CAP. I.
1 In the secounde &yogh;eer of Darius, kyng
of Persis, in the sixte moneth, in oo day
of the moneth, the word of the Lord is
maad in the hond of Aggey, prophete, to
Zorobabel, sone of Salatiel, duyke of Juda,
and to Jhesu, `the greet prest, sone of Josedech,
sayinge,
2 These thingus saith the
Lord of oostis, sayinge, This peple saith,
&YOGH;it cummeth not the tyme of the hous of
the Lord to be beeldid.
3 And the word
of the Lord is maad in the hond of Aggey,
prophete,
4 sayinge, Wher it is tyme
to &yogh;ou, that &yogh;e dwelle in housis couplid
with tymbre, and this hous desert?
5 And
now these thingus saith the Lord God of
oostis, Putte &yogh;e &yogh;our hertis vpon &yogh;our
wayes.
6 &YOGH;e han sown myche, and brou&yogh;ten
in litil; &yogh;e han eten, and &yogh;e ben not fulfillid;
&yogh;e han drunke, and &yogh;e ben not ful
of drinke; &yogh;e hilliden &yogh;ou, and &yogh;e ben not
maad hote; and he that gadrid hijris,
sente hem in to a sac, or bagge, hoolid,
or broken.
7 These thingus saith the Lord
of oostis, Putte &yogh;e &yogh;our hertis vpon &yogh;our
wayes.
8 Stye &yogh;e vp in to the mounteyn,
bere &yogh;e treese, and bielde &yogh;e an hous;
and it shal be acceptable to me, and Y
shal be glorifiede, saith the Lord.
9 &YOGH;e
bihelden to more, and loo! it made
lesse; and &yogh;e brou&yogh;ten in to hous, and
-- --
Y blewe it out. For what cause, saith
the Lord of oostis? for myn hous is desert,
and &yogh;e hasten eche man in to his
hous.
10 For this thing heuens ben forbeden,
that thei shulden not &yogh;eue dew;
and the erthe is forbeden, that it shulde
not &yogh;eue his buriownyng.
11 And Y clepide
dryenesse vpon erthe, and vpon
mounteyns, and vpon whete, and vpon
wyn, and vpon oyle, and what euer
thingus the erthe bringeth forth; and
vpon men, and vpon beestis, and vpon
al labour of hondis.
12 And Zorobabel,
sone of Salatiel, herde, and Jhesus, `the
grete prest, sone of Josedech, and
alle relikis of the peple, the voys of her
God, and the wordis of Aggey, prophete,
as the Lord God of hem sente hym to
hem; and al the peple dredde of the face
of the Lord.
13 And Aggey saide, a messangere
of the Lord, of messangers of
the Lord to the peple, sayinge, Y am
with &yogh;ou, saith the Lord.
14 And the Lord
reyside the spirit of Zorobabel, sone of
Salatiel, duyk of Juda, and the spirit of
Jhesu, `the grete prest, sone of Josedech,
and the spirit of the relikis of alle peple;
and thei entriden, and maden werk in
the hous of the Lord of hoostis, her God,
1 in the twentithe day and fourthe of the
moneth, in the sixte moneth, in the secounde
&yogh;eer of Darius, kyng.
CAP. II.
2 In the seuenthe moneth, in the twentithe
and firste of the moneth, the word
of the Lord is maad in the hond of Aggey,
prophete,
3 sayinge, Speke thou to Zorobabel,
sone of Salatiel, duyk of Juda,
and to Jhesu, `the greet preest, sone of Josedech,
and to other of the peple, sayinge,
Who in &yogh;ou is left,
4 that saw&yogh; this
hous in his first glorie? and what seen
&yogh;e this now? wher it is not thus, as it be
not in &yogh;our ee&yogh;en?
