Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XIV.
1 And men of the eldris of Israel camen
to me, and saten before me.
2 And the
word of the Lord is maad to me, seiynge,
Sone of man,
3 thes men han putte her
vnclennes in her hertis, and han sette the
-- --
sclaundre of her wickidnes a&yogh;ens her face.
Whether Y axyd, shal answere to hem?
4 For this thing spek thou to hem, and
thou shalt seie to hem, Thes thingis seith
the Lord God, A man, a man of the hous
of Israel, that hath putte his vnclennes in
his herte, and hath sette the sclaundre of
his wickidnes a&yogh;ens his face, and shal
come to the prophete, axynge bi hym me,
Y the Lord shal answere to hym in the
multitude of his vnclennes;
5 that the hous
of Israel be takyn in her herte, in whiche
thei wenten a wey fro me in alle her
ydolis.
6 Therfor sey thou to the hous of
Israel, Thes thingis seith the Lord God,
Be &yogh;e conuertid, and departe &yogh;e fro &yogh;oure
ydolis, and turne a wei &yogh;oure facis fro
alle &yogh;oure defoulyngis.
7 For a man, a
man of the hous of Israel, and of proselitis,
or men new comen to the lawe of
Jewis, who euer shal be cumlynge, or
gest, in Israel, if he shal be alienyd fro
me, and shal putte his ydolis in his herte,
and shal sette the sclaundre of his wickidnes
a&yogh;ens his face, and shal come to the
prophete, that he axe bi hym me, I the
Lord shal answere to hym bi my silf.
8 And Y shal putte my face vpon that man,
and I shal make hym in to ensaumple,
and in to a prouerbe, and I shal distruye
him fro the mydil of my puple; and &yogh;e
shulen wite, for I the Lord.
9 And whanne
the prophete shal erre, and shal speke a
word, Y the Lord shal disseyue the ilk
prophete; and I shal stretche out myn
hoond on him, and shal doo hym a wey
of the mydil of my puple of Israel.
10 And
thei shulen bere her wickidnes; aftir the
wickidnes of the man axinge, so the
wickidnes of the prophete shal be;
11 that
the hows of Israel erre namore fro me,
nether be defoulid in alle his trespassyngis,
but be to me in to a puple, and
Y be to hym in to a God, the Lord of
oostis seith.
12 And the word of the Lord
is maad to me,
13 seiynge, Sone of man,
-- --
whanne the erthe shal synne a&yogh;ens me,
that it trespassynge trespase, I shal
stretche out myn hoond vpon it, and I
shal togidir trede the &yogh;eerd of breed of
it; and I shal sende in to it hungre, and
I shal slee of it man and werk beest.
14 And if thes three men, Noe, Danyel, and
Job, shulen be in the mydil of it, thei bi
her ri&yogh;twisnes shulen delyuere her soulis,
the Lord God of oostis seith.
15 That and
if I shal lede yn werst beestis vpon the
loond, that I waste it, and it shal be vnwaied,
or wayles, for that there is no
passynge bi it for beestis,
16 and thes thre
men that shulen be in it, the Lord God
seith, Y lyue, for nether thei shulen delyuere
sones, nether dou&yogh;ters, but thei aloon
shulen be delyuered; forsothe the loond
shal be desolat.
17 Or if I shal lede yn a
swerd vpon that loond, and Y shal sey to
the swerd, Passe bi the loond, and I shal
slee man and beest of it,
18 and thes three
men shulen be in the mydil of it, I lyue,
seith the Lord God, thei shulen not delyuere
sones nethir dou&yogh;tris, but thei aloon
shulen be delyuered.
19 And forsothe if Y
shal sende yn vpon that loond pestilence,
and I shal sheede out myn indignacioun
vpon it in blood, that Y doo awei fro it
man and beest,
20 and Noe, Danyel, and
Job, shulen be in the mydil of it, Y lyue,
seith the Lord, for thei shulen not delyuere
sone and dou&yogh;ter, but thei aloon bi
her ri&yogh;twisnes shulen delyuere her soulis.
21 For thes thingis seith the Lord God, That
and if I shal sende in to Jerusalem my
foure werst domys, swerd, and hungre,
and yuel beestis, and pestilence, that Y
slee man and beest of it,
22 and netheles
sauynge of men ledynge out sonys and
dou&yogh;tris shal be laft in it. Loo! thei
shulen goo out to &yogh;ou, and &yogh;e shulen see
the weie of hem, and the fyndyngis of
hem; and &yogh;e schulen be coumfortid on
the yuel which Y haue ledde in to Jerusalem,
in alle thingis whiche I haue
-- --
brou&yogh;te in on it.
23 And thei shulen conforte
&yogh;ou, whanne &yogh;e shulen see the weie
of hem, and the fyndyngis of hem; and
&yogh;e shulen knowe, for not idely Y dide
alle thingis, what euere Y dide in it, seith
the Lord almi&yogh;ti.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
