Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. LI.
1 These thingus seith the Lord, Lo! Y
shal reren vp on Babilon, and vp on his
dwelleris, that ther herte rereden a&yogh;en
me, as a wind bringende in pestilence.
2 And Y shal sende in to Babilon wyneweres,
and thei shul wynewe it, and destro&yogh;en
his lond; for they camen vp on it
on eche side in the dai of his tormenting.
3 And he shal not wone, that beendith his
bowe, and ste&yogh;en vp shal not the clothide
with an habirioun; wileth not spare to
his &yogh;unge men, sleth al his chyualrie.
4 And falle shuln the slayne in the lond of
Caldeis, and the woundid in his regeouns.
5 For Irael was not `forsake, or maad wydow,
and Juda fro the Lord ther God,
Lord of ostus; the lond forsothe of hem
folfild is of gilte fro the hoely of Irael.
6 Fleeth fro the myddel of Babilon, that
eche man saue his soule; wileth not be
stille vp on his wickenesse, for tyme of
his veniaunce is to the Lord; his while
he shal &yogh;elde to hym.
7 A goldene chalis
-- --
of Babiloyne in the hond of the Lord,
drunknende al the lond; of his wyn
drunke the Jentilis, and thennus thei ben
to-stirid.
8 Sodeynly fel Babilon, and is
to-brosid; &yogh;elleth vpon yt, taketh recyne
gumme to his sorewe, if parauenture he
be helid.
9 Wee han cured Babilon, and
he is not helid; forsake wee it, and go
wee eche in to his lond; `for ful cam `vn
to heuenus hys dom, and vp rered is
vn to the cloudus.
10 The Lord bro&yogh;te forth
oure ri&yogh;twisnesses; come, and telle wee
in Sion the were of the Lord oure God.
11 Sharpeth arwes, fulfilleth arwe cases;
the Lord rerede his spirit of kingus of
Medes, and a&yogh;en Babilon is his mynde,
that he leese it, for the veniaunce of the
Lord is, the veniaunce of his temple.
The king of Medus a&yogh;en Babilon of the
Lord is rered.
12 Vp on the wallis of Babilon
rereth a tocne, eecheth the warde,
rereth the keperes, greithith busshemens;
for the Lord tho&yogh;t, and dide, what euere
thingus he spac a&yogh;en the dwelleris of
Babilon.
13 That dwellist vp on manye
watris, riche in tresores, comen is thin
ende, the foot mesure of thi kutting of.
14 The Lord of ostus swor bi his lyf, for Y
shal fulfille thee of men, as with bruc
werm, and vp on thee a merie faring
song shal be sunge.
15 That made the
erthe in his strengthe, biforn made redi
the world in his wisdam, and bi his prudence
stra&yogh;te out heuenus.
16 Hym &yogh;uende
vois, ben multeplied watris in heuene;
that rereth cloudus fro the vtmost of the
erthe, leitus `in to reyn made, and bro&yogh;te
forth wind of his tresores.
17 Fool is mad
eche man of kunnyng, confoundid is eche
&yogh;eetere in grauen thing; for `fals is his
&yogh;eting, ne ther is spyrit in hem.
18 Veyne
ben the werkus, and wrthi scornyng; in
tyme of ther visityng thei shul pershe.
19 Not as this the part of Jacob; for that
-- --
made alle thingus he is, and Irael the
kingus dignete of his eritage, the Lord of
ostus his name.
20 Thou hurtlist to me the
vesselis of bataile, and Y shal hurtle in
thee Jentilis, and scatere in thee reumus;
and Y shal hurtle in thee the hors,
21 and
his hors man; and Y shal hurtle in thee
the char,
22 and his ste&yogh;ere; and I shal hurtle
in thee the man and the womman;
and I shal hurtle in thee the old man
and the child; and I shal hurtle in thee
the &yogh;unge man and the maide;
23 and I
shal hurtle in thee the shepperde and his
floc; and Y shal hurtle in thee the erthe
tiliere and his &yogh;oc oxen; and I shal hurtle
in thee dukes and the maister &yogh;ugis.
