1   The wordis of Amos, whiche was in sheperdis thingus of Thecue, whiche he saw&yogh; on Yrael, in the days of Osye, kyng of Juda, and in the days of Jeroboam, sone of Joas, kyng of Yrael, byfore two &yogh;eris of the erthe mouynge. 2   And he saide, The Lord shal rore of Syon, and of Jerusalem shal &yogh;eue his voice; and the faire thingus of sheperdis mourneden, and the top of Carmele is dried vp. 3   These thingis saith the Lord, On thre grete trespassis of Damask, and on foure, Y shal not conuerte hym, for that that thei threshiden in yren waynes Galaad. 4   And Y shal sende fijr in to the hous of Asael, and it shal deuoure the houses of Benadab. 5   And Y shal breke to gydre the barris, or lockis, of Damaske, and Y shal distruye the dweller of the feeld of ydol, and the holdynge sceptre of the hous of voluptee and lecchorie; and the peple of Syrie shal be transferrid to Sirenen, saith the Lord. 6   These thingus saith the Lord, On three grete trespassis of Gasa, and on foure, Y shal not conuerte hym, for that that he translatide perfit caitiftee, that he shulde close to gydre it in to Ydume. 7   And Y shal sende fijr in to the wall of Gasa, and it shal deuoure housis therof. 8   And Y shal distruye the dwellers of Azotus, and the holdynge sceptre of

Ascalon; and Y shal turne to gydre myn hond vpon Accharon, and relikis of Philistiens shuln perische, seith the Lord God. 9   These thingis seith the Lord God, On thre greet trespassis of Tyrus, and on four, Y shal not conuerte hym, for that that thei closiden to gydre perfit caytiftee in Ydume, and thou&yogh;ten not of the boond of bretheren. 10   And Y schal send fijr in to the wall of Tyrus, and it shal deuoure the housis therof. 11   These thingus seith the Lord God, On three grete trespassis of Edom, and on foure, Y shal not conuerte hym, for that he pursuede in swerd his brother, and defoulide the mercy of hym, and heelde ouer his wodenesse, and kepte his indignacioun til in to the eend. 12   Y shal sende fijr in to Theman, and it shal deuoure the housis of Bosra. 13   These thingus saith the Lord God, On three grete trespassis of the sonys of Amon, and on the foure, Y shal not conuerte hym, for that he karf wymmen with chijld of Galaad, for to alarge his terme. 14   And Y shal kyndyl fijr in the wall of Rabba, and it shal deuoure his housis, in &yogh;oulyng in the day of bateyle, and in whirlwynd in the day of meuyng to gydre. 15   And Melchon shal go in to caitiftee, he and his princis to gydre, saith the Lord. CAP. II.

1   These thingis saith the Lord God, On three grete trespassis of Moab, and on foure, Y shal not conuerte hym, for that he brente the boonys of the kyng of Ydume vn to ash. 2   And Y shal sende fijr in to Moab, and it shal deuoure the housis of Carioth; and Moab shal dye in sown of trumpe. 3   And Y shal distruye the domysman of the mydil therof, and Y shal slea alle his princis with hym, saith the Lord. These thingis saith the Lord, On three grete trespassis of Juda, 4   and on foure, Y shal not conuerte hym, for that he castide awey the lawe of the Lord, and kepte not his comaundementis; forsothe

her ydols disceiueden hem, after whom the faders of hem wenten. 5   And Y shal sende fijr in to Juda, and it shal deuoure the housis of Jerusalem. 6   These thingus saith the Lord, On three grete trespassis of Yrael, and on foure, Y shal not conuerte hym, for that he solde a iust man for syluer, and a poore man for shoone. 7   Whiche breken to gydre on dust of the erthe the hedis of pore men, and bowen awey the waye of meeke men; the sone and his fadir wente to a wenche, that thei defouliden myn holy name. 8   And on clothis leyde to wedde thei eeten bysidis eche auter, and drunken wijn of dampnyd men in the hous of her God. 9   Forsothe Y distruyede Ammorey fro the face of hem, whos hienesse of cedris the hyenesse of hym, and he strong as an ook; and Y brake to gidre the fruyte of hym aboue, and the rotis of hym bynethe. 10   Y am, that made &yogh;ou for to stye vp fro the lond of Egypt, and Y ledde &yogh;ou out in desert fourty &yogh;eer, that &yogh;e shulde weelde the lond of Ammorrey. 11   And Y reyside of &yogh;our sonys in to prophetis, and of &yogh;our &yogh;unge men Na&yogh;areys. Wher it is not thus, &yogh;e sonys of Yrael? saith the Lord. 12   And &yogh;e &yogh;auen wijn to Na&yogh;areys, and &yogh;e comaundiden to prophetis, sayinge, Prophecie &yogh;e not. 13   Loo! Y shal sowne strongly vndir &yogh;ou, as a wayn chargid with hay sowneth strongly. 14   And fli&yogh;t shal perische fro the swift, and a strong man shal not weelde his vertue, and a mi&yogh;ty man in strengthe shal not saue his soule, or lijf; 15   and a man holdynge bowe shal not stonde, and the swift in his feet shal not be saued; and the styer of hors shal not saue his soule, 16   and the stronge in herte amonge men shal flee nakid in that day, saith the Lord. CAP. III.

