Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
HOSEA.
Osee, the Prophete.
CAP. I.
1 The word of the Lord that is maad to
Osee, sone of Bery, in the days of Osye,
Joathan, Achas, and Ezechie, kyngis of
Juda, and in the days of Jeroboam, sone
of Joas, kyng of Yrael.
2 The bygynnyng
of spekynge Lord in Osee. And the
Lord said to Osee, Go thou, take to thee
a wijf of fornicacioun, and make to thee
sonys of fornicaciouns, for the erthe doynge
fornicacioun shal do fornicacioun
fro the Lord.
3 And he wente, and toke
Gomer, the dou&yogh;ter of Debalaym; and she
conceyuyde, and bare to hym a sone.
4 And the Lord saide to hym, Clepe the
name of hym Jesrael; for &yogh;it a lytil and
Y shal visite the blode of Jesrael on the
hous of Hyeu, and shal make the kyngdam
of the hous of Yrael for to reste.
5 And in that day Y shal breke to gydre
the bowe of Yrael in the valey of Jesrael.
6 And she conceyuyde &yogh;it, and bare a dou&yogh;ter.
And he saide to hym, Clepe thou the
name of hir With outen mercy, for Y
shal namore putte to, for to haue mercy
to the hous of Yrael, bot bi for&yogh;etyng Y
shal for&yogh;ete hem.
7 And to the hous of
Juda Y shal haue mercy, and Y shal saue
hem in the Lord her God; and Y shal
not saue hem in bowe, and swerd, and
bateil, and in horsis, and in horsmen.
-- --
8 And she wenyde hir that was With outen
mercye.
9 And she conceyuyde, and bare
to hym a sone. And he saide, Clepe
thou the name of hym Not my people,
for &yogh;e ben not my peple, and Y shal not
be &yogh;our God.
10 And the noumbre of sones
of Yrael shal be as grauel of the see,
whiche is with oute mesure, and shal
not be noumbrid; and it schal be in
place, where it schal be seid to hem, Not
my peple &yogh;e; it schal be seid to hem,
Sones of God lyuynge.
11 And sones of
Juda and sones of Yrael shuln be gedrid
to gydre, and thei shuln putte to
hem self oon hed, and shuln stie vp fro
the lond, for grete is the day of Jesrael.
CAP. II.
1 Saye &yogh;e to &yogh;our bretheren, My peple;
and to &yogh;our sister, Wynnynge mercy;
deme &yogh;e &yogh;our modir,
2 deme &yogh;e, for she is
not my wijf, and Y not hir husbond. Do
she aweye hir fornicaciouns fro hir face,
and hir auowtries fro the mydil of her
tetis;
3 lest perauenture Y vnclothe hir
nakid, and sette hir vp the day of hir
birthe. And Y shal putte hir as a wildrenesse,
and ordeyne hir as a lond vnweyed,
or with outen weye, and shal
slea hir with thrist.
4 And of the sones
of hir Y shal not haue mercy, for thei
ben sonys of fornycacioun;
5 for the modir
of hem dide fornycacioun, she is confusid
that conceyuyde hem, for she saide,
Y shal go after my louers that &yogh;iuen
my looues to me, and my waters, and my
wolle, and my lynnen, and myn oyle, and
my drinke.
6 For this thing lo! Y shal
hegge thi weye with thornys, and I shal
hegge it with a walle, and it shal not
fynde his pathis.
7 And she shal sue hir
louers, and shal not cacche hem, and shal
seke hem, and shal not fynde hem; and
she shal saye, Y shal go, and Y shal
turne a&yogh;ein to my former husbond, for
wele it was to me thanne more than now.
-- --
8 And this womman wiste not, for Y &yogh;aue
to hir wheet, wijne, and oyle; and multiplied
to hir syluer and gold, whiche
thei maden to Baal.
9 Therfore Y shal
turne, and shal take my wheet in hys
tyme, and my wijn in his tyme; and I
shal wei&yogh;e my wolle, and my lynnen,
whiche hiliden the yuel fame of hir.