24 And
I shal &yogh;eelde to Babilon, and to alle the
dwelleris of Caldee, alle his euel, that he
dide in Sion, in &yogh;oure e&yogh;en, seith the
Lord.
25 Lo! Y to thee, thou hil berende
pestilence, seith the Lord, that corumpist
al the erthe. I shal strecche out myn
hond vp on thee, and turne out thee fro
stonus, and Y shal &yogh;yue thee in to mount
of brennyng.
26 And Y shal not take of thee
a ston in to a corner, and a ston in to
foundemens; but lost thou shalt be in to
with oute ende, seith the Lord.
27 Rereth
a tocne in the lond, crieth with a trumpe
in mounteynes; halewith vp on it Jentilis,
telleth out a&yogh;en it to the kingus of
Ararath, of Menny, and of Ascheneth;
noumbreth a&yogh;en it Thasor, bringeth to
vp on it hors, as bruke hauende tonge.
28 Halewith vp on it Jentilis, kingus of
Mede, his dukus, and alle his maister
iugis, and al the lond of his power.
29 And al to-moued shal be the lond, and
disturbid; for wakide out a&yogh;en Babilon
the tho&yogh;t of the Lord, that he poote the
lond of Babilon desert, and vnabitable.
30 Ceseden the stronge men of Babilon fro
bataile, thei dwelten in places of refut;
deuoured is ther stalwrthenesse, and made
thei ben as wymmen; brend vp ben his
tabernaclis, to-brosid ben his barres.
31 The
-- --
rennere to meete with the rennere shal
come, and the messager to meete with
the tellere, that he telle out to the king
of Babiloyne, for taken is his cite fro the
ouermost to the ouermost;
32 and the forthis
ben bifor ocupied, and the mershis ben
brend vp with fyr, and the men fi&yogh;teres
ben disturbid.
33 For these thingus seith
the Lord of ostis, God of Irael, The
do&yogh;ter of Babilon as a corn floor, tyme
of his thresshing; &yogh;it a litil, and come
shal the tyme of his reping.
34 Eet me,
deuourede me Nabugodonosor, king of
Babiloyne; he &yogh;eeld me as a voide vessel,
soupede me vp as a dragoun; he
fulfilde his wombe with my tendernesse,
and caste me out.
35 Wickenesse a&yogh;en me,
and my flesh vp on Babiloyne, seith the
dwelling of Sion; and my blod vp on
the dwelleres of Calde, seith Jerusalem.
36 Therfore these thingus seith the Lord,
Lo! Y shal deme thi cause, and venge
thi vengyng; and desert shal make his
se, and shal drien his veyne.
37 And Babylon
shal be in to mynde hepis, the
dwelling of dragounus, stoneing and
whistling, for thi that ther is not a dwellere
togidere.
38 And leouns shul rore,
and shake out shul her lockus, as the
whelpus of leouns.
39 In the hete of hem Y
shal putte ther drinc; and Y shal drunkne
them, that thei ben greeued with slep,
and slepen an euere durende slep, that
they rise not, seith the Lord.
40 I shal
lede them doun as lombis to slayn sacrifise,
and as wetheris with kidus. Hou
taken is Cisac, and ca&yogh;t is the glorious
of al erthe?
41 What maner mad is in to
stoneyng Babilon among Jentilis?
42 And
ste&yogh;ede vp vp on Babilon the se, with
the multitude of his flodus it is couered.
43 Mad ben his cites in to stoneyng, the
lond vnabitable and desert; the lond in
whiche no man dwelle, ne passe thur&yogh; it
the sone of man.
44 And Y shal visite vp
on Bel in to Babilon, and throwen awei
-- --
that, that it hadde soupid vp fro his
mouth, and shul no mor flowe to it
Jentilis; forsothe and the wal of Babiloyne
shal at ones falle.