1   Sonys of Yrael, heer &yogh;e the word that the Lord spac on &yogh;ou, on al the kynred,

whiche Y ledde out of the lond of Egypt, sayinge, 2   Oonly &yogh;ou Y knew of alle kynredis of erthe; therfore Y shal visite on &yogh;ou alle &yogh;our wickidnessis. 3   Wher two shuln go to gydre, no but it shal accorde to hem? 4   Wher a lyoun shal rore in the wijld wode, no bot he shal haue pray? Wher the whelp of a lyoun shal &yogh;eue voice of his couche, no bot he shal cacche sum thing? 5   Wher a brid shal falle in to grane of erthe, with outen a fouler? Wher a gnare shal be taken awey fro erthe, before it shal take sum thing? 6   &YOGH;if a trumpe shal sowne in a cytee, and the peple shal not dreede? &YOGH;if there be yuel in the citee, whiche the Lord shal not do? 7   For the Lord God shal not do a word, no bot he shal shewe his preuyte to his seruauntis prophetis. 8   A lyoun shal rore, who shal not dreede? the Lord God spac, who shal not prophecie? 9   Make &yogh;e herd in the housis of Azotus, and in the housis of the lond of Egypt; and saye &yogh;e, Be &yogh;e gadrid on the hillis of Samarye, and see many woodnessis in the mydil therof, and men suffrynge fals chalenge in priuy chaumbris therof. 10   And thei couthen not do ri&yogh;t thing, saith the Lord, tresourynge wickidnesse and raueyn in her housis. 11   Therfore these thingus saith the Lord God, The lond shal be in tribulacioun, and shal be cumpasid; and thi strengthe shal be drawen awey fro thee, and thin housis shuln be robbid. 12   These thingus saith the Lord, Hou &yogh;if a sheperd delyuere two hypis, or the last thing of a litil ere of the lyouns mouthe, so the sonys of Yrael shuln be delyuered, that dwellen in Samarie, in plage, or wound, of the litil bed, and in the lappe of Damaske. 13   Heere &yogh;e, and witnesse &yogh;e to gidre in the hous of Jacob, saith the Lord God of oostis. 14   For in the day, whanne Y shal bygynne for to visite the trespassis of Yrael on hym, Y shal visite and on the auters of Bethel; and the corners

of the auters shuln be kitte of, and shuln falle in to erthe. 15   And Y shal smyte the wyntyr hous with the somer hous, and the housis of yuer shuln perishe, and many housis shuln be distruyed, saith the Lord. CAP. IV.

