Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. VII.
1 In the first &yogh;eer of Balthasar, kyng of
Babyloyne, Danyel saw&yogh; a sweuen. Forsothe
the visioun of his hed in his couche,
and sweuen, he wrytynge comprehendide
in short word; and in sum, or litil wordis,
-- --
touchynge saith,
2 Y saw&yogh; in my visioun
by ni&yogh;t, and loo! foure wyndis of heuen
fou&yogh;ten in the mydil see.
3 And foure
greet beestis stieden vp of the se, dyuerse
bytwixe hem self.
4 The first as a lyonesse,
and hadde weengis of an egle. Y
byheelde til hir weengis weren drawen
of, and she is taken vp of the erthe, and
she stode on the feet as a man, and the
herte of it is &yogh;ouen to it.
5 And loo! an
other beest, lijc to a bere in party, stode,
and three ordris weren in mouth therof,
and in teeth therof three princis. And
thus thei saiden to it, Ryse thou, ete ful
manye fleshis.
6 After these thingus Y byheelde,
and loo! an other as a pard, and
hadde vp on it foure weengis of a bridd
on it, and foure hedis weren in the beest,
and power is &yogh;ouen to it.
7 After these
thingus Y byheelde in a visioun of ni&yogh;t,
and loo! the fourthe beest, dreedful, and
wonderful, and ful stronge. It hadde
greet yren teeth, etynge and brekynge
to gydre, and defoulynge other thingus
with his feet; forsothe it was vnlijc to
other beestis, whiche Y saw&yogh; byfore it,
and it hadde ten hornys.
8 Y biheelde the
hornys, and loo! an other litil horn is
sprungen vp of the mydil of hem, and
three of the first horns ben drawen out
fro the face therof; and loo! ee&yogh;en as
ee&yogh;en of a man weren in this horn, and
a mouth spekynge greet thingus.
9 Y byhelde,
til trones weren sette, and the
olde of days sat; his clothinge white as
snowe, and the heris of his hed as cleen
wolle, his trone of flawme of fijr, the
whelis of hym fijr tendid.
10 A flode of
fijr and fast rennynge wente out fro his
face, a thousand of thousandis mynistriden
to hym, and ten thousand sithis
an hundred thousand stoden ni&yogh; to hym;
the dom sate, and bokis ben opnyd.
11 Y
byheelde for the voice of grete wordis,
whiche the ylk horn spake; and I saw&yogh;,
for the beest was slayn, and the body
therof peryshide, and was bytaken for
-- --
to be brent in fijr.
12 And the power of
other beestus was taken awey, and tymes
of lijf ben ordeynyd to hem, vn to tyme
and tyme.
13 Therfore Y byhelde in visioun
of ni&yogh;t, and loo! with cloudis of heuen as
the sone of man came; and vnto the olde
of days he came fully, and in his si&yogh;t
thei offreden hym.
14 And he &yogh;aue to hym
power, and honour, and rewme, and eche
peple, lynagis, and tungis shuln serue to
hym; the power of hym euerlastinge
power, whiche shal not be don awey,
and the rewme of hym, whiche shal not
be corrupte, or distruyed.
15 My spirit
hidouside; Y, Danyel, was ferd in these,
and the visiouns of my heed to gidre
trubliden me.
16 Y came to oon of the ni&yogh;
stondynge, and Y axide of hym trewthe
of alle these thingus. Whiche saide to
me interpretacioun of wordis, and tau&yogh;te
me.
17 These foure greet beestis ben foure
rewmes, that shuln ryse to gydre of the
erthe.
18 Forsothe thei shuln resceyue the
rewme of God hee&yogh;ist holy, and thei
shuln holde the rewme, til into the world,
and in to world of worldis.
19 After these
thingus Y wolde diligently lerne of the
fourthe beest, that was gretely vnlijc fro
alle, and dreedful ful myche, the teeth
and naylis therof of yren; it eete, and
brake to gydre, and defoulide the tothir
thingus with his feet.
20 And of ten hornes
whiche it hadde in the hed, and of the
tother that was sprungen vp, bifore
whiche three hornes fellen doun, and of
that horne that hadde ee&yogh;en, and mouthe
spekinge grete thingis, and was more
than other; Y byheelde, and loo!
21 the
ylk horn made bataile a&yogh;ein saintis, and
hadde power ouer hem,
22 til the olde of
dais came, and &yogh;aue dome to saintis hi&yogh;e;
and loo! tyme came, and saintis weldiden
rewme.
23 And thus he saith, The fourthe
beest shal be the fourthe rewme in erthe,
that shal be more than alle rewmes, and
shal deuouren al erthe, and shal defoule,
-- --
and to gydre breke it.
24 Forsothe ten
horns of that kyngdam shuln be ten
kyngus; and an other shal rijse after hem,
and he shal be mi&yogh;tier than the former,
and shal meeke three kyngus.
25 And he
shal speke wordis a&yogh;einus the hee&yogh;, and
he shal breke to gidre the saintis of the
hee&yogh;ist; and he shal wene, that he may
chaunge tymes and lawis; and it shal be
&yogh;ouen in to the hondis of hym, vn to
tyme, and tymes, and the half of tyme.
26 And dom shal sitte, that power be taken
awey, and be broken to gydre, and perishe
til into the eende.
27 The rewme
forsothe, and power, and the gretenesse
of rewme, whiche is vndre al heuen, be
&yogh;ouen to the peple of halewis of the
hee&yogh;ist, whose rewme is euerlastinge
rewme, and alle folkis shuln serue to
hym, and obeye.
28 Til hidre the eende of
the word. Y, Danyel, in my thou&yogh;tis was
miche trublid, and my face is chaungid
in me; forsothe Y kepte to gidre the
word in my hert.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