45 Goth out fro
his myddel, my puple, that eche man saue
his lif fro the wrathe of the wodnesse of
the Lord;
46 and lest par auenture waxe
nesshe &yogh;oure herte, and &yogh;ee drede the
heering, that shal be herd in the lond; and
come shal in a &yogh;eer heering, and after this
&yogh;er heering and wickenesse in the lond,
and lordshipere vp on lordshipere.
47 Therfore
lo! da&yogh;es comen, seith the Lord, and
Y shal visite vp on grauen thingus of
Babiloyne; and al hys lond shal be confoundid,
and alle his slayne shuln falle in
his myddel.
48 And preise shul vp on
Babiloyne heuenus, and erthe, and alle
thingus that in hem ben; for fro the north
shul come to it reueres, seith the Lord.
49 And hou dide Babilon, that fallen shulde
slayn men in Irael, so fro Babylon falle
shul slayn men in al the lond.
50 &YOGH;ee that
fledden the swerd, come, and wileth
not stonde; recordeth aferr of the Lord,
and Jerusalem ste&yogh;e vp on &yogh;oure herte.
51 Confoundid wee ben, for wee han herd
repref; couerede shenshype oure faces, for
ther camen alienus vp on the halewing of
the hous of the Lord.
52 Therfore lo! da&yogh;es
comen, seith the Lord, and Y shal visite
vp on the grauen thingus of Babiloyne,
and in al his lond loowen shal the
woundid.
53 If ste&yogh;en shul Babilon in to
heuene, and fastne in hei&yogh;te his stalwrthenesse,
to me shul come his wasteres,
seith the Lord.
54 Vois of the criende fro
Babilon, and gret to-treding fro the lond
of Caldeis,
55 for the Lord wastide Babilon,
and lost of it a gret vois; and sowne
shuln his flodus as many watris. &YOGH;af soun
the vois of hem,
56 for ther cam vp on it,
that is, vp on Babilon, the reuere; and
ca&yogh;t ben his stronge men, and driede out
the bowe of them, for a stronge vengere
the Lord; &yogh;eldende a&yogh;eyn he shal &yogh;elde.
-- --
57 And Y shal drunkne his princes, and
his wise men, his dukis, and his maister
iugis, and his stronge men; and thei
shul slepen an euere lastende slep, and
thei shul not ben wakid, seith the king,
Lord of ostus his name.
58 These thingus
seith the Lord God of ostus, The wal of
Babilon he the heiest with vndermynyng
shal be vndermyned, and his he&yogh;e &yogh;atus
shul be brend with fyr; and the trauailis
of puples at no&yogh;t, and of Jentilis `in to
fyr thei shul ben, and pershen.
59 And
the wrd that Jeremye, the profete, comaundide
to Saraie, sone of Nerie, sone
of Masie, whan he shulde go with king
Sedechie in to Babiloyne, in the ferthe
&yogh;er of his regne; Saraie forsothe was
prince of profecie.
60 And Jeremye wrot
al the euel, that was to com vp on Babilon,
in o boc, alle these wrdus that ben
write a&yogh;en Babilon.
61 And Jeremye seide
to Saraie, Whan thou shalt come in to
Babilon, and seen, and reden alle these
wrdus,
62 thou shalt sei, Lord, thou speeke
a&yogh;en this place, that thou shuldist destro&yogh;e
it, that ther be not that in it
dwelle, fro man vn to beste, and that ther
be perpetuel wildernesse.
63 And whan thou
hast ful endid to rede this boc, thou
shalt binde to it a ston, and throwen it
in to the myddel of Eufraten; and sey,
So shal be dreynt Babilon,
64 and not rise
fro the face of the tormenting, that Y
bringe vp on it, and it shal be loosed.
Hiderto the wrdus of Jeremye.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
