Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXX.
1 This is the wrd, that is do to Jeremye
fro the Lord,
2 seiende, These thingus
seith the Lord God of Irael, seiende,
Writ to thee alle these wrdus that Y
spac to thee, in the boc.
3 Loo! forsothe
da&yogh;es comen, seith the Lord, and Y shal
turne the conuerting of my puple of Irael
and of Juda, seith the Lord; and Y shal
turne them to the lond that Y &yogh;af to the
fadris of them, and thei shul welde it.
4 And these the wrdus, that the Lord spac
to Irael, and to Juda.
5 For thes thingus
seith the Lord, Voys of huge drede wee
han herd; ferd, and ther ys not pes.
-- --
6 Asketh, and seeth, if the male geteth;
whi thanne sa&yogh; Y of eche man the hond
vpon his leende, as of the trauailende
with childe, and turned ben alle ther
faces in to &yogh;el&yogh;?
7 Wo! for gret that day,
ne ther is his lyc; and tyme of tribulacioun
is to Jacob, and of it he shal ben
saued.
8 And it shal be, in that dai, seith
the Lord of ostus, Y shal to-brose his &yogh;oc
fro thi necke, and his bondus Y shal to-breke;
and no mor shul lordshipen to
hym alienus,
9 but `thei shul serue to the
Lord, ther God, and to Dauid, ther king,
whom Y shal rere to them.
10 Thou therfore
ne drede thou, my seruaunt Jacob,
seith the Lord, ne inwardly drede thou,
Irael; for lo! Y shal saue thee fro a ferr
lond, and thi seed fro the lond of the
caitifte of them. And turned shal ben
a&yogh;een Jacob, and resten, and with alle
goodus flowen; and ther shal not be whom
he shal dreden.
11 For Y with thee am,
seith the Lord, that Y saue thee. Forsothe
Y shal don ful ending in alle Jentiles,
in which Y scaterede thee; thee
forsothe Y schal not make in to ful ending,
but Y shal chastise thee in dom,
that thou be not seen to thee gilteles.
12 For these thingus seith the Lord, Vnheleable
thi brosure, werst thi wounde.
13 Ther
is not, that deme thi dom to bynde to;
of curingus ys not profit to thee.
14 Alle
thi loueres for&yogh;eeten thee, thee shul not
sechen; with the wounde forsothe of
the enemy Y smot thee, by cruel chastising;
for the multitude of thi wyckenesse,
hard ben mad thi synnes.
15 What
criest thou vp on thi to-treding? vnheleable
is thi sorewe; for the multitude of
thi wickidnesse, and for thin harde
synnes, Y dide these thingus to thee.
16 Therfore alle that eten thee, shul ben
deuoured, and alle thin enemyes in to caityfte
shul be lad; and that thee wasten,
shuln ben wasted, and alle thi robberes
Y shal &yogh;yue in to prei.
17 Forsothe Y shal
-- --
helen parfitly thi felle wounde to thee,
and of thi woundus Y shal hele thee,
seith the Lord; for cast awei thei clepeden
thee, Sion; this is she that hadde
not `a&yogh;een serchere.
18 These thingus seith
the Lord, Lo! I shal conuerte the conuerting
of the tabernacles of Jacob, and
to his rooues Y shal han mercy; and
bild vp shal be the cite in his hei&yogh;te, and
the temple after his order shal be foundid.
19 And gon out shal preising of hem and
vois of pleieres, and Y shal multeplie
them, and thei shul not ben lassid; and
Y shal glorifie them, and thei shuln not
be thynned.
20 And the sonus `of it shul
ben as fro the bygynnyng, and the cumpanye
`of it before me shal abide stille;
and I shal visete a&yogh;en alle that troblen
hym.
21 And ther shal ben his duke of
hym, and a prince from his myddel
shal be bro&yogh;t forth; and Y shal presenten
hym, and he shal ne&yogh;he to me;
who forsothe is this, that `leye to his
herte, that he ne&yogh;he to me? seith the
Lord.
22 And &yogh;ee shul be to me in to puple,
and Y shal be to &yogh;ou in to God.
23 Lo! in Jentilis the whirlewind of the
Lord, wodenes goende out, tempest fallende,
in the hed of vnpitous men thei
shul alle togidere resten.
24 Shal not turne
awei the wrathe of indignacioun the Lord,
to the tyme he do, and fulfille the thenking
of his herte; in the laste of da&yogh;es
&yogh;ee shul vndurstonden thoe thynges.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|