10 And
now Y shal shewe the folye of hir in the
ee&yogh;en of hir louers, and a man shal not
delyuere hir fro myn hond;
11 and I shal
make alle the ioye of hir for to ceese, hir
solempnyte, hir neomynye, or new feest,
hir saboth, and alle feestis and tymys of
hir.
12 And I shal corrumpe, or distruye,
hir vyne &yogh;erd, and hir fijge tree, of which
she saide, These ben my hijris, whiche
my louers &yogh;auen to me; and Y shal putte
hir in to wijlde wode, and the beest of
the feeld shal eet hir.
13 And I shal visite
vpon hir the days of Baalym, in whiche
she brent ensence, and was ourned with
hir ere ring, and hir broche, and wente
aftir hir louers, and for&yogh;ate me, saith the
Lord.
14 For this thing loo! Y shal &yogh;eue
mylk to hir, and shal lede hir in to wildernesse,
and Y shal speke to hir herte;
15 and shal &yogh;eue to hir vijne tyliers of the
same place, and the valey of Achor, for
to opyn hope. And she shal synge there vp
the days of hir &yogh;outhe, and vp the days
of hir steying vp fro the lond of Egypt.
16 And it shal be in that day, saith the
Lord, she shal clepe me Myn husbond,
and she shal namore clepe me Baalym;
17 and Y shal take aweye the names of Balym
fro hir mouthe, and she shal namore
haue mynde of the name of hem.
18 And Y
shal smyte to hem a boond of pees in
that day with beest of the feeld, and with
brid of heuen, and with creepynge beest
of erthe. And Y shal breke to gydre bowe,
and swerd, and batel of the erthe; and
Y shal make hem for to sleepe tristili.
19 And I shal spouse thee to me in to with
outen eende, and Y shal spouse thee to
-- --
me in ri&yogh;twijsnesse, and in dome, and in
mercy, and in doyngis of mercy.
20 And
Y shal spouse thee to me in feith; and
thou shalt wite, for Y the Lord.
21 And
it shal be, in that day Y shal heere, saith
the Lord, and I shal heere heuens, and
thei shuln heere the erthe;
22 and the erthe
shal heere wheete, and wijn, and oyle, and
these shuln heere Jesrael.
23 And Y shal
sowe hir to me in to lond, and Y shal
haue mercy on hir that was with out
mercy.
24 And Y shal saye to not my peple,
Thou art my peple, and he shal saye,
Thou art my God.
CAP. III.
1 And the Lord saide to me, &YOGH;it go thou,
and loue thou a womman loued of a frend,
and auoutresse, as the Lord loueth the
sonys of Yrael; and thei byholden to
alyen goddis, and louen the darstis of
grapis, that leueth in hem aftir pressyng.
2 And Y dalf hir to me with fifteen platis
of siluer, and with a chorus of barly,
whiche is a mesure of thritti busshels,
and with an half chorus of barly.
3 And
Y saide to hir, Manye days thou shalt
abyde me; thou shalt not do fornycacioun,
and thou shalt not be to husbond, bot
and Y shal abijde thee.
4 For manye
days the sonys of Yrael shuln sitte with
out kyng, with out prince, with out sacrifice,
and with out auter, and with out
ephot, or prestis clothing, and with out
teraphyn.
5 And after these thingis sonys
of Yrael shuln turne a&yogh;ein, and shuln
seke the Lord her God, and Dauith, her
kyng; and thei shuln dreede to the Lord,
and to the good of hym, in the last of
days.
CAP. IV.
1 Heere &yogh;e, sonys of Yrael, the word of
the Lord, for dome to the Lord with
dwellers of erthe; forsothe trewthe is not
-- --
and mercy is not, and science, or kunnynge,
of the Lord is not in erthe.
2 Cursidness,
and lesyng, and mansleaynge, and theft,
and auoutrie flowiden, and bloode touchide
bloode.
