Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
EZEKIEL.
[Prologue on Ezechiel.]
This profete Ezechiel sei&yogh; in visioun, and rauyschid in spirit, the maieste of almy&yogh;ti
God, and the sete of his trone, acordinge to seynt Joon, the euangelist, of the visioun
that he sei&yogh; in the ile of Pathmos. And this Ezechiel schewide bi symylitude alle
yuelis that weren to comynge on the king, and on the peple of Juda, for priue idolatrie
vsid of the peple, and for contynuaunce of fals wurschiping in hid places.
Here eendith the prologe, and bigynneth the book of Ezechiel.
Her bigynneth the book of Ezechiel, the
prophete.
CAP. I.
1 And it is don, in the thrittithe &yogh;eer,
in the fourthe moneth, in the fyuethe
day of the moneth, when I was in the
mydil of caitifs, bisydis the floode Cobar,
heuens wern openyd, and I see&yogh; visiouns
of God.
2 In the fyuethe of the moneth;
the ylk is the fyueth &yogh;eer of transmygracioun,
or passyng ouer, of Joachym,
kyng of Juda;
3 the word of the Lord is
maad to Ezechiel, sone of Buzi, preste,
in the lond of Caldeis, bisijdis the flode
Cobar; and the hond of the Lord is
maad ther vpon hym.
4 And I see&yogh;, and
loo! a wynde of tempest, or whirlwynde,
cam fro the north, and a grete cloude,
and fyre inwlappynge, and a schynynge
in the cumpas of it; and of the mydil of
-- --
it, that is to saye, of the mydil of fijre,
as a lickenesse of electre, that is, a metal
of gold and syluere, cleerer than gold.
5 And of the mydil of it a lickenesse of
four bestis. And this the byholdynge of
hem, the lickenesse of man in hem.
6 And
four facis to oon, and four pennys to oon.
7 And the feet of hem strei&yogh;t feet, and the
sool of the foot of hem as the sole of a
calues fote, and sparclis, as byholdyng of
whyte metale.
8 And an hond of man
vnder the pennys of hem, in four parties.
And thei hadden faces and pennys
by foure parties;
9 and the pennys of hem,
of an other to the tother weren ioyned.
Thei turneden not a&yogh;ein, when thei wenten,
bot eche wente byfore his face.
10 Forsoth
the lickenesse of the semblaunt of hem; a
face of man and face of a lyoun at the
ri&yogh;thalf of hem foure. Forsoth a face of
an oxe at the left half of hem foure; and
the face of an egle fro aboue of hem
foure.
11 And the faces of hem and pennys
of hem stre&yogh;t out aboue. Two pennys of
eche weren ioyned, and two keuerden
the bodies of hem.
12 And eche of hem
walkide befor his face. Where the feersnesse
of the spirit was, thidir thei wenten,
nether thei turneden a&yogh;ein, whenne thei
walkiden.
13 And the lickenesse of the
bestis, and the biholdynge of hem, as of
brennynge coolis of fijre, and as biholdynge
of laumpis. This was the si&yogh;t diuersly
rennynge in myddil of the bestis, shynyng
of fijre, and of the fijre leyt goynge
forth.
14 And the bestes wenten, and turneden
a&yogh;ein, into lickenessis of leyt shynynge.
15 And when I behelde the bestis,
oo whele apeerid vpon erthe bisijdis the
bestis, hauynge foure faces.
16 And the biholdyng
of wheelis and the werk of hem
as si&yogh;te of the se; and oo lickenesse of
hem foure; and the biholdynge of hem
and werkis, as &yogh;if a wheel be in the mydel
of a wheel.
17 Thei goynge wenten bi
-- --
foure parties of hem, and thei turneden
not a&yogh;ein, whenne thei wenten. To what
place that that was first bowide, and the
othir sueden. Thei turneden not a&yogh;ein,
whenne thei walkiden.
18 And stature was
to the wheelis, and hee&yogh;nesse, and orrible
biholdynge; and al the bodye ful of
ee&yogh;en in cumpas of hem foure.
19 And
whenne the bestis walkiden, and the
whelis to gidir walkiden bisijdis hem.
And whenn the bestis weren lift vp fro
the erthe, and the wheelis weren lyft vp
togidir.
20 Whidir euer the spirit wente,
thidir goynge the spirit, and the wheelis
weren lift vp to gidir suynge hym; forsothe
the spirit of lyf was in the whelis.
