Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XLVIII.
1 And so thes thingis passid ouer, it was
toold to Joseph, that the fader of hym
wex sik. The which with hym takun
two sones, Manasses and Effraym, forth
&yogh;eden to go.
2 And it was seide to the
olde man, Loo! thi sone Joseph is comen
-- --
to thee; the which coumfortid sat in the
bedde.
3 And to Joseph comun in to him,
seith, God Almy&yogh;ti aperyde to me in
Luza, that is in the loond of Chanaan,
and he blisside to me,
4 and seith, Y thee
shal encreese and multiplie, and make
into cumpanyes of peples, and Y shal
&yogh;yue to thee this loond, and to thi seed
after thee, into euerlastynge possessioun.
5 Thanne thi two sones, that ben born to
thee in the loond of Egipte bifore Y com
hider to thee, shulen ben myne, Effraym
and Manasses as Ruben and Symeon
shulen ben acountid to me;
6 the tother
forsothe whom thow shalt gete after hem
shulen be thine, and bi name of her bretheren
shulen be clepid in her possessiouns.
7 To me forsothe whanne Y cam
fro Mesopotanye, Rachel was deed in the
loond of Chanaan, in that weie, and it
was veer tyme; and Y cam into Effratam,
and Y biryede hir biside the weie
of Effrathe, the which in another name
is clepid Bethleem.
8 And Jacob, seynge
the sones of hym, seide to hym, Who ben
thes?
9 He answerde, My sones thei ben,
whom God hath &yogh;ouun to me in this
place. Bryng hem, he seith, to me, that
I blisse to hem.
10 The eyen forsothe of
Yrael weren derke for greet eelde, and
cleerli he my&yogh;te not se; and hem put to
hym,
11 kissynge and cleppynge hem, seide
to his sone, Y am not bigilid of thi si&yogh;t;
forthermore God hath shewid to me thi
seed.
12 And whanne Joseph hadde takun
hem fro the bosum of the fader, he
anowride, bowid into the erthe.
13 And he
putte Effraym at his ri&yogh;t hoond, that is,
at the left syde of Israel; Manasses forsothe
in his lift side, at the ri&yogh;t side of
the fader, and he putte bothe to hym.
14 The which strecchynge out the ri&yogh;t
hoond, putte vpon the heed of Effraym,
the lasse brother; the left forsothe vpon
-- --
the heed of Manasse, the which was more
thur&yogh; birthe. Jacob togidere chaungynge
the hondes,
15 blisside the sones of Joseph,
and seith, God, in whos si&yogh;t &yogh;eden my
fadres Abraham and Ysaac; God, that
fedde me fro my &yogh;ongthe into the day
that is now;
16 that aungel that delyueride
me fro alle yuels, blesse to thes children,
and my name be inwardly clepid vpon
hem, and the names of my fadris Abraham
and Ysaac; in multitude vpon erthe
growe thei.
17 Joseph forsothe seynge that
his fader hadde putte the ri&yogh;t hoond vpon
the heed of Effraym, greuowsly tok, and
the hoond of the fader takun, enforside
to heue fro the heed of Effraym, and to
ber ouer vpon the heed of Manasse.
18 And
he seide to the fader, Not so, fader, it
fallith to be, for this is the first getun;
put thi ri&yogh;t hoond vpon the heed of hym.
19 The which forsakynge seith, I knowe,
sone myne, Y knowe; and this forsothe
shal be into puples, and shal be multiplied;
but the brother of hym lasse more
than he shal be, and the seed of hym
shal growe into folk of kynde.
20 And he
blisside hem in that tyme, seiynge, In
thee Yrael shal be blissid, and shal be
seide, God do to thee as to Effraym and
Manasse; and he sette Effraym bifore
Manasse.
21 And he seith to Joseph, his
sone, Loo! Y dye, and God shal be with
&yogh;ow, and he shal brynge &yogh;ow a&yogh;en to the
loond of &yogh;oure fadris;
22 Y &yogh;yue to thee o
parti oute of thi bretheren, that Y tok of
the hoond of Amorrey, in swerde and in
my bowe.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|