3 For this thing erthe shal mourne,
and eche man that dwellith theryn shal be
seeke, in beest of the feeld, and in brid of
heuen; bot and fishis of the se shuln be
gadrid.
4 Nethelese eche man deeme not,
and be not a man reproued; forsothe thi
peple as these that a&yogh;ein sayen the prest.
5 And thou shalt falle to day, and also the
prophete shal falle to gydre with thee;
in ny&yogh;t Y made thi modir for to be
stille.
6 And my peple was to gydre stille,
for it hadde not science; for thou hast
putte awey science, Y shal putte thee
awey, that thou be not set, or vse, in
presthode to me; thou hast for&yogh;ete the
lawe of thi God, and Y shal forgete thi
sonys.
7 Vp the multitude of hem, so thei
synnyden to me. Y shal chaunge the
glorie of hem in to yuel fame.
8 Thei
shuln ete the synnys of my peple, and to
the wickidnesse of hem thei shuln reyse
vp the soulis of hem.
9 And it shal be,
as the peple so the prest; and I shal
visite on hym the weyes of hym, and I
shal &yogh;elde to hym his thou&yogh;tis.
10 And thei
shuln ete, and shuln not be fulfillid; thei
diden fornycacioun, and cesiden not, for
thei forsoken the Lord in not kepynge.
11 Fornicacioun, and wijn, and drunkenesse
doth awey herte.
12 My peple axide in his
tree, and the staff of hym shal shewe to
hym; forsothe the spirit of fornicaciouns
disceyuyde hem, and thei diden fornicacioun
fro her God.
13 On hedis of hillis
thei maden sacrifice, and on litil hillis
thei brenneden tymyame, or encense, vnder
ook, and poplere, and terebynt, for
the shadew of it was good. Therfore &yogh;our
dou&yogh;ters shuln do fornicacioun, and &yogh;our
spousis, or wijfis, shuln be auoutressis.
14 Y shal not visite on &yogh;our dou&yogh;ters, whan
thei shuln do fornicacioun, and on &yogh;oure
-- --
wijues, whanne thei shuln do auowtrie;
for thei lyueden with hooris, and sacrifieden
with men turned in to wommans
maners. And peple not vndirstondynge
shal be beten.
15 &YOGH;if thou, Yrael, dost fornycacioun,
namely thou, Juda, trespasse
not; and nyl &yogh;e entre in to Galgala, and
stye &yogh;e not in to Bethauen, nether swere
&yogh;e, The Lord lyueth.
16 For as a cowe
waxinge wijlde Yrael bowide awey; now
the Lord shal feede hem as a lombe
in breed.
17 Parcener of ydolis Effraym,
leue &yogh;e hym;
18 the feest of hem is departid.
In fornicacioun thei diden fornicacioun,
the defenders of hem loueden
for to brynge to yuel fame.
19 A spirit
boonde hym in his weengis, and thei
shuln be confoundid of her sacrifices.
CAP. V.
1 Heere &yogh;e, prestis, these thingis, and
perceyue &yogh;e, hous of Yrael, and herken
&yogh;e, hous of the kyng; for with &yogh;ou is
dome, for &yogh;e ben maad a graue to byholdyng,
and as a nette sprad abrood on Thabor.
2 And &yogh;e bowiden doun slayn sacrifice
for victorie in to depnesse; and Y the
lerner of hem alle.
3 Y wote Effraym, and
Yrael is not hid fro me; for now Effraym
dide fornicacioun, Yrael is defoulid.
4 Thei
shul not &yogh;eue her thou&yogh;tis, that thei turne
a&yogh;ein to her God; for the spirit of fornicacioun
in the mydil of hem, and thei
knewen not the Lord.
5 And the pryde of
Yrael shal answere in to his face, and
Yrael and Effraym shuln falle to gydre
in her wikkidnesse; also Juda shall falle
with hem.
