Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. X.
1 Axe &yogh;e reyn of the Lord in euenyng
tyme, and the Lord shal make snowis,
and reyn of mi&yogh;t of the cloude; and he
shal &yogh;eue to hem, eche by hem self, erbe
in the feeld.
2 For symulacris spaken vnprofitable
thing, and dyuynours sawen
lesyng; and dremers spaken veynly,
ydely thei confortiden; therfor thei ben
ledde to as a floc, thei shuln be tourmentid,
for sheperd is not to hem.
3 Vpon
sheperdis my woodnes is wrothe, and
vpon goot buckis Y shal visite; for the
Lord of oostis hath visited his floc, the
hous of Juda, and hath putt hem as
hors of his glorye in batel.
4 Of hym
corner, and of him a litil pale, of hym
bowe of batel, and of hym eche exactour,
or vniust axer, shal go out togidre.
5 And
thei shuln be as stronge men, defoulynge
cley of wayes in bateil, and thei shuln
fi&yogh;te, for the Lord is with hem; and styers
of horsis shuln be confoundid.
6 And
Y shal coumforte the hous of Juda, and
Y shal saaue the hous of Joseph; and Y
-- --
shal conuerte hem, for Y shal haue mercye
of hem; and thei shuln be as thei weren,
whanne Y hadde not cast hem awey;
forsothe Y the Lord God of hem, and Y
shal graciousely heere hem.
7 And thei
shuln be as stronge of Effraym, and the
herte of hem shal glade, as of wyne; and
the sonys of hem shuln see, and glade,
and the hert of hem shal ioye with outeforth
in the Lord.
8 Y shal hisse, or softly
speeke, to hem, and Y shal gedre hem,
for Y a&yogh;ein bou&yogh;te hem, and Y shal multiplie
hem, as thei weren byfore multiplied.
9 And Y shal sowe hem in peplis,
and of fer thei shuln bithenke of me;
and thei shuln lyue with her sonys, and
shuln turne a&yogh;ein.
10 And Y shal a&yogh;ein
leede hem fro the lond of Egypt, and of
Assiriens Y shal gedre hem; and to the
lond of Galaad and of Liban Y shal
bringe hem, and place shal not be
founden in hem.
11 And he shal passe in
wawe of the se, and shal smyte wawes
in the see, and alle depnessis of flood
shuln be confoundid; and the pride of
Assur shal be meekid, and the sceptre of
Egipt shal go awey.
12 Y shal coumforte
hem in the Lord, and in the name of
hym thei shuln walke, saith the Lord.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
