Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. I.
1 The word of the Lord, that is maad to
Joel, the sone of Fatuel.
2 Heere &yogh;e, olde
men, this, and with eeris perceyue &yogh;e, alle
dwellers of erthe. &YOGH;if this thing is don in
&yogh;our days, or in days of &yogh;our faders.
3 Vpon this thing telle &yogh;e to &yogh;our sones,
and &yogh;our sonys to her sonys, and the
sonys of hem to an other generacioun.
4 A locust eete the residue of eruke, that
is, a worme of bowis, and a bruke eete
the residue of locust, and rust eete the
residue of bruke.
5 Awake &yogh;e, drunken
men, and weepe; and &yogh;oule &yogh;e, alle that
drynken wyne in swetnesse; for it perishide
fro &yogh;our mouth.
6 Forsothe folk hath
styed vpon my lond, stronge and vnnoumbreable.
The teeth of hym as teeth of
lyoun, and his wangteeth as whelpis of
a lyoun.
7 He hath putte my vyne &yogh;erd
in to desert, and hath drawen of the barc
of my fijg tree. He nakynge robbide it,
and castide awey; the braunchis therof
ben maad whijt.
8 Weile thou, as a mayden
gird with a sacche vpon the husbonde of
hir puberte, that is, tyme of weddynge.
9 Sacrifice perishide, and libacioun, that is,
offryng fleetynge thingus, of the hous of
the Lord; and prestis, mynystris of the
Lord, murneden.
10 The cuntree is robbid,
the erthe mournede; for whete is waastid,
-- --
and wijn is confoundid, and oyle langwishide,
or failide.
11 Erthe tiliers ben
confoundid, vyne tiliers &yogh;ouliden vpon
whete, wijn, and barly; for corn of the
feeld perishide.
12 The vyne &yogh;erd is confoundid,
and the fyge tree langwishide.
Poumgarnet, and palme tree, and maal
tree, or fir, of whom mastis ben maad,
and alle trees of the feeld dryeden; for
ioye is confoundid fro sonys of men.
13 &YOGH;e
prestis, gyrde &yogh;ou, and weile; &yogh;e mynystris
of the auter, &yogh;oule. &YOGH;e mynystris
of my God, entre &yogh;e yn, ligge &yogh;e in sak;
for sacrifice perishide of the hous of &yogh;our
God, and offryng of fleetyng thing.
14 Halewe
&yogh;e fastyng, clepe &yogh;e cumpanye, gadre
&yogh;e olde men, and alle dwellers of the lond
in to the hous of &yogh;our God; and crye &yogh;e
to the Lord, A!
15 A! A! to the day; for
the day of the Lord is ni&yogh;, and as waastynge
it shal cum of the mi&yogh;ty.
16 Wher
not before &yogh;our ee&yogh;en fodis perishen of
the hous of your God; gladnesse and ioye
with outen forth?
17 Beestus wexiden roten
to gidre in her drit. Berns ben destruyed,
celers ben scaterd, for whete is confusid.
18 What sorewide a beest with ynne? flockis
of grete beestis lowiden? for lesewe is
not to hem; bot and flockis of sheep perishiden.
19 To thee, Lord, Y shal crye,
for fijre ete the fair thingus of desert, and
flawme brente alle trees of the cuntree.
20 Bot and beestis of the feeld, as a feeld
thristynge rayn, byhelden vp to thee; for
wellis of watris ben dryed vp, and fijr
deuourede the fair thingis of desert.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