6 In her flockis, and in her
droues thei shuln go for to seke the
Lord, and shuln not fynde; he is taken
awey fro hem.
7 In the Lord thei trespassiden,
for thei gendriden alien sonys;
now the monethe with her partis shal
deuoure hem.
8 Sowne &yogh;e with an horn in
Gabaa, with trumpe in Rama; woule &yogh;e
in Bethauen, aftir thi bac, Beniamyn.
9 Effraym shal be in to desolacioun, in the
day of correctioun, and in lynagis of
-- --
Yrael Y shewide feith.
10 The princis of
Juda ben maad as takynge to the termes
on hem; Y shal shede out as water my
wrath.
11 Effraym is suffrynge fals chalenge,
he broken in dome; for he byganne
for to go after filthis.
12 And Y as
a mou&yogh;the to Effraym, and as rot to the
hous of Juda.
13 And Effraym saw&yogh; his
seekenesse, and Juda his boond. And
Effraym wente to Assur, and sente to
the kyng veniour. And he shal not mowe
saue &yogh;ou, nether shal mowe vnbynde the
boond fro &yogh;ou.
14 For Y as a lyonesse to
Effraym, and as a whelp of lyoun to the
hous of Juda. Y, Y shal take, and shal
go, and shal take awey, and ther is not
whiche shal delyuere.
15 Y goynge shal
turne a&yogh;ein to my place, til &yogh;e fayle, and
seeke my face.
CAP. VI.
1 In her tribulacioun erly thei shuln
ryse to gyder to me. Cum &yogh;e, and turne
we a&yogh;ein to the Lord;
2 for he toke, or
bigan, and shal hele us; he shal smyte,
and shal cure us.
3 He shal quycken us
aftir two days, in the thrydde day he
shal reyse vs, and we shuln lyue in the
si&yogh;t of hym. We shuln wite, and sue, that
we knewe the Lord. As the spryng of day
his out goyng is maad redy, and he shal
cum as rayne tymely to vs, and late to
erthe.
4 What shal Y do to thee, Effraym?
what shal Y do to thee, Juda? &YOGH;our mercy
as a morew cloude, and as dewe erly passynge
forth.
5 For this thing Y haue hewun
in prophetis, and slayn hem in wordis of
my mouthe; and thi domys shuln go out
as li&yogh;t.
6 For Y wolde mercy, and not sacrifice,
and science of God, more than
brente sacrifices.
7 Forsothe thei as Adam
braken my couenaunt; there thei trespassiden
in me.
8 Galaad the cite of men
wirchynge ydol, supplauntid by blood;
and as cheekis of men theeues.
9 Parcener
of prestis in the waye of men sleaynge
-- --
men goynge of Sychem, for thei wrou&yogh;ten
grete trespas.
10 In the hous of Yrael Y
saw an orrible thing; there the fornycaciouns
of Effraym.
CAP. VII.
11 Israel is defoulid; bot and thou, Juda,
putte to thee rijp corn, whanne Y shal
turne to gydre the caitiftee of my peple.
1 Whanne Y wolde hele Yrael, the wickidnesse
of Effraym is shewid, and the malice
of Samarie, for thei wrou&yogh;ten lesyng.
And a ny&yogh;t theef wente in robbynge; a
litil day theef with out forth.
2 And lest
perauenture thei sayen in her hertis, me
hauynge mynde on al the malice of hem,
now her fyndyngis han gon about hem,
thei ben maad byfore my face.
3 In her
malice thei gladden the kyng, and in
her lesyngus the princis.
4 Alle doynge
auoutrie, as fourneice kyndlid of a man
seethinge. The citee restide a litil in
mengyng to gydre of soure dowe, til it
were sourdowid all.
5 The day of oure
kyng; princis bygunnen for to wexe wode
of wijn; he strei&yogh;te out his hond with
scorners.