21 With the goynge thei wenten, and with
the stondynge thei stoden. And with the
reiside fro the erthe, and the wheelis
weren reysid to gydir suynge hem; for
the spirit of lyf was in the wheelis.
22 And
the lickenesse of the firmament vpon the
hedis of beestis, and as biholdynge of
cristal orrible, and strei&yogh;t forth aboue
vpon the hedis of hem.
23 Forsothe vndir
the firmament the pennis of hem strei&yogh;t,
of the tother to the tother; eche hilide
his bodye with two weengus, and the
tother also was hilide.
24 And I herde
the soun of weengus, as the soun of many
watris, as the soun of hee&yogh; God. When
thei walkiden, there was as the sowne
of multitude, as the soun of castels, or
oostis of men; and when thei stoden, the
pennys of hem weren leide doun.
25 For
whi whenne a vois was maad vpon the
firmament, whiche was vpon the hedis of
hem, thei stoden, and senten doun her
weingis.
26 And vpon the firmament that
was nei&yogh;inge to the hede of hem, as the
biholdynge of a saphire stoone, a lickenesse
of trone; and vpon liknes of the
trone the liknes, as biholdynge of man
fro aboue.
27 And I see&yogh; as the liknes of
electre, as the biholdynge of fier withinforth,
-- --
bi the compas of it; fro the leendis
of hym and aboue, and fro the leendis
of him and bynethe Y see&yogh; as the liknes
of fier shynynge in the cumpas,
28 as the
biholdynge of a bowe, whanne it shal be
in the cloude in the dai of rayn. This
was the biholdynge of shinynge bi compas.
CAP. II.
1 This si&yogh;t of liknes of glorie of the
Lord. And Y see&yogh;, and fel in to my face;
and Y herde a vois of the spekynge. And
he seide to me, Sone of man, stoond vpon
thi feet, and Y shal speke with thee.
2 And a spirit entride in to me, after that
he spak to me, and sette me vpon my
feet. And Y herde the spekynge to me,
and seiynge,
3 Sone of man, Y sende thee
to the sones of Israel, to folkis apostataas,
that han broken her religioun or lawe,
whiche wenten awei fro me; the fadris
of hem braken my couenaunt vn to this
day.
4 And the sones ben of hard face,
and of herte vnchaastisable, that wole not
be maad tame or meke, to whom I sende
thee.
5 And thou shalt seye to hem, Thes
thingis seith the Lord God; if perauenture
ether thei heren, and if perauenture
thei resten, for it is an hows stirynge to
wraththe. And thei shulen wite, for a
prophete shal be in the mydil of hem.
6 Therfor thou, sone of man, drede not
hem, ne drede thou the wordis of hem;
for vnbileueful men and distruyers ben
with thee, and thou dwellist with scorpiouns.
Drede thou not the wordis of
hem, ne drede the semblaunte of hem,
for it is an hous styrynge to wraththe.
7 Therfor thou shalt speke my wordis to
hem, if perauenture thei heren, and resten,
for thei ben wraththers.
8 Forsothe thou,
sone of man, here what euer thingis I
shal speke to thee; and nyl thou be
styrynge to wraththe, as the hous of Israel
is wraththeres. Opyn thi mouth,
-- --
and eet what euer thingis Y &yogh;eue to thee.
9 And I saw&yogh;, and loo! an hoond was sent
to me, in whom was a boke foldyn. And
he leide it abrood before me, the which
was writen withinforth and withoutforth.
And lamentaciouns, and dite, or soong,
and woo, was writen in it.
CAP. III.
1 And he seide to me, Sone of man, eet
what euer thing thou shalt fynde, eet
this volym, or boke; and thou goynge
spek to the sones of Israel.
2 And Y openede
my mouth, and he fedde me with the
ilk volym.
3 And he seide to me, Sone of
man, thi wombe shal ete, and thin entrailis
shulen be fulfillid with this volym,
which Y &yogh;yue to thee. And Y ete it, and
it is maad in my mouth as swete hony.
4 And he seide to me, Sone of man, go
thou to the hows of Israel, and thou
shalt speke my wordis to hem.
5 Forsothe
thou shalt not be sent to a puple
of deep word, and of vnknowyn tunge;
to the hows of Israel,
6 nether to manye
puplis of deep word, and of vnknowyn
tunge, of whom thou mayst not here the
wordis. And if thou shuldis be sent to
hem, thei shulden here thee.
7 Forsothe
the hows of Israel wole not here thee,
for thei wole not here me. Forsothe al
the hows of Israel is of defoulid, or vnshamfast,
forhed, and hard herte.
