide gretely,
and diden that day in grete gladnesse;
59 and ordeynyde this day for to be
don in alle &yogh;eeris, in the thrittynth day
of the moneth Adar.
50 And the lond of
Juda was stille a fewe dayes.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