6 For thei applieden as a fourneys
her herte, whanne he aspiede, or
sette, tresoun to hem. Al ni&yogh;t he slepte
seethinge hem, erly he set on fijr, as fijr
of flawme.
7 All ben maad hoot as a
fourneice, and deuoureden her domesmen.
All kyngis of hem fellen doun, and
ther is not in hem that shal crie to me.
8 Effraym in peplis he was meynt to
gydre; Effraym is maad a loof baken
vndir ashis, whiche is not turned a&yogh;ein.
9 Aliens eeten the strengthe of hym, and
he wist not; bot and whijt heeris ben
shed out in hym, and he knewe not.
10 And the pride of Yrael shal be mekid
in the face of hym; nether thei ben turned
a&yogh;ein to the Lord her God, and thei
sou&yogh;ten not hym in alle theese thingus.
11 And Effraym is maad as a culuer disceyued,
not hauynge herte. Thei inclepiden
-- --
Egypt, to Assiriens thei wenten.
12 And whanne thei shuln go, Y shal sprede
abrode on hem my nett, as a brid of
heuen Y shal drawe hem doun. Y shal
bete hem, vp the heeryng of the cumpanye
of hem.
13 Wo to hem, for thei
wenten awei fro me; thei shuln be
waastid, for thei trespassiden in me. Y
a&yogh;ein bou&yogh;te hem, and thei spaken a&yogh;einus
me lesyng.
14 And thei crieden not to me
in her herte, bot thei wouliden in her
couchis. Thei chewiden cud vpon whete,
and wijne, and departiden fro me.
15 And
I lernyde hem, and coumfortide the armys
of hem, and in me thei thou&yogh;ten
malice.
16 Thei turneden a&yogh;ein, that thei
shulden be with out &yogh;oc; thei ben maad
as a gylful bowe. The princis of hem
shuln falle in swerd, of the wodenesse of
her tunge; this the mowyng, or scornyng,
of hem in the lond of Egypt.
CAP. VIII.
1 In thi throte be a trumpe, as an egle
on the hous of the Lord; for that that
thei braken my bond of pees, and thei
trespassiden, or braken, my lawe.
2 Thei
inclepiden me, My God, we Yrael knewen
thee.
3 Yrael castide awey good thing, an
enemy shal pursue hym.
4 Thei regneden,
and not of me; thei weren princis,
and I knewe not. Thei maden her syluer
and gold and her ydolis to hem, that thei
shulden perishe.
5 Samarie, thi calf is cast
awey; my woodnesse is wrothe in hem.
6 Hou long mi&yogh;ten thei not be clensid? for
of Yrael and he is. A craftise man made
hym, and he is not god; for the calf of
Samarie shal be into webbis of yreinus.
7 For thei shuln sowe wynd, and repe
whirlwynd. A stondynge stalk is not in
hem, the buriownyng shal not make
mele; that and &yogh;if it shal make, aliens
shuln ete it.
8 Yrael is deuoured; now he
is maad in naciouns, as an vnclene vessel,
for thei stieden to Assur.
9 Effraym a solitarie
feeld asse to hym self. Thei &yogh;auen
&yogh;iftis to her louers;
10 bot and with meed
thei hijriden naciouns. Now Y shal gedre
-- --
hem, and thei shuln reste a litil of charge
of the kyng and princis.
11 For Effraym
multipliede autris for to synne, autris
ben maad to hym in to trespasse.
12 Y
shal write to hym my manyfolde lawis,
whiche ben acomptid as alyen.
13 Thei
shulen brenge to oostis, and shuln offre
fleshis, and shuln ete; and the Lord shal
not resceyue hem. Now he shal recorde
the wickidnesse of hem, and shal visite
the synnes of hem; thei shuln be turnyd
in to Egypt.
14 And Yrael for&yogh;ate his
maker, and beeldide templis, and Judas
multipliede stronge citees; and Y shal
sende fijr in to the citees of him, and it
shal deuoure the housis of hym.
CAP. IX.
