Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
ISAIAH.
Here begynneth the prolog in the book of Ysaye, the prophete.
No man, whan the profetes he shal seen with versis to ben discriued, in metre eyme
he hem anent the Ebrues to ben bounden, and any thing lic to han of Salmes, or of
the werkus of Salomon; but that in Demostene and Tullio it is wont to ben do, that bi
dyuyseouns, and vnder distincciouns thei ben writen, the whiche forsothe in prose, and
not in vers wryten. Wee forsothe, to the profit of rederes purueyende, the newe remenyng
with a newe maner of writing han `distinctly write. And first, of Isaie it is
to wite, that in his sermoun he is wys; forsothe as a noble man, and of curteis fair
speche, ne any thing is mengd of cherlhed in his faire speche. Wherfore it falleth, that
the translacioun shal not moun kepe the flour of his sermoun, biforn othere. Theraftir
also this is to be leid to, that not more he is to be seyd a profete, than euaungelist.
So forsothe alle the mysteries of Crist `and the chirche to cleer, `or cleerli, he pursuede,
that not hym thou weene of thyng to come to profecien, but of the thingis
passid storie to weue. Wherfore I eyme the Seuenty Remenoures that tyme not to
han wold the sacramens of ther beleeue to shewe ful clerly to the hethene, lest hoeli
to dogges, and margarites to swyn thei &yogh;eeue. The whiche whan this making &yogh;ee
shul rede, of hem &yogh;ee shul taken heed, `or perceyue, hid thing. Ne I vnknowe
of hou myche trauaile it be the profetes to vnderstonden, ne li&yogh;tly any man to moun
demen of the remenyng, but if he schal vnderstonden byfore he schal reden; wee also
to ben opene to the bitingus of manye men, the whiche bi enuye styrende, that that
thei moun not han, thei dispisen. Thanne I witende and slee&yogh;, in to the flaume putte
the hond; and nerthelatere this of no&yogh;esum rederes I pre&yogh;e, that as Grekes after the
Seuenty translatoures, Aquylam, and Symachum, and Theodocian thei reden, or for
studie of ther doctrine, or that the Seuenty more they vnderstonde of the togidere
leiynge of hem, so and these namely oon remenour aftir the rathere vouche thei saf to
han. Rede thei rathere, and aftirward dispise they; lest thei ben seen not of dom, but
of presumpcioun of hate vnknowen thyngus to dampnen. Forsothe Isaie profeciede in
Jerusalem and in Jewerie, not &yogh;it the ten lynages led in to caitifte; and off euer either
rewme, now togidere, now seuerendely, he ordeynede the profecie. And tho&yogh; other
while he bihold to the present storie, and aftir the caitifte of Babiloyne he betocne the
a&yogh;eencomyng of the puple in to Jewerie, nerthelatere al his bisynesse is of the cleping
-- --
of Jentiles, and of the comyng of Crist, whom hou myche more &yogh;ee loouen, o Paule
and Eustoche, so myche more of hym asketh, that for the present bacbityng `by
which me enemys vncesendely to-tern, he to me &yogh;elde meede in tyme to come,
that wot me for that thing to han swat in the lernyng of a straunge tunge, lest the
Jewis lengere shulden `put repreue to the chirchis of hym, of the falshed of
scriptures.
Here endith the prolog, and now begynneth the book of Ysaie, the prophete.
Here bigynneth a general prolog for alle the bokis of profetis suynge.
As seynt Jerom seith in the prolog of Ysaie, Isaie is ful witti and ful opyn in his
writyng in Ebreu, thou&yogh; the translacioun in to Latyn mi&yogh;te not kepe the fairnesse
of speche. Isaye is worthi to be seid not oneli a profete, but more, a gospellere, for
he declarith so opynli the mysteries of Crist and of hooli chirche, that thou gesse
hym not oneli to ordeyne a profesie of thing to comynge, but to ordeyne a storie
of thingis passid. Ysaie profesiede in Jerusalem and in Judee, whanne the ten
lynagis of Israel weren not &yogh;it led in to caitiftee; and he ordeyneth a profesie of
euer either rewme, sum tyme of both togidere, sum tyme of ech bi it silf. And
whanne Ysaie biholdith sum tyme to the present storie, and signefieth the comynge
a&yogh;en of the puple in to Judee aftir the caitifte of Babiloyne, netheles al his bisynesse,
that is, principal entent, is of the clepyng of hethene men, and of the comyng of
Crist. Al this is the sentence of Jerom in the prolog of Ysaie. Here it is to
vndurstonde, that Isaie bigan to profesie bifore that the ten lynagis weren led in to
caitiftee of Assiriens, as Jerom seith here; but he profesiede aftir this caitiftee, aftir
Ezechies deth, in the tyme of Manasses, as it is seid in the fourthe book of Kyngis
the twentithe chapitre, and in many mo places. This seith `a postille on Jeroms
prolog on Ysaie. For as Ebreis seien, and Lire witnessith on the firste chapitre
of Isaie, Manasses ordeynede and demyde Isaye to be sawid with ynne a cedre tree,
that closid hym with ynne it silf bi myracle, whanne Manasses hadde demed hym
vniustli to deth. Also alle profetis that ben not teld opynli in the text, whanne and
in what tyme thei profesieden, profesieden in the same tyme in which the profetis
goynge next bifore profesieden, that ben teld in the text vndur whiche kyngis and
tymes thei profesieden, as Jerom seith in his prologe on the twelue Profetis, and it
is sette in the bigynnyng of Osee. Comynli alle the derk places of the profetis
moun be vndurstondun li&yogh;tli bi thre reulis. The firste is this, that the principal entent
of the profetis is to declare the mysterie of Cristis incarnacioun, passioun, resurreccioun,
ascensioun, and the comyng to the general doom, and the pupplischyng of
the gospel, and the conuercioun of hethene men, and the tribulacioun of hooli chirche
in this lijf, and the blis of heuene therfor. The secounde reule is this, that the
profetis warnen the puple of Jewis of her grete synnes, and exciten hem to do
-- --
penaunce; and thanne thei schulen gete remyssioun of her synnes, and grace in present
tyme, and glorie with outen ende; ellis thei schulen haue tribulacioun in this lijf,
and peyn with outen ende. The thridde reule is this, that the profetis rehersen
ofte benefices &yogh;ouun of God bifor to the Jewis, to coumforte hem to &yogh;yue credence
to goodis bihi&yogh;t in her profesies; and thanne the stories of Moises lawe, ether of
Josue, Judicum, Regum, and Paralipomenon, and of othere historial bookis schulen
be wel lokid; and schortli to seie, the profetis schulen be expouned bi the text of
Moises lawe, and of othere historial bookis of the Elde Testament, ether bi the text
of the Newe Testament. The literal vndurstondyng of hooli scripture is the ground
of al gostli vndurstondyng therof, that is, of allegorik, of moral, and of anagogik.
No goostli vndurstondyng is autentik, no but it be groundid in the text opynli, ether
in opyn resoun, suynge of principlis, ether reulis of feith, as seynt Austin witnessith
opynli in his pistle to Vincente, Donatiste, and in his book of Soliloquies, and