Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. II.
1 In tho days Mathatias roose, the sone of
Joon, sone of Symeon, he `a prest of the
sones of Joazin, of Jerusalem, and sate in
the hil Modyn.
2 And he hadde fyue sones;
Joon, that was named Gaddis;
3 and Symount,
that was namyd Thasi;
4 and Judas,
that was clepid Machabeus;
5 and
Eleazarus, that was namyd Abaron; and
Jonathas, that was named Apphus.
6 These sawen the yuelis that weren don
in the peple of Juda and Jerusalem.
7 And Mathatias saide, Woo to me! wherto
am I born, for to se contricioun, or
distruying, of my peple, and contricioun
of the holy citee, and for to sitte
there, whan it is &yogh;ouen in hondis of enmyes?
8 Holy thingus ben maad in the
hond of strangers; the temple therof as
a man vnnoble;
9 vessels of glorie therof
ben ladde awey caytif. Olde men therof
ben slayn in streetis therof, and &yogh;unge
men therof fellen doun in swerd of enmyes.
10 What folk enheritide not the
kyngdam therof, and weeldede not prayes
therof?
11 Al makyng to gidre, or ournyng,
therof is born awey; she that was
free, is maad hond mayden.
12 And loo!
oure holy, and oure fairnesse, and oure
cleerte, is desolate, and heithen men defouliden
it.
13 What therfore &yogh;it to vs for
to lyue?
14 And Mathatias kitte, and his
sonys, her clothis, and hilliden hem with
hayris, and weiliden gretely.
15 And thei
that weren sente of kyng Antiochus,
camen thidre, for to constreyne hem that
fledden to gydre in to the citee Modyn,
for to offre and brenne encensis, and for
to departe fro the lawe of God.
16 And
many of the peple of Yrael consentynge
camen to hem; bot Mathatias and his
-- --
sonys stoden stidfastly.
17 And thei answeryng,
that weren sente of Antiochus,
saiden to Mathatias, Thou art prince,
and most cleer, and grete in this citee,
and ourned with sonys and bretheren.
18 Therfore go to former, and do the maundement
of the kyng, as alle folkis han don,
and men of Juda, and thei that laften
in Jerusalem. And thou shalt be, and thy
sonnys, among freendis of the kyng, and
made large in siluer and gold, and in
many &yogh;iftis.
19 And Mathatias answeride,
and saide with grete voice, And if alle
folkis obeien to the kyng Antiochus,
that thei go awey eche man fro seruice
of the lawe of his fadris, and consente to
his maundementis,
20 Y, and my sonnys, and
my bretheren shuln obeie to the lawe of
oure fadris.
21 God be helpful to us; it is
not prophitable to us for to forsake the
lawe and ri&yogh;twisnessis of God.
22 We schulen
not heeren the wordis of kyng Antiochus,
nether shuln sacrifice, brekynge
the maundementis of oure lawe, that we
go another way.
23 And as he ceeside for
to speke these wordis, sum Jew wente to
in ee&yogh;en of alle men, for to sacrifice to
ydolis on the auter, in the cytee Modyn,
vp comaundement of the kyng.
24 And
Mathatias sau&yogh;, and sorewide, and his
reyns trembliden togidre, and his wodnesse
is kyndled after dom of the lawe;
and he lippynge ynne, slew&yogh; hym on the
auter.
25 Bot and he slew&yogh; in that tyme
the man whom kyng Antiochus sente,
whiche compellide for to be offrid, and
distruyide the auter.
26 And he louede
feruently the lawe, as Fynees dide to
Zambri, sone of Salomy.
27 And Mathatias
criede in grete voice in the cytee, sayinge,
Eche man that hath feruent loue of
the lawe, ordeynynge testament, go out
after me.
28 And he flei&yogh;, and his sonnys,
in to mounteyns, and leften what euer
thingus thei hadden in the citee.
29 Thanne
manye wente doun, seekynge domes and
-- --
ri&yogh;twisnesse,
30 in to desert, that thei saten
there, thei, and sonys of hem, and wymmen
of hem, and beestis of hem, for
yuels weren hard on hem.
31 And it is
tolde a&yogh;ein to men of the kyng, and to
the oost, that weren in Jerusalem, in the
cytee of Dauid, for sum men wente awey,
that distruyeden maundement of the kyng,
in to priuy placis of desert; and many
hadden gon after hem.
32 And anoon thei
wenten to hem, and ordeyniden a&yogh;eins
hem bateile,
33 in the day of sabothis; and
saiden to hem, A&yogh;einstonde &yogh;e and now
&yogh;it? go &yogh;e out, and do &yogh;e vp the word of
kyng Antiochus, and &yogh;e shuln lyue.
34 And
thei saiden, We shuln not go out, nethir
we shuln do the word of the kyng, that
we defoule the day of sabothis.
35 And
thei steriden bateile a&yogh;einus hem.