1   Heer this word, &yogh;e fatt kyen, that ben in the mount of Samarie; whiche don fals chalenge to nedy men, and to gydre breken poore men; whiche saien to &yogh;our lordis, Brenge &yogh;ee, and we shuln drynke. 2   The Lord God swore in his holy, for loo! days shuln cum on &yogh;ou; and thei shuln reyse &yogh;ou in a dart with out yren, and &yogh;our relykis in pottis boylynge. 3   And by opnyngis &yogh;e shuln go out, an other a&yogh;einus an other, and &yogh;e shuln be cast in to Arnoun, saith the Lord. 4   Cum &yogh;e to Bethel, and do &yogh;e vnpytously; to Galgala, and multiplie &yogh;e trespassyng; and offre &yogh;e eerly &yogh;our sacrifices for victorie, in three days &yogh;our tithes. 5   And sacrifie &yogh;e herying of sour dowid, and clepe &yogh;e wilful offryngus, and telle &yogh;e; forsothe thus &yogh;e wolden, sonys of Yrael, saith the Lord God. 6   Wherfore and Y &yogh;aue to &yogh;ou eggyng of teeth in alle &yogh;our cytees, and need of loues in alle &yogh;our placis; and &yogh;e turneden not a&yogh;ein to me, saith the Lord. 7   And Y forbad rayn fro &yogh;ou, whanne &yogh;it three monethis weren ouer, til to rype corn; and I reynede on oo citee, and I reynede not on an other; oo part is reyned, and the part on whiche Y reynede not, dryede. 8   And two and three cytees camen to oo cytee, for to drinke water, and thei ben not fulfillid; and &yogh;e turnede not a&yogh;ein to me, saith the Lord. 9   Y smote &yogh;ou in brennyng wynd, and in myldew, the multitude of &yogh;our gardeyns, and &yogh;our vijn &yogh;erdis; and olyuetis, or placis wher olyues wexen, and fijge placis, eruke eete; and &yogh;ee

turneden not a&yogh;ein to me, saith the Lord. 10   Y sente in to &yogh;ou deeth in the waye of Egypt, Y smote in swerd &yogh;our &yogh;ung men, vn to caitifte of &yogh;our horsis, and Y made the stynk of &yogh;our castels, or multitude of armed men, for to stye in to &yogh;our nose thrillis; and &yogh;e turneden not a&yogh;ein to me, saith the Lord. 11   Y distruyede &yogh;ou, as God distruyede Sodom and Gomor, and &yogh;e ben maad as a brond rauyshid of brennyng; and &yogh;e turneden not a&yogh;ein to me, saith the Lord. 12   Wherfore this Y shal do to thee, Yrael; forsothe after that Y shal do to thee this thing, Yrael, be thou maad redy in to a&yogh;ein cummyng of thi God. 13   For loo! Y fourmynge hillis, and makynge of nou&yogh;t wynd, and tellynge to man his speche, makynge a morewe cloude, or myst, and goynge on hee&yogh; thingis of erthe; the Lord of oostis name of hym. CAP. V.

1   Heere &yogh;e, hous of Yrael, this word, that Y reyse on &yogh;ou a weylyng. 2   The meyden of Yrael felle doun, she shal not put to, that she rijse a&yogh;ein; she is cast doun in to hir erthe, ther is not that shal reyse hir. 3   For these thingus saith the Lord God, The cite of whiche a thousand wenten out, an hundrid shuln be left theryne; and of whiche an hundrid wenten out, ten shuln be left therynne, in the hous of Yrael. 4   For these thingis seith the Lord to the hous of Israel, Seeke &yogh;e me, and &yogh;e shulen lyue; 5   and nyle &yogh;e seeke Bethel, and in to Galgala nyle &yogh;e entre, and into Bersabe passe &yogh;e not; for Galgal schal be led caityf, and Bethel shal be vnprofitable. 6   Seeke &yogh;e the Lord, and lyue &yogh;e, lest per auenture the hous of Joseph be brent as fijre; and it shal deuoure, and ther shal not be, that shal quenche Bethel. 7   Whiche conuerten dom in to wermod, and forsaken ri&yogh;twijsnesse of the Lord in erthe, 8   and makynge Arture

