1   Bee stille to me, yles, and Jentyles strengthe chaunge thei; ne&yogh;hen, and thanne speke thei; togidere to dom ny&yogh; come wee. 2   Who rerede fro the est the ri&yogh;twis, clepede hym, that he shulde folewe hymself? He shal &yogh;yue in his si&yogh;te Jentyles, and kingus he shal welde; he shal &yogh;yue as pouder to his swerd, as stubil with the wind raueshid to his bowe. 3   He shal pursue hem, `he shal passe in pes; the sty in his feet shal not apere. 4   Who these thingus wro&yogh;te and dide? clepende ieneraciouns fro the bigynnyng. I a Lord; first and the last I am. 5   Iles see&yogh;en, and trembleden; the

vtmostus of the erthe becamen stoneid, thei ne&yogh;heden, and wente to. 6   Eche to his ne&yogh;hebore shal helpen, and to his brother seyn, Tac coumfort. 7   Coumforten shal the metal smyth smytende hym with an hamer that forgede that tyme, seiende to the glyu, It is good; and he coumfortide hym with nailes, that it shulde not be moued. 8   And thou, Irael, my seruaunt, Jacob, whom I ches, the sed of Abraham, 9   my frend, in whom I toc thee fro the vtmostes of the erthe, and fro his ferre coestes I clepede thee, and seide to thee, My seruaunt thou art; I ches thee, and I caste not awei thee. 10   Ne drede thou, for I am with thee; ne bowe thou doun, for I thi God. I haue coumfortid thee, and holpen thee; and vndertoc thee the ri&yogh;thond of my ri&yogh;twis. 11   Lo! shul be confoundid, and shamen alle that fi&yogh;ten a&yogh;en thee; thei shul be as tho&yogh; thei be not, and pershe shul the men, that a&yogh;enseyn to thee. 12   Thou shalt sechen hem, and not finden; thi rebel men thei shul ben, as tho&yogh; thei ben not, and as the wasting of a man fi&yogh;tende a&yogh;en thee. 13   For I the Lord thi God, takende thin hond, and seiende to thee, Ne drede thou, for I haue holpen thee. 14   Wile thou not drede, thou werm of Jacob, that dead &yogh;ee ben of Irael. I haue holpen thee, seith the Lord, and thin a&yogh;een biere, the hoeli of Irael. 15   I haue set thee as a newe wayn thresshende, hauende pikede poeles sawende; thou shalt thresshe mounteynes, and to-my-nushen, and putten as pouder hillis. 16   Thou shalt wynewe them, and the wind shal take awei, and the whirlewind shal scatere them; and thou ful out shalt io&yogh;en in the Lord, and in the hoeli of Irael shalt glade. 17   Nedi and pore men shul seche watris, and ther ben not; the tunge of them with thrist driede. I the Lord shal out heren hem, I God of

Irael shal not forsake them. 18   I shal opene in he&yogh;e hillis flodys, and in the myddel of feeldis welles; I shall sette desert in to pondis of watris, and the lond withoute weie in to riueres of watris. 19   I shal &yogh;yue in wildernesse ceder, and thorne, and myrt tree, and oliue tree; I shal sette in desert fyrr tree, and vlm tree, and box togidere. 20   That thei see, and wite, and bethenke, and vnderstonde togidere; for the hond of the Lord dide this, and the hoeli of Irael foormede it. 21   Ny&yogh; doth &yogh;oure dom, seith the Lord; bringeth to, if any thing parauenture &yogh;ee han, seith the king of Jacob. 22   Come thei ny&yogh;, and telle thei to vs, what euer thingus ben to come; the rathere thingus that weren, tellith, and wee shul putte oure herte, and wite; the laste thingis of hem, and that ben to come, shewith to vs. 23   Telleth that ben to come in to tyme to come, and wee shul wite, for goddis &yogh;ee ben; well also or euele, if &yogh;ee moun, doth; and speke wee, and see wee togidere. 24   Lo! &yogh;ee ben of no&yogh;t, and &yogh;our werc `of that thyng that is not; abhominacioun he is, that ches &yogh;ou. 25   I rerede fro the north, and he shal come from the rising vp of the sunne; clepe he shal my name. He shal bringe to the cheef maistris as clei, and as a daubere, `or a potter, totredende the lowe erthe. 26   Who tolde fro the bigynnyng, that wee witen, and fro the begynnyng, that wee sey, Thou art ri&yogh;twis? ther is not a tellere, ne a biforn seiere, ne herere &yogh;oure wrdis. 27   The firste to Sion shal sei, Lo! I am ny&yogh;; and to Jerusalem an euangelist I shal &yogh;yue. 28   And I sa&yogh;, and ther was not of these any man that &yogh;ide in counseil, and `askid answerde a wrd. 29   Lo! alle vnri&yogh;twise, and veyne the werkes of hem; wynde, and with ynne voide the symulacris of them.

Previous section

Next section