36 And
thei answerden not to hem, nether sente
stoon to hem, nether stoppiden preuy
places,
37 sayinge, Dye we alle in oure
symplenesse, and heuen and erthe shuln
be witnessis on vs, that vniustly &yogh;e
leesen us.
38 And thei baren yn to hem
bateil in sabothis, and thei ben deade,
and the wyues of hem, and sonnys of
hem, and beestis of hem, vnto a thousand
soules of men.
39 And Mathatias
knewe, and his freendis; and thei hadden
mournyng on hem gretely.
40 And a
man saide to his nei&yogh;bore, &YOGH;if we alle
shuln do as oure bretheren diden, and
shuln not fi&yogh;te a&yogh;einus heithen men, for
oure soulis, and oure iustifiyngis, sunner
thei shuln distruye vs of erthe.
41 And
thei thou&yogh;ten in that day, sayinge, Eche
man who euer shal cum to vs in bateile,
in day of sabothis, fi&yogh;te we a&yogh;einus hym,
and dye we not alle, as oure bretheren
ben dead in priuy places.
42 Than the
synagoge of Jewis, stronge in mi&yogh;tis of
Yrael, is gadrid to hem, euery wilful
man in lawe;
43 and alle that fledden fro
yuels, ben addid, or put, to hem. And thei
ben maad to hem to stedfastnesse,
44 and
-- --
gedryden an oost, and smyten synners in
her wrath, and wickid men in her indignacioun;
and the tother fledden to naciouns,
for to ascape.
45 And Mathatias
enuyrounede, and his freendis, and distruyeden
auters,
46 and circumcididen children
vncircumcidid, hou manye euer thei
founden in coostis of Yrael, in strengthe.
47 And thei pursueden sonys of pride, and
the werk hadde prosperite in her hondis.
48 And thei weeldiden the lawe `of hondis
of heithen men, and of hondis of kyngus,
and &yogh;auen not horn, or strengthe, to the
synner.
49 And the days of Mathatias of
dying nei&yogh;eden, and he saide to his sonys,
Now pride is counfortid, and chastisyng,
and tyme of distruccioun, and the wrath
of indignacioun.
50 Now therfore, sonys,
be &yogh;e suers, or louers, of the lawe, and
&yogh;eue &yogh;e &yogh;oure lyues for the testament of
fadris.
51 And bithenke &yogh;e of the werkis
of fadris, that thei diden in her generaciouns,
and &yogh;e shuln resceyue grete glorie,
and euerlastynge name.
52 Wher Abraham
in temptation was not founden feithful,
and it is rettid to hym to ri&yogh;twisnesse?
53 Joseph in tyme of his anguyshe kepte
the comaundement, and was maad lord
of Egypt.
54 Fynees, oure fadir, feruently
louynge the feruent loue of God, toke testament
of euerlastynge presthode.
55 Jhesus,
or Josue, whijle he fulfilled the
word, is maad duyk in Yrael.
56 Caleph,
whijl he witnessith in the chirche, toke
heritage.
57 Dauid in his mercy gate the
seete of kyngdam, in to worldis.
58 Helye,
whijl he feruently loueth the feruent loue
of the lawe, is resceyued in to heuen.
59 Ananias, Azarias, Mysael, by leeuynge
ben delyuered of flawme.
60 Danyel in
his symplenesse is delyuerd of mouth of
lyouns.
61 And thus bithenke &yogh;e bi generacioun
and generacioun, for alle that
hopen in to hym ben not maad vnstedfast.
-- --
62 And of wordis of the synner &yogh;e
shuln not drede, for the glorie of hym
is torde and worme;
63 to day he is enhaunsid,
and to morrew he shal not be
founden, for he is turned in to his erthe,
and his thou&yogh;te shal perishe.
64 Therfore,
sonys, be &yogh;e confortid, and do &yogh;e manly
in the lawe; for whan &yogh;e shuln do whiche
thingus ben bedun to &yogh;ou in the lawe of
the Lord &yogh;our God, in it &yogh;e shuln be
glorious.
65 And loo! Symount, &yogh;our brothere;
I wote, for he is a man of counseile,
heere &yogh;e hym euermore, and he
shal be fadir to &yogh;ou.
66 And Judas Machabeus,
stronge in mi&yogh;tis fro his &yogh;outh, be
he to &yogh;ou a prince of kni&yogh;thode, and he
shal do bateil of the peple.
67 And &yogh;e
shuln brynge to &yogh;ou alle doars of the
lawe, and venge &yogh;e the veniaunce of
&yogh;oure peple.
68 &YOGH;elde &yogh;e &yogh;eeldynge to heithen
men, and take &yogh;e tent `in to the
heest of lawe.
69 And he blesside hem, and
is putt to his faders.
70 And he is dead in
the hundrid and sixe and fourtie &yogh;eere,
and is biryed of his sonnys in to the
sepulcre of his fadris in Modyn; and
alle Yrael weiliden hym with greet
weylyng.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