8 Loo!
I haue &yogh;ouen thi face my&yogh;tier than the
face of hem, and thi forheed harder than
the forheed of hem.
9 And Y &yogh;aue thi
face as an adamaunt, and as a flynt;
drede thou not hem, nether drede thou
the face of hem, for it is an hows styrynge
to wraththe.
10 And he seide to me,
Sone of man, tak to in thin herte, and
with thin erys here alle thes my wordis,
whiche I speke to thee.
11 And go, entre
to the passynge ouere, to the sones of thi
puple. And thou shalt speke to hem, and
-- --
thou shalt seie to hem, Thes thingis
seith the Lord God, if perauenture thei
heren, and resten.
12 And the spirit took
me to, and Y herde after me a nois of
greet mouynge togider, the blessid glorie
of the Lord fro his place,
13 and the vois
of weengis of beestis smytynge another
to the tother, and the vois of wheelis
suynge the beestis, and the vois of greet
mouynge togidir.
14 And the spirit reiside
me, and took me to. And Y wente awey
in bitter indignacioun of my spirit; forsothe
the hoond of the Lord was with
me, coumfortynge me.
15 And Y cam to
the transmygracioun, or passinge ouer,
to the heep of newe fruytis, to hem that
dwellen bisidis the flood Cobar. And I
sat where thei saten, and I dwellide
there seuene days, mournynge, in the
mydil of hem.
16 Forsothe whanne seuene
days hadden passid, the word of the
Lord is maad to me,
17 seiynge, Sone of
man, I haue &yogh;ouen thee a biholder, or a
spier, to the hows of Israel. And thou
shalt here of my mouth a word, and
thou shalt telle it to hem of me.
18 If me
seiynge to the vnpitous man, Bi deeth
thou shalt die, thou shalt not telle to
hym, nether speke to hym, that he be
turned fro his vnpitous weie, and lyue;
the ilk vnpitous shal die in his wickidnes,
forsothe I shal a&yogh;en seke the blood
of hym of thin hoond.
19 Forsothe if thou
shalt shewe to the vnpitous man, and he
shal not be conuertid fro his vnpitousnes,
and fro his wickid weie; sotheli he shal
die in his wickidnes, but thou hast delyuerede
thi soule.
20 But and if the ri&yogh;twijs
man shal be conuertid fro his ri&yogh;twisnes,
and shal doo wickidnes, Y shal
putte an hirtynge before hym; he shal
die, for thou shewedist not to hym; he
shal die in his synne, and the ri&yogh;twisnessis,
whiche he dide, shulen not be in
mynde, sotheli Y shal a&yogh;en seche his
-- --
blood of thin hond.
21 Forsothe if thou
shalt telle to the iust man, that the iust
man synne not, and he shal not synne,
he lyuynge shal lyue, for thou tooldist
to hym, and thou hast delyuerede thi
soule.
22 And the hoond of the Lord is
maad vpon me, and he seide to me, Thou
risynge go out in to the feeld, and there
I shal speke with thee.
23 And I risynge
wente out in to the feeld. And loo! the
glorie of the Lord stoode there, as the
glorie which Y see&yogh; besidis the flood of
Cobar; and I felle in to my face.
24 And
the spirit entride in to me, and sette me
vpon my feet. And he spak to me, and
seide to me, Entre, and be thou closid
in the mydil of thin hows.
25 And thou,
sone of man, loo! boondis ben &yogh;ouen vpon
thee, and thei shulen bynde thee in
hem, and thou shalt not goon out in the
mydil of hem.
26 And Y shal make thi
tunge for to cleue to the roof of thi
mouth, and thou shalt be doumbe, nether
as man chydynge, or sharpli spekynge;
for it is an hows stirynge to wraththe.
27 Forsothe whanne Y shal speke to thee,
Y shal opyn thi mouth, and thou shalt
seie to hem, Thes thingis seith the Lord
God, He that herith, here, and he that
restith, reste; for it is an hows stirynge
to wraththe.
CAP. IV.
1 And thou, sone of man, take to thee
a tijl stoon; and thou shalt putte it before
thee, and thou shalt discriue in it the
citee of Jerusalem.
2 And thou shalt ordeyne
a&yogh;ens it a bisegynge; and thou
shalt bilde waardingis, thou shalt bere
togidre an heep of erthe, and thou shalt
&yogh;yue a&yogh;ens it castels, or oostis, and thou
shalt putte engynes in compas.