and Orion, and turnynge in to morewnyng dercknessis, and chaungynge day `in to ni&yogh;t; whiche clepith waters of the see, and heeldith out hem on the face of the erthe; the Lord is name of hym. 9   Whiche scorneth distruyinge, or waastnesse, on the stronge, and bringith robbyng on the mi&yogh;ty. 10   Thei hadden in hate the repreuynge man in the &yogh;ate, and thei wlatiden a man spekynge perfitly. 11   Therfore for that that &yogh;e robbiden the pore man, and token fro hym the chosen pray, &yogh;e shuln beelde housis with sqware stoon, and &yogh;e shuln not dwelle in hem; &yogh;e shuln plante most amyable vyne &yogh;erdis, and &yogh;e shuln not drinke the wyne of hem. 12   For Y knewe &yogh;our manye grete trespassis, and &yogh;our strong synnes; enmyes of the iust, takynge &yogh;iftis, and beringe doun pore men in the &yogh;ate. 13   Therfore a prudent man in that tyme shal be stille, for the tyme is yuel. 14   Seke &yogh;e good, and not yuel, that &yogh;e lyue, and the Lord God of oostis shal be with &yogh;ou, as &yogh;e saiden. 15   Hate &yogh;e yuel, and loue &yogh;e good, and ordeyne &yogh;e in the &yogh;ate dom; &yogh;if per auenture the Lord God of oostus haue mercye to the relikis of Joseph. 16   Therfore these thingus saith the Lord God of oostis, hauynge lordship, In alle stretis weylynge, and in alle thingus that ben with outforth `it shal be said, Wo! wo! and thei shuln cleepe an erthe tilier to mournyng, and hem to weylyng, that kunnen weyle. 17   And in alle weyes weylyng shal be, for Y shal passe by the mydil of thee, saith the Lord. 18   Wo to men desirynge the day of the Lord; wher to it to &yogh;ou? This day of the Lord dercknessis, and not li&yogh;t. 19   Hou &yogh;if a man renne fro face of a lyoun, and a bere renne to hym; and he entre in the hous, and lene with his hond vpon the walle, and a serpent dwellynge in shadewe byte hym. 20   Wher not dercknessis

the day of the Lord, and not li&yogh;t; and myst, and not shynyng therynne? 21   Y hatide and castide awey &yogh;oure feest days, and Y shal not take the odour of &yogh;our cumpanyes. 22   That &yogh;if &yogh;e shuln offre to me &yogh;our brent sacrifices, and &yogh;iftis, Y shal not resceyue, and Y shal not byholde avowis of &yogh;our fat thingus. 23   Do awey fro me the noyse of thi songis, or ditees, and Y shal not heere the songis of thin harpe. 24   And dom shal be shewid as water, and ri&yogh;twysnesse as a strong streem of reyn. 25   Wher &yogh;e offriden to me oostis, and sacrifice in desert fourty &yogh;eeris, &yogh;e hous of Yrael? 26   And &yogh;e han born tabernaclis to Moloch, &yogh;our god, and ymage of &yogh;oure ydolis, the sterre of &yogh;our god, whiche &yogh;e maden to &yogh;ou. 27   And Y shal make &yogh;ou for to passe ouer Damask, saide the Lord; God of oostis name to hym. CAP. VI.

1   Wo to &yogh;ou, that ben ful of richessis in Syon, and tristen in the hille of Samarie, &yogh;e best men in honour, hedis of peplis, proudly goynge in to the hous of Yrael. 2   Go &yogh;e in to Calamye, and se &yogh;e, and go &yogh;e thennus in to Emath the grete; and go &yogh;e doun in to Geth of Palestyns, and to alle the best rewmes of hem, &yogh;if her terme be bradder than &yogh;our terme. 3   Whiche &yogh;e ben departid in to yuel day, and nei&yogh;en to seete of wickidnesse; whiche &yogh;e sleepen in beddis of yuer, 4   and wexen wijld, or iolyf, in &yogh;our beddis; whiche &yogh;e eete lombe of floc, and a calf of mydil of the droue; 5   whiche &yogh;e syngen at voice of psautrie. As Dauid thei gessiden hem for to haue vessels of song, 6   in vyols drinkynge wyne, and with best oynement anoyntid; in no thing thei suffriden on the contricioun of Joseph. 7   Wherfore now thei shuln passe in the

hed of men passynge ouer, and the doyng, or tresoun, of men wexinge ioly shal be don awey. 8   The Lord God swore in his soule, saith the Lord God of oostis, Y wlate the pride of Jacob, and Y hate the hous of hym, and Y shal bytake the citee with his dwellers; 9   that &yogh;if the relikis shuln be ten men in oon hous, and thei shuln dye. 10   And his nei&yogh;bore shal take hym, and shal to gydre brenne hym, that he bere out boonys of the hous. And he shal saye to hym, that is in priue places of the hous, 11   Wher there is &yogh;it anentis thee? And he shal answere, An eend is. And he shal saye to hym, Be stille, and recorde not the name of the Lord. 12   For loo! the Lord shal comaunde, and shal smyte the gretter hous with fallyngis, and the lesse hous with keruyngis. 13   Wher horsis mown renne in stonys, or may it be erid in wijlde oxen? For &yogh;e conuerten dom in to bitternesse, and the fruyte of ri&yogh;twisnesse in to wormod. 14   Whiche &yogh;e gladen in nou&yogh;t, whiche &yogh;e sayen, Wher not in oure strengthe we token to vs horns? 15   Loo! Y shal reyse a folc vpon &yogh;ou, &yogh;e the hous of Yrael, saith the Lord God of oostis; and it shal to gydre breke &yogh;ou fro entre of Emath vn to the streme of desert. CAP. VII.