1 Yrael, nyl thou glade, nyl thou ioye
with outforth as peplis; for thou hast do
fornicacioun fro thi God. Thou louedist
hijris on alle feeldis of whete.
2 Feeld
and pressour shal not feede hem, and
wijne shal lye to hem.
3 Thei shuln not
dwelle in the lond of the Lord. Effraym
turnyde a&yogh;ein in to Egypt, and in Assiriens
eete defoulid thing.
4 Thei shuln
not sacrifice wijn to the Lord, and thei
shuln not plese to hym. The sacrifices of
hem as breede of mournynge men; alle
that eten it shuln be defoulid. For the
breed of hem, of the soule of hem, shal
not entre in to the hous of the Lord.
5 What shuln &yogh;e do in the solempne day,
in day of the fest of the Lord?
6 Loo!
sothely thei ben gon fro wastnesse.
Egypt shal gedere hem, Memphis shal
birie hem. A nettil shal enherit the desirable
syluer of hem, a cloote in the
tabernaclis of hem.
7 Days of visityng
camen, days of &yogh;eldyng camen. Yrael,
wite thou thee a fool, a wood prophete,
a spirituel man, for the multitude of thi
wickidnesse, and multitude of madnesse.
8 A spier of Effraym with my God; the
prophete is maad a gnare of fallynge, on
alle the wayes of hym, wodenesse in the
-- --
hous of his God.
9 Thei synneden depely,
as in days of Gabaa. He shal recorde her
wickidnesse, and shal visite the synnys
of hem.
10 Y foonde Yrael as grapes in desert,
as the first applis of a litil fyge tree.
In the hee&yogh;t therof Y see&yogh; the faders of
hem; forsothe thei entriden to Belphagor,
and ben alienyd aweye in to confusioun,
and ben maad abomynable as tho thingus
that thei loueden.
11 Effraym as a brid
flee&yogh; awey; the glorie of hem of chijld
beryng, and of wombe, and of conceyuynge.
12 That and &yogh;if thei shuln nurishe
out her sonys, Y shal make hem with
out free childre in men. Bot and wo to
hem, whanne I shal go awey fro hem.
13 Effraym, as I sy&yogh; Tyrus, was foundid in
fairnesse; Effraym schal leede out his
sones to the slear.
14 Lord, &yogh;yue thou to
hem; what schalt thou &yogh;yue to hem? &yogh;eue
thou to hem a &yogh;ate of wombe with oute
free children, and drie tetis.
15 Al wickidnesse
of hem in Galgal, for there Y hadde
hem hateful; for the malice of her wickidnesse
Y shal caste hem out of myn hous.
Y shal not putte to, that Y loue hem.
16 Alle princis of hem goynge awey; Effraym
is smyten, the root of hem is dried
vp; thei shuln not make fruyte. That and
&yogh;if thei shuln gendre, Y shal slea the
most loued thingus of the wombe of hem.
17 The Lord my God shal caste hem awey,
for thei herden not hym; and thei shuln
be wagringe in naciouns.
CAP. X.
1 Yrael a vijne ful of bowis, fruyte is
maad euen to hym; vp the multitude of
his fruyte he multipliede auters, vp the
plente of his lond he was plenteous in
symulacris, or fals goddis.
2 The herte of
hem is departid, now thei shuln perishe.
He shal breke to gydre the symulacris of
hem, he shal spuyle the auters of hem.
3 For now thei shuln saye, Kyng is not
`to vs, forsothe we dreeden not God. And
-- --
what shal a kyng do to vs?
4 Speke &yogh;e
wordis of vnprofitable visioun, and &yogh;e
shuln make a couenaunt with lesyng; and
dome shal buriowne as bitternesse on forowis
of the feeld.
5 The dwellers of Samarie
wirshipen the kijn of Bethauen.
For the peple therof mournyde vpon hym,
and kepers of the hous of hym ioyeden
with outforth in glorie of hym, for it
passide fro hym.