3 And
take thou to thee an yren panne; and
thou shalt putte it in to an yren wal bitwix
thee and bitwix the citee; and thou
shalt vpon alle sidis stable thi face to it,
-- --
and it shal be in to bisegynge, and thou
shalt about &yogh;yue it, or cumpas; it is a
tokne to the hows of Israel.
4 And thou
shalt slepe vpon thi left sijde, and thou
shalt putte the wickidnessis of the hows
of Israel vpon it in the noumbre of dais,
in whiche thou shalt slepe on it, and thou
shalt take to the wickidnes of hem.
5 Forsothe
Y &yogh;aue to thee &yogh;eeris of the wickidnes
of hem, in noumbre of thre hundrid
dais and nynti dais; and thou shalt bere
the wickidnes of the hows of Israel.
6 And
whanne thou shalt fulfille thes thingis,
thou shalt sleepe vpon thi ri&yogh;t syde the
secounde tyme. And thou shalt take to
the wickidnes of the hows of Juda fourty
dais, a dai for a &yogh;eer, sotheli Y &yogh;aue to
thee a dai for a &yogh;eer.
7 And to the bisegynge
of Jerusalem thou shalt turne
thi face; and thin arm shal be strau&yogh;t
forth, and thou shalt prophecie a&yogh;ens it.
8 Loo! Y &yogh;aue about, or cumpaside, thee
with boondis, and thou shalt not conuerte
thee fro thi side in to the tother side, til
thou fulfille the dais of thi segynge.
9 And
take thou to thee whete, and barli, and
bene, and lent, and mylie, and vetche;
and thou shalt sende hem in to a vessel.
And thou shalt make to thee looues in
noumbre of dais, whiche thou shalt sleepe
vpon thi side; thre hundrid and nynti
dais thou shalt ete it.
10 Forsothe thi meet,
which thou shalt ete, shal be in wei&yogh;t
twenti stateris, that is, ten owncis, in
the dai; fro tyme vn to tyme thou shalt
ete it.
11 And thou shalt drynke water in
mesure the sixt part of hyn; fro tyme vn
to tyme thou shalt drynke it.
12 And thou
shalt ete it as a barly loof bakyn vndir
asshen; and thou shalt hille it with a
toord that goth out of a man, in the eyen,
or si&yogh;t, of hem.
13 Thes thingis seith the
Lord, So the sones of Israel shulen ete
her breed defoulid among heithen men,
-- --
to whom Y shal caste hem out.
14 And I
seide, A! A! A! Lord God, loo! my
soule is not defoulid, and fro my childhed
til now Y ete not deed careyn, and
to-drawyn of beestis; and al vnclene flesh
entride not in to my mouthe.
15 And he
seide to me, Loo! I &yogh;aue to thee dunge
of oxen for mannus toordis; and thou
shalt make thi breed in it.
16 And he seide
to me, Loo! Y shal defoule the staf of
breed in Jerusalem, and thei shulen ete
her breed in wei&yogh;t and in bisynes, and
thei shulen drynke watir in mesure and
in anguysh;
17 that water and breed failynge
eche man falle doun to his brother,
and waxe rotyn to gidre in her wickidnessis.
CAP. V.
1 And thou, sone of man, take to thee
a sharp swerd, or rasour, shauynge
heeris; and thou shalt `take it to, and
thou shalt lede it bi thin heed, and bi
thi beerd. `And thou shalt take to thee
a balaunce of wei&yogh;t, and thou shalt departe
hem.
2 And thou shalt brenne the
thridde part in fier in the mydil of the
citee, besidis the fulfilling of dais of segynge.
And thou takynge to the thridde
part, shalt to gidir kitte bi swerd in
cumpas of it. Sotheli thou shalt scatere
in to wynd the tother thridde part; and
Y shal make nakid, or vnshethe, the
swerd after hem.
3 And thou shalt take
therof a litil noumbre, and thou shalt
bynde hem in the hei&yogh;t of thin ouermost
clooth.
4 And eftsoone thou shalt
take of hem, and thou shalt caste hem
in to the mydil of fier. And thou shalt
brenne hem in fier; and of it fier shal
gon out in to al the hous of Israel.
5 Thes
thingis seith the Lord God, This is Jerusalem;
in the mydil of heithen men Y
haue putte it, and loondis in the cumpas
of it.