1   These thingus the Lord God shewide to me; and loo! a maker of locust in the bygynnyng of buriownynge thingus of eeuen rayn, and loo! eeuen rayn after the clipper of floc, or kyng. 2   And it is don, whanne he eendide for to eete the herbe of erthe, Y saide, Lord God, be thou mercyful, Y byseche; who shal reyse Jacob, for he is litil? 3   The Lord hadde mercy on this thing; It shal not be, saide the Lord God. 4   The Lord God shewide to me this thing; and loo! the Lord God

shal cleepe dom to fijr, and it shal deuoure myche depnesse, and shal eet to gydre a part. 5   And Y saide, Lord God, reste thou, Y byseche; who shal reise Jacob, for he is lytil? 6   The Lord hadde mercy on this thing; Bot and this thing shal not be, saide the Lord God. 7   The Lord God shewide to me these thingus; and loo! the Lord stondynge on a wall teerid, or morterd, and in the hond of hym a truel of masoun. 8   And the Lord saide to me, What seest thou, Amos? And Y saide, A truel of masoun. And the Lord saide, Loo! Y shal putte a truel in mydil of my peple Yrael; Y shal no more putte to, for to ouer leede hym; 9   and the hee&yogh; thingus of the ydol shuln be distruyed, and the halewyngis of Yrael shuln be desolat; and Y shal ryse on the hous of Jeroboam in swerde. 10   And Amasie, prest of Bethel, sente to Jeroboam, kyng of Yrael, sayinge, Amos rebellide a&yogh;einus thee, in the mydil of the hous of Yrael; the lond may not susteyne alle his wordis. 11   Forsothe Amos saith these thingus, Jeroboam shal dye in swerd, and Yrael caitif shal passe of his lond. 12   And Amasie saide to Amos, Thou that seest, go; flee thou in to the lond of Juda, and eete thou there thi breede; and there thou shalt prophecie. 13   And in Bethel thou shalt no more putte to, that thou prophecie, for it is the halewyng of the kyng, and is hous of the rewme. 14   And Amos answerde, and saide to Amasye, Y am not a prophete, Y am not the sone of a prophete; but a neet heerde Y am, drawinge vp sycomoris. 15   And the Lord toke me, whanne Y suede the floc; and the Lord saide to me, Go, and prophecie thou to my peple Yrael. 16   And now heere thou the word of the Lord. Thou saist, Thou shalt not prophecie on Yrael, and thou shalt not droppe on the hous of ydol. 17   For this thing the Lord saith

these thingis, Thi wyf in cytee shal do fornycacioun, and thi sonnys and thi dou&yogh;ters in swerd shuln falle, and thin erthe shal be meetyn with a litil coorde; and thou shalt dye in a polut lond, and Yrael shal passe caitif of his lond. CAP. VIII.

1   The Lord God shewide to me these thingis; and loo! an hoke of applis. 2   And the Lord saide, What seest thou, Amos? And Y saide, An hok of applis. And the Lord saide to me, The eende cummeth on my peple Yrael; Y shal namore putte to, that Y passe by hym. 3   And the herris of temple shuln gretely soune in that day, saith the Lord God. Manye men shuln dye, in eche place silence shal be cast doun. 4   Heere this thing, whiche breken to gydre the pore man, and maken needy men of the lond for to fayle, 5   sayinge, Whan shal rype corn passe, and we shuln selle marchaundises? and the saboth, and we shuln opyn whete? that we make lesse the mesure, and encresce the sycle, and vndirputte gylfull balauncis; 6   that we welden in syluer nedy and pore men for shoon, and we selle clensingus of whete? 7   God swore a&yogh;einus the pryde of Jacob, &YOGH;if Y shal for&yogh;ete in to the eende alle the werkis of hem. 8   Wher on this thing the erthe shal not be moued to gidre, and eche dweller therof shal mourne? And it shal stye vp as al the flood, and shal be cast out, and shal fleete awey as the strond of Egypt. 9   And it shal be, saith the Lord, in that day the sunne shal go dounn in mydday, and Y shal make the erthe for to be derk in day of li&yogh;t. 10   And Y shal conuerte &yogh;our feest days in to mournyng, and alle &yogh;our songis in to weylyng; and Y shal leede yn on al &yogh;our bac a sak, and on eche &yogh;our hed ballidnesse; and Y shal putte it as mournyng