6 Forsothe and he is
born in to Assur, a &yogh;ift to the king
venier. Confusioun shal take Effraym, and
Yrael shal be confoundid in his will.
7 Samarie
made his king for to passe, as
frooth on the face of water.
8 And the
hee&yogh; thingis of ydol, the synne of Yrael,
shulen be distruyed. Cloote and breere
shal stye on the auters of hem. And thei
shuln seye to mounteyns, Hille &yogh;e vs, and
to smale hillis, Falle &yogh;e vpon vs.
9 Of the
days of Gabaa Yrael synnyde; there thei
stoden. Bateyl shal not cotche hem in Gabaa,
on the sonys of wickidnesse.
10 Vp
my desijre Y shal chastise hem; puplis
shuln be gadrid on hem, whanne thei
shuln be chastisid for her two wickidnessis.
11 Effraym a cow calf, tau&yogh;t for to
loue thresshyng; and Y passide on the
fairnesse of hir neck. Y shal stye vp on
Effraym. Judas shal ere, Jacob shal breke
to gydre to hym forowis.
12 Sowe &yogh;e to &yogh;ow
in ri&yogh;twijsnesse, and repe &yogh;e in the mouth
of mercy, and make newe to &yogh;ou a newe
feeld. Tyme sothely for to a&yogh;ein seeke the
Lord, whanne he shal cum, that shal
teche &yogh;ou ri&yogh;twijsnesse.
13 &YOGH;e han sowe vnpite,
&yogh;e repiden wickidnesse, &yogh;e eeten the
fruyte of lesyng. For thou tristidist in thi
wayes, and in multitude of thi stronge
men.
14 Noyse shal ryse to gydre in thi
peple, and alle thi strengthus shuln be
distruyed; as Salmana is distruyed of the
hous of hym, that veniede Baal; in the
day of bateyle, the modir hurtlid on
sones.
15 So Bethel shal do to &yogh;ou, fro the
face of malice of &yogh;our wickidnessis.
-- --
CAP. XI.
1 As the morewnyng passith, the kyng
of Yrael passith byfore Yrael a chijld,
and Y louede hym; and of Egypt Y
clepide my sone.
2 Thei clepiden hem, so
thei wenten awey fro the face of hem.
Thei offreden to Baalym, and maden sacrifice
to symulacris.
3 And Y as a nurishe
of Effraym bare hem in myn armys, and
thei wisten not, that Y helide hem.
4 In
litil boondis of Adam Y shal drawe hem,
in boondis of charitee. And Y shal be to
hem as reysynge &yogh;oc on the cheekis of
hem; and Y bowide doun to hym, that he
shulde ete.
5 He shal not turne a&yogh;ein in
to the lond of Egypt. And Assur the
kyng therof, for thei wolden not be conuertid.
6 Swerd toke, or bigan, in the
citees therof, and schal waaste the chosun
therof, and schal ete the heedis of hem.
7 And my peple schal hange, at my comynge
a&yogh;ein. Forsoth a &yogh;ok shal be putte
vpon hem to gydre, whiche shal not be
don awey.
8 Hou shal Y &yogh;eue thee, Effraym?
shal Y hille, or defende, thee,
Yrael? hou shal Y &yogh;eue thee as Adama?
shal Y putte thee as Seboym? Myn hert
is conuertid in me; my forthinkyng is
trublid to gidre.
9 Y shal not do the woodnesse
of my wrath. Y shal not be conuertid,
that Y distruye Effraym; for Y
God, and not man; holy in the mydil of
thee, and Y shal not entre in to cytee.
10 After the Lord thei shuln go. As a lyoun
he schal roore, for he schal roore, and
sones of the see schulen drede.
11 And `thei
shuln flee awey as a brid fro Egypt, and
as culuer of the lond of Assiriens. And
Y shal to gydre sette hem in her housis,
saith the Lord.
CAP. XII.
12 Effraym disceyuede me in marchaundise,
and in ydol of the hous of Yrael.