5 And now, Zorobabel,
-- --
be thou coumfortid, saith the Lord, and
Jhesu, `greet preest, sone of Josedech, be
thou coumfortid, and al peple of the
lond, be thou coumfortid, saith the Lord
of oostis; and do &yogh;e, for Y am with &yogh;ou,
saith the Lord of oostis.
6 The word
that Y couenauntide with &yogh;ou, whanne
&yogh;e wenten out of the lond of Egypt, and
my Spirit shal be in the mydil of &yogh;ou,
Nyl &yogh;e dreede,
7 for these thingus saith
the Lord of oostis, &YOGH;it oo lytil thing, or
tyme, is, and Y shal moue heuen, and
erthe, and the se, and dryenesse;
8 and Y
shal moue alle folkis, and the desirid to
alle folkis shal cume; and Y shal fulfille
this hous with glorie, saith the Lord of
oostis.
9 Myn is syluer and myn is gold,
seith the Lord of oostis.
10 The glorie of
this laste hous schal be greet, more than
of the firste, seith the Lord of oostis.
And in this place I schal &yogh;yue pees,
seith the Lord of oostis.
11 In the foure
and twentithe of the nynthe moneth, in
the secunde &yogh;eer of Darius, kyng, the
word of the Lord is maad to Aggey,
prophete,
12 seiynge, These thingus saith
the Lord God of oostis, Axe prestis the
lawe,
13 sayinge, &YOGH;if a man shal take halewid
fleshe in the heme of his clothinge,
and shal touche of the hee&yogh;nesse therof
brede, or potage, or wyne, and oyle, or
eche mete, wher it shal be halewid?
Sotheli prestis answerynge sayden, Nay.
14 And Aggey saide, &YOGH;if a man defoulid in
soule shal touche of alle these, wher it
shal be defoulid? And prestis answerden,
and saiden, It shal be defoulid.
15 And
Aggey answerde, and saide, So this peple,
and so this folk byfore my face, saith the
Lord, and so al werc of her hondis; and
alle thingus that thei shuln offre there,
shuln be defoulid.
16 And now putte &yogh;e
&yogh;our hertis, fro this day and aboue, byfore
that a stoon vpon a stoon was putt
in the temple of the Lord,
17 whenne &yogh;e
wenten to an hep of twenty bushellis,
-- --
and there weren maad ten; &yogh;e entriden
to the pressour, that &yogh;e shulden presse
out fifty galouns, and ther weren maad
twenti.
18 Y smote &yogh;ou with brennynge
wynd, and mildew, and hayl, and alle
the werkis of &yogh;our hondis; and ther was
not in &yogh;ou that turnede a&yogh;ein to me, saith
the Lord.
19 Putte &yogh;e &yogh;our hertis of this
day, and in to cummynge, fro the fourthe
and twentithe of the ninthe moneth, fro
the day in whiche foundementis ben
casten of the temple of the Lord, putte
&yogh;e vppon &yogh;our herte.
20 Wher now seed is
in buriownyng? and &yogh;it the vyne &yogh;erd,
and fijge tree, and powme garnet, and
the tree of olyue florishide not. Of this
day Y shal blesse.
21 And the word of
the Lord is maad the secounde tyme to
Aggey, in the foure and twentithe of the
moneth,
22 saiynge, Speke thou to Zorobabel,
duyk of Juda, sayinge, Y shal
moue heuen and erthe to gydre,
23 and Y
shal distruye the sete of rewmys, and Y
shal breke the strengthe of the rewme of
heithen men, and Y shal distruye the
foure horsid cart, and the styer therof;
and the horsis shuln go doun, and the
styers of hem, a man in swerd of his
brother.
24 In that day, saith the Lord of
oostis, thou Zorobabel, sone of Salatiel,
my seruaunt, Y shal take to thee, saith
the Lord; and Y shal putte thee as a
sygnet, for Y cheese thee, saith the Lord
of hoostis.
Here endith the book of Aggey, the
prophete, and bigynneth the book of
Zacharie, sone of Barachie.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