6 And it dispiside my domys, that
it were more vnpitous than heithen men;
-- --
and my maundementis more than loondis
that ben in compas of it. Forsothe thei
han caste awei my domys, and thei walkeden
not in my preceptis, or heestis.
7 Therfor thes thingis seith the Lord God,
For &yogh;e han ouerpasside, or ouercomyn,
heithen men that ben in &yogh;our cumpas,
and &yogh;e walkeden not in myn heestis, and
my domys &yogh;e han not doo, and &yogh;e han
not wrou&yogh;te aftir the domys of heithen
men that ben in &yogh;our cumpas;
8 therfor
seith the Lord thes thingis, Loo! Y to
thee, and Y my silf in the mydil of thee
shal make domys in the eyen, or si&yogh;t,
of heithen men;
9 and I shal doo in the
whiche thingis I dide not, and to whiche
I shal namore make lijc thingis, for alle
thin abhomynaciouns.
10 Therfor faders
shulen eete sones in the mydil of thee,
and sones shulen eete her faders; and in
thee I shal make domys, and I shal wyndewe
alle thi relikis in to eche wynd.
11 Therfor I lyue, seith the Lord God, no
but for that that thou defoulidist myn
hooli thing in alle thin offenciouns, and
in alle thin abhomynaciouns; and I shal
breke togider, and myn eye shal not
spare, and Y shal not haue mercie.
12 The
thridde part of thee shal die bi pestilence,
and in hungre shal be wastid in
the mydil of thee; and the thridde part
of thee shal falle doun bi swerd in thi
compas; sotheli I shal scatere thi thridde
part in to eche wynd, and I shal drawe
out a swerd after hem.
13 And I shal fulfille
my woodnes, and Y shal make myn
indignacioun for to reste in hem, and Y
shal be coumfortid. And thei shulen wite,
for I the Lord spake in my feruent
wraththe, whanne Y shal fulfille myn
indignacioun in hem.
14 And Y shal &yogh;eue
thee in to scornynge and shenship to
heithen men that ben in thi compas, in
the si&yogh;t of eche man passynge forth.
15 And
thou shalt be shenship and blasfemye,
ensaumple and greet wondrynge, in heithen
-- --
men that ben in thi compas, whanne
Y shal doo in thee domys in woodnes, and
in indignacioun, and in blamyngis of
wraththe.
16 Y the Lord; whanne Y shal
sende the werst arewis of hungre in to
hem, whiche shulen be deedly; and whom
Y shal sende, that I scatere &yogh;ou. And I
shal gedre hungre vp on &yogh;ou, and Y shal
defoule in &yogh;ou the staf of breed.
17 And I
shal sende in to &yogh;ou hungre, and werste
beestis, vn to deeth; and pestilence and
blood shulen passe bi thee, and Y shal
lede in a swerd vpon thee; I the Lord
haue spokyn.
CAP. VI.
1 And the word of the Lord is maad to
me,
2 seiynge, Sone of man, put thi face
to the hillis of Israel; and thou shalt prophecie
to hem,
3 and thou shalt seye, Hillis
of Israel, here &yogh;e the word of the Lord
God. Thes thingis seith the Lord God
to mounteyns, and reisyngis of hillis, to
rochis, and valeys, Loo! I shal lede to on
&yogh;ou a swerd, and I shal scatere &yogh;our hei&yogh;e
thingis.
4 And I shal distruye &yogh;our auters,
and &yogh;our symulacrys shulen be brokyn
to gidre; and Y shal cast doun &yogh;our slayn
men before &yogh;our ydolis.
5 And Y shal &yogh;eue
the deed careyns of the sones of Israel
before the face of &yogh;our symulacris, and
Y shal scatere &yogh;oure boonus about &yogh;oure
autres, in alle &yogh;our dwellyngis.
6 Cytees
shulen be deseert, and hei&yogh;e thingis shulen
be distruyid, and shulen be disparplid;
and &yogh;our auters shulen perishe, and
shulen be brokyn togidre. And &yogh;oure ydolis
shulen ceese, and &yogh;our wode maumentis
shulen be troden to gidre, and &yogh;our werkis
shulen be don a wei.
7 And a slayn man
shal falle doun in the mydil of &yogh;ou; and
&yogh;e shulen wite, for Y am Lord.
8 And Y
shal leeue in &yogh;ou hem that han fledde the
swerd in heithen men, `whanne I schal
scatere &yogh;ou in to londis.
