Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXVIII.
1 And the word of the Lord is maad to
me,
2 seiynge, Sone of man, sey thou to
the prince of Tyre, Thes thingis seith
the Lord God, For that that thin herte
is lift vp, and thou seidist, Y am God,
and Y satte in the chaier of God, in the
herte of the see, whanne thou art man
and not God, and hast &yogh;ouen thin herte
as the herte of God; loo!
3 thou art
wyser than Danyel, eche priue thing is
not hid fro thee;
4 in thi wisdam and
prudence thou madist to thee strength,
and hast wonne to thee gold and siluer
in thi tresours;
5 in multitude of thi wisdam,
and in thi marchaundise thou multepliedist
to thee strength, and thin herte
is lift vp in thi strength;
6 therfor thes
thingis seith the Lord God, For that thin
herte is reisid vp as the herte of God,
therfor loo!
7 Y shal lede to thee aliens,
moost stronge of folkis. And thei shulen
make nakid her swerdis on the fairnes
of thi wisdam, and shulen defoule thi
feyrnes.
8 Thei shulen slee, and drawe
doun thee; and thou shalt die in the
perishynge of slayn men, in the herte
of the se.
9 Whether thou seiynge shalt
speke, Y am God, before men sleynge
thee, whanne thou art man, and not God?
10 In the hoond of men sleynge thee, in
deeth of vncircumcydid men, thou shalt
die in the hoond of aliens; for Y spak,
seith the Lord God.
11 And the word of
the Lord is maad to me, seiynge, Sone
of man, reys weilynge vpon the kyng of
Tyre;
12 and thou shalt sey to him, Thes
thingis seith the Lord God, Thou a signet
of liknes, ful of wisdam, perfijt in
fayrnes,
13 was in delicis of paradise of
God. Eche precious stoon thi keuerynge,
-- --
sardius, topacius, and iaspis, crisolitus,
and onix, and berillus, saphirus, and carbuncle,
and smaragd; and gold the werk
of thi fairnes, and thin hoolis ben maad
redy, in the day in which thou art maad.
14 Thou cherub strei&yogh;t forth, and keuerynge;
and I putte thee in the hooli hil of God.
In the mydil of fijry stoonus thou walkidist,
15 perfijt in thi weies fro the dai of
thi makynge, til wickidnes is foundyn in
thee.
16 In the multitude of thi marchaundise
`thin entrailis ben fulfillid with wickidnesse,
and thou synnedist; and Y keste
thee out of the hil of God, and I lost
thee, thou cherub keuerynge, of the mydil
of firy stoonus.
17 And thin herte is reysid
vp in thi fairnes, thou lostist thi wisdam
in thi fayrenes. Y keste thee doun in to
erthe, Y &yogh;aue thee before the face of
kyngis, that thei shulden see thee.
18 In
multitude of thi wickidnessis, and in
wickidnes of thi marchaundise thou defouledist
thin halewynge; therfor Y shal
brynge forth fier fro the mydil of thee,
which shal ete thee; and Y shal &yogh;yue thee
in to asshe on the erthe, in si&yogh;te of alle
men seynge thee.
19 Alle men that shulen
see thee in folkis, shulen wondre greetli
vpon thee; thou art maad nou&yogh;t, and
thou shalt not be in to with outen ende.
20 And the word of the Lord is maad to
me,
21 seiynge, Sone of man, put thi face
a&yogh;ens Sidon, and thou shalt prophecie of
it;
22 and thou shalt seie, Thes thingis
seith the Lord God, Loo! Y to thee, Sydon,
and Y shal be glorified in the mydyl
of thee; and thei shulen wite, for Y the
Lord, whanne I shal doo in it domys,
and Y shal be halewid in it.
23 And Y shal
sende to it pestilence and blood in the
stretis therof, and men slayn shulen falle
in the mydil therof bi swerd bi cumpas;
and thei shulen wite, for Y the Lord God.
24 And it shal no more be to the hows of
Israel hirtynge of bitternes, and a thorn
brengynge in sorewe on eche side bi
-- --
cumpas of hem that ben aduersaries to
hem; and thei shulen wite, for Y the Lord
God.
25 Thes thingis seith the Lord God,
Whanne I shal gadre the hows of Israel
of puplis, in whiche thei ben scaterid, Y
shal be halewid in hem before folkis.
26 And thei shulen dwelle in her loond,
which Y &yogh;aue to my seruaunt Jacob. And
thei shulen dwelle sikir in it, and shulen
bilde housis, and shulen plaunte viyn
&yogh;erdis, and thei shulen dwelle tristili,
whanne Y shal doo domys in alle men
that ben aduersaries to hem bi cumpas;
and thei shulen wite, for Y the Lord
God of hem.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