of an oon bigeten sone, and the last thingus therof as a bitter day. 11   Loo! the days cummen, saith the Lord, and Y shal sende out hungre in to erthe; not hungre of breed, nether thrist of water, bot of heeryng of the word of God. 12   And thei shuln be moued to gydre fro see vn to see, and fro the north vn to the eest thei shuln cumpasse, seekynge the word of the Lord, and thei shuln not fynde. 13   In that day faire maydeyns shul faile, 14   and &yogh;unge in thrist, whiche sweren in trespas of Samarye, and sayen, Thi god lyueth, Dan, and the waye of Bersabe lyueth; and thei shuln falle, and thei shuln namore ryse a&yogh;ein. CAP. IX.

1   I saw the Lord stondynge on the auter, and he saide, Smyte thou the herre, and be the ouer thrisfoldis moued to gydre; forsothe auerice in the hed of alle, and Y shal slea in swerd the last of hem; ther shal no fli&yogh;t be to hem, and he that shal flee of hem, shal not be saued. 2   &YOGH;if thei shuln go doun vn to helle, fro thennus my hond shal leede hem out; and &yogh;if thei shuln stye til in to heuen, fro thennus Y shal drawe hem doun. 3   And &yogh;if thei shuln be hid in the top of Carmele, fro thennus Y seekynge shal do hem awey; and &yogh;if thei shuln hyde hem self fro myn ee&yogh;en in depnesse of the see, ther Y shal comaunde to a serpent, and it shal bite hem. 4   And &yogh;if thei shuln go awey in to caitiftee bifore her enmyes, ther Y shal comaunde to swerd, and it shal slea hem. And Y shal putte myn ee&yogh;en vpon hem in to yuel, and not in to good. 5   And the Lord God of oostis, that toucheth erthe, and it shal fayle, and alle men dwellynge theryn shuln mourne; and it shal stye vp as eche stronde, and shal fleete awey as

the flood of Egypt. 6   He that beeldith his stying vp in heuen, and foundide his knytche, or berthen, on erthe; whiche clepith waters of the see, and heeldith hem out on face of the erthe; the Lord name of hym. 7   Wher not as sonys of Ethiopyens &yogh;e ben to me, the sonys of Yrael? saith the Lord God. Wher Y made not Yrael for to stye vp of the lond of Egypt, and Palistens of Capadocie, and Siriens of Syrenen? 8   Loo! the ee&yogh;en of the Lord God on rewme synnynge, and Y shal to gydre breke it fro face of the erthe; netheles Y brekynge togidere shal not breke to gydre the hous of Jacob, saith the Lord. 9   Loo! sotheli Y shal comaunde, and shal smyte in alle folkis the hous of Yrael, as whete is smyten in a rydil, and a lytil stoon of it shal not falle on erthe. 10   Alle synners of my peple shal dye in swerde, whiche sayn, Yuel shal not nei&yogh;, and shal not cumme on vs. 11   In that day Y shal rayse the tabernacle of Dauid, that felle doun, and Y shal a&yogh;ein beelde opnyngis of wallis therof, and Y shal instore tho thingis that fellen to gydre; and Y shal a&yogh;ein beelde hym, 12   as in olde days, that thei weelde relikis of Ydome, and alle naciouns; for that my name is in clepid on hem, saith the Lord doynge these thingus. 13   Loo! days cummen, saith the Lord, and the erer shal cacche the reper, and treder of grape the man sendynge seed; and mounteyns shuln droppe swetnesse, and alle smale hyllis shuln be tili&yogh;id. 14   And Y shal conuerte the caytifte of my peple Yrael, and thei shuln beelde forsaken cytees, and shuln dwelle; and shuln plaunte vyne &yogh;erdis, and thei shuln drinke wyne of hem; and thei shuln make gardyns, and shuln ete fruytis of hem. 15   And Y shal plante hem on her erthe, and

Y shal namore drawe hem out of her lond, whiche Y &yogh;aue to hem, saith the Lord thi God. Here endith the book of Amos, prophete, and bigynneth the book of Abdias, prophete.

Previous section

Next section