9 And &yogh;oure delyuered
men schulen bethenke of me in
hethen men, to whom thei ben lad caitifs;
-- --
for Y haue defoulide the herte of
hem doynge fornyacacioun, and goynge
awey fro me, and the eyen of hem doynge
fornicacioun after her ydolis. And
thei shulen displese to hem self vp on
the yuel thingis, whiche thei diden in
alle her abomynaciouns.
10 And thei shulen
wite, for Y the Lord spake not veynli,
that Y shulde doo to hem this yuel thing.
11 Thes thingis seith the Lord God, Smyte
thin hoond, and hurtle to gidre thi foot,
and sey, Allas! to alle abomynaciouns of
yuel thingis of the hows of Israel, that
ben to fallynge bi swerd, hungre, and
pestilence.
12 Forsothe he that is ny&yogh;, shal
falle bi swerd. And he that shal be laft
and be bisegid, shal die bi hungre. And
Y shal fulfille myn indignacioun in hem.
13 And &yogh;e shulen wite, for Y the Lord, whanne
&yogh;our slayn men shulen be in the mydil
of &yogh;our ydolis, in the cumpas of &yogh;our auters,
in eche hei&yogh; litle hil, and in alle
hei&yogh;this of mounteyns, and vnder eche
tree ful of wode, or bouwis, and vndir
eche ook ful of bouwis, that is to seye, a
place where thei brenten encensis swete
sauerynge to alle her ydolis.
14 And I shal
holde forth myn hoond vpon hem, and
Y shal make the loond of hem desolat,
and destitute, or forsakyn, fro deseert
Deblatha, in alle the dwellingis of hem;
and thei shulen wite, for I a Lord.
CAP. VII.
1 And the word of the Lord is maad to
me,
2 seiynge, And thou, sone of man, thes
thingis seith the Lord God to the loond
of Israel, Ende cometh, ende cometh, vp
on the foure plagis, `or parties, of the
erthe.
3 Now ende vpon thee, and I shal
sende my woodnes in to thee, and Y shal
deme thee after thi weies, and I shal
putte a&yogh;en thee alle thin abomynaciouns.
4 And myn eye shal not spare vpon thee,
and Y shal not haue mercye. But Y shal
putte this weies vpon thee, and thin abomynaciouns
shulen be in the mydil of
-- --
thee; and &yogh;e shulen wyte, for I the Lord.
5 These thingis seith the Lord God, Oon
affliccioun, or tourment, loo! affliccioun
cometh;
6 the ende cometh, the ende cometh;
it shal wake out a&yogh;ens thee; loo!
yt cometh.
7 Contricioun, or tredynge to
gider, cometh vpon thee, that dwellist in
erthe; tyme cometh, the dai of sleinge is
ny&yogh; and not of glorie of hillis.
8 Now of
ny&yogh; Y shal heelde out my wraththe vpon
thee, and I shal fulfille my woodnes in
thee; and I shal deme thee after thi weies,
and Y shal putte to thee alle thi greet
trespassis.
9 And myn eye shal not spare,
nether Y shal haue mercie; but thi weies
Y shal putte to thee, and thin abomynaciouns
shulen be in the mydil of thee;
and &yogh;e shulen wite, for Y am the Lord
smytynge.
10 Loo! the day, loo! it cometh;
contricioun, or defoulynge to gidir, is gon
out. The &yogh;erde florishide, priyd buriounede,
wickidnes roos in the &yogh;erde of vnpitee;
11
not of hem, and not of the puple,
nether of the sown of hem, and reste shal
not be in hem.
12 Tyme cometh, the dai
nei&yogh;ede; he that bieth, glade not, and
he that sellith, mourne not; for wraththe
vpon al the puple of it.
13 For he that
soulde, shal not turne a&yogh;en to that thing
that he soulde, and &yogh;it in men lyuynge
the lijf of hem; forsothe a visioun, or
prophecie, shal not goo a&yogh;en to al the
multitude of it, and a man shal not be
coumfortid in the wickidnes of his lijf.
14 Synge &yogh;e with trumpe, and be alle men
maad redie, and there is not that shal
goo to bateile; forsothe my wraththe
vpon al the puple of hym.
15 Swerd with
out forth, pestilence, and hungre with
inforth; he that is in the feeld, shal die
bi swerde; and thei that ben in the citee,
shulen be deuouride bi pestilence and
hungre.
16 And thei of hem that shulen
flee, shulen be saued; and thei shulen be
in mounteyns as culueres of euyn valeys,
alle dreedful, eche in his wickidnes.