Forsothe Judas witnes wente doun with
God, and with feithful saintis.
1 Effraym
-- --
feedith the wijnd, and sueth heete. Al day
he multiplieth lesyng, and distruccioun;
and made pees with Assiriens, and bare
oyle in to Egypt.
2 Therfore the dome of
the Lord with Juda, and visitacioun on
Jacob; vp the wayes, and vp the fyndyngus
of hym he shal &yogh;eelde to hym.
3 In the wombe he supplauntide, or disceyuyde,
his brother, and in his strengthe
he was dressid with an aungel.
4 And he
hadde victorie at the aungel, and he was
coumfortid; he wepte, and preiede hym;
in Bethel he fonde hym, and there he
spac with &yogh;ou.
5 And the Lord God of
oostis, the Lord, memorial of hym.
6 And
thou shalt be conuertid to the Lord thi
God. Keepe thou mercy and dome, and
hoope thou euermore in thy God.
7 Canaan,
in his hond a gyleful balaunce,
louede fals chalenge.
8 And Effraym saide,
Netheles Y am maad riche, Y fonde an
ydol to me; alle my trauailis shuln not
fynde to me wickidnesse, whiche Y synnyde.
9 And Y the Lord thi God, whiche
ledde thee out of the lond of Egypt; &yogh;it
Y shal make thee for to sytte in tabernaclis,
as in days of feest.
10 And Y spac
on prophetis, and Y multipliede visioun,
and in the hond of prophetis Y am
lickenyd.
11 &YOGH;if in Galaad an ydol, therfore
veynly they weren in Galgal offrynge
to oxis; forwhi and the auters of
hem as hepis on forowis of the feeld.
12 Jacob flei&yogh; into the cuntrie of Sirie, and
Irael seruyde into wyf, and seruyde into
wyf.
13 Forsothe in a prophete the Lord
ledde out Yrael of Egypt, and in a prophete
he is kepte.
14 Effraym terride me to
wrath in his bitternessis, and his blood
shal cum on hym; and the Lord his God
shal restoren hym his shenship.
CAP. XIII.
1 Effraym spekynge, errour assailide
Yrael; and he trespasside in Baal, and
is dead.
2 And now thei puttiden to for
-- --
to synne, and maden to hem a &yogh;oten
thing of her syluer, as the licknesse of
ydols; the makyng of crafty men it is
al. To these thei sayen, Offre, &yogh;e men, wirshippynge
calues.
3 Therfore thei shuln
be as a morewe clowde, or myst, and as
morewe dewe passynge, as dust rauyshid
with whirlwynd of the feeld, and as
smoke of the chymney.
4 Forsothe Y the
Lord thi God, of the lond of Egypt; and
thou shalt not knowe God, with outen
me, and saueour is not, out take me.
5 Y
knewe thee in desert, in the lond of wildernesse.
6 Bysidis her lesewis and thei
ben fulfillid, and ful crammyd; thei lyftiden
vp her herte, and for&yogh;aten me.
7 And
Y shal be to hem as a lyounesse, and as
a paard in the waye of Assyriens.
8 Y
shal renne to hem as a she bere, the
whelpis rauyshid; and Y shal breke the
ynner thingis of her mawe, and Y shal
waastye hem there as a lyoun. A beest
of the feeld shal kitte hem.
9 Thi losse,
Yrael; oonly of me thin help.
10 Wher is
thi kyng? most now saue he thee in alle
thi citees; and thi domysmen, of whom
thou saidist, &YOGH;eue thou to me a kyng, and
princis?
11 And Y shal &yogh;eue to thee a kyng
in my wodenesse, and Y shal take awey
in myn indignacioun.
12 The wickidnesse
of Effraym is bounden to gidre; the synne
of hym hydde.
13 Sorewis of a womman
berynge chijld shuln cume to hym; he
is a sone not wijse. Now forsothe he shal
not stonde in contricioun of sonys. |