17 Alle
hoondis shulen be vndon, and alle knees
-- --
shulen flowe with waters.
18 And thei shulen
girde hem with heiris, and inward
dreed shal hille hem to gidre; and in eche
face confusioun, and in alle the heedis of
hem ballidnes.
19 The siluere of hem shal
be cast fer with outforth, and the gold
of hem shal be in to dungehil; the siluer
of hem and the gold of hem shal not
mowe deliuere hem in the dai of the
woodnes of the Lord. Thei shulen not
fulfille her soule, or lijf, and the wombis
of hem shulen not be fulfillid; for it is
maad the sclaundre of wickidnes of hem.
20 And thei puttiden the ournement of her
brochis in to pride; and thei maden of it
the ymagis of her abomynaciouns and
symulacris. For this thing Y &yogh;aue it to
hem, in to vnclennes.
21 And Y shal &yogh;yue
it in to the hoondis of alienys, for to take
a wey, and to vnpitouse men of erthe in
to praye, and thei shulen defoule it.
22 And
I shal turne awey my face fro hem, and
thei shulen defoule my priue thing; and
foule men, or renners, shulen entre in to
it, and shulen defoule it.
23 Mak thou conclusioun,
or ende; for the erthe is ful
of doom of bloodis, and the citee ful of
wickidnes.
24 And I shal brynge the werst
men of folk of kynde, and thei shulen
weelde the howsis of hem; and Y shal
make the pride of my&yogh;ti men for to reste,
and thei shulen weelde the seyntuaries
of hem.
25 Anguysh comynge vpon, thei
shulen a&yogh;en seche pees, and it shal not
be.
26 Trublynge to gidre shal come vpon
trublyng to gidre, and herynge vpon herynge;
and thei shulen seche a visioun of
the prophete, and lawe shal perishe fro
preest, and counseil fro eldre men.
27 The
kyng shal mourne, and the prince shal
be clothid with inward sorew, and the
hoondis of puple of the loond shulen be
trublid togidir; after the weie of hem Y
shal do to hem, and after the domes of
hem Y shal deme hem; and thei shulen
wite, for Y the Lord.
-- --
CAP. VIII.
1 And it is doon in the sixte &yogh;eer, in the
sixte moneth, in the fifthe day of the
moneth, Y sate in myn hous, and the
oolde men of Juda saten before me; and
the hoond of the Lord God fel there vpon
me.
2 And I see&yogh;, and loo! a liknes as
the biholdynge of fier; fro the biholdynge
of the leendis of hym and bynethe was
fier, and fro the leendis of hym and aboue
as biholdynge of shynynge, as the seynge
of electre, that is, metal maad of gold
and siluer, bri&yogh;ter than gold.
3 And the
liknes of an hoond sent out cau&yogh;te me in
the heer of myn heed; and a spirit lifte
me vp bitwix heuen and erthe, and
ledde me in to Jerusalem, in the visioun
of God, besidis the inner dore that biholdith
to the north, where the idol of
zele, or enuye, was set, for to styre enuye.
4 And loo! there the glorie of God of Israel,
after the visioun which Y see&yogh; in
the feeld.
5 And he seide to me, Sone of
man, reys thin eyen to the weye of the
north; and loo! fro the north of the &yogh;aat
of the auter, the ydol of enuye in that
entrynge.
6 And he seide to me, Sone of
man, gessist thou whether thou seest
what thes men don, the greet abomynaciouns
whiche the hows of Israel doth
here, that Y goo a wey fer fro my seyntuarie?
and &yogh;it thou conuertid shal see
gretter abomynaciouns.
7 And he ledde
me in to the dore of the porche; and Y
see&yogh;, and loo! an hoole in the wal.
8 And
he seide to me, Sone of man, dig the wal;
and whanne Y hadde thur&yogh; diggide the
wal, o dore aperide.
9 And he seide to me,
Go thou yn, and se the werst abomynaciouns,
whiche thes men doon here.
10 `And
I gon in, see&yogh;; and loo! eche lyknes of
crepynge thingis, and abomynacioun of
beestis, and alle the ydolis of the hous of
Israel, weren peyntid in compas in the
-- --
wal bi alle.
11 And seuenti men of the
eldris of the hous of Israel; and Jeconye,
the sone of Saphan, stode in the mydil
of hem, stoondynge before the peyntyngis;
and eche hadde a censer in his
hoond, and the vapour, or smoke, of a
cloud roos togider of the ensence.
12 And
he seide to me, Certis, sone of man, thou
seest whiche thingis the eldre men of the
hows of Israel doon in derknessis, eche
in the hid place of his couche; forsothe
thei seyn, The Lord seeth not vs, the
Lord hath forsakyn the loond.
13 And the
Lord seide to me, &YOGH;it thou conuertid shal
see gretter abomynaciouns, whiche thes
men don.
14 And he ledde me yn, bi the
dore of the &yogh;ate of the hows of the Lord,
that biheelde to the north; and loo! there
saten wymmen, mournynge a mawmet
of letcherie, that is clepid Adonydes.
15 And he seide to me, Certis, sone of man,
thou hast seen; &yogh;it thou conuertid shal
see gretter abomynaciouns than thes.
16 And he ledde me in, in to the innermore
porche of the hows of the Lord; and loo!
in the dore of the temple of the Lord,
bitwixe the vestiarie and the auter, as
fyue and twenti men hauynge the backis
a&yogh;ens the temple of the Lord, and the
faces to the eest; and thei worshipeden
at the rysynge of the sunne.
17 And he
seide to me, Certis, mannus sone, thou
shalt see, whether this thing is li&yogh;t to
the hous of Juda, that thei shulden doo
thes abomynaciouns, whiche thei diden
here? For thei fulfillynge the erthe with
wickidnes, ben turned to gidre to terre me
to wraththe; and loo! thei applien, or
leyn to, a braunche to her nose thrillis.
18 Therfor and Y shal doo in my woodnes;
myn eye shal not spare to hem, nether
I shal haue mercy; and whanne thei
shulen crie to myn erys with greet vois,
Y shal not here hem.
-- --
CAP. IX.
1 And he criede in myn eris with greet
voys, seiynge, The visitaciouns of the citee
han nei&yogh;ed, and eche man hath a vessel
of sleynge in his hoond.
2 And loo! sixe
men camen fro the weye of the hei&yogh;er &yogh;aat,
that biholdith to the north, and a vessel
of deeth of eche man in his hoond; and o
man in the mydil of hem was clothid
with lynnen, and an ynkhorn of a wryter
in his reynes; and thei entriden, and
stoden besidis the brasen auter.
3 And
the glorie of the Lord of Israel is takyn
of cherubin, that was on it, at the
threshfoold of the hows; and he clepide
the man that was clothid with lynnen,
and hadde an enkhorn of a writer in his
leendis.
4 And the Lord seide to hym,
Go thou bi the mydil cytee, in the mydil
of Jerusalem, and mark Tau vpon the
forehedis of men mournynge and sorewynge
vpon alle the abhomynaciouns that
ben don in the mydil therof.
5 And he
seide to hem, me herynge, Passe &yogh;e bi
the cytee suynge hym, and smyte &yogh;e;
&yogh;our eye spare not, nether haue &yogh;e mercy.
6 Slee &yogh;e old man, &yogh;onge man, meyden,
litil child, and wymmen, vn to the
perishynge; forsothe slee &yogh;e not eche
man, vp on whom &yogh;e shulen see Tau;
and bigynne &yogh;e of my seyntuarie. Therfor
thei bigunnen at the eldre men, that
weren before the face of the hous.
7 And
he seide to hem, Defoule &yogh;e the hous,
and fulfille &yogh;e the porchis with slayn
men; goo &yogh;e out. And thei wenten out,
and thei han smyten hem that weren in
the citee.
8 And the sleynge fulfillid, Y
dwelte. And Y felle vpon my face, and
criynge Y seide, Allas! allas! allas! Lord
God, therfor whether thou shalt distruye
alle the relikis of Israel, shedynge out thi
woodnes vpon Jerusalem?
9 And he seide
to me, The wickidnes of the hous of Israel
and Juda is ful greet, and the erthe
-- --
is fulfild with blodis, or synnes, and the
citee is fulfillid with turnynge awei;
forsothe `thei seiden, The Lord hath forsakyn
the loond, and the Lord seeth not.
10 Therfor and myn eye shal not spare,
nether Y shal haue mercy; Y shal &yogh;eelde
the weies of hem vpon the heed of hem.
11 And loo! the man that was clothid with
lynnen, that hadde an enkhorn in his
rigge, answerde a word, seiynge, Y haue
don, as thou commaundidest to me.
CAP. X.
1 And Y see&yogh;, and loo! in the firmament
that was vpon the heed of cherubyn, as
a saphir stoon, and as the fourme of a
seet aperide `vpon it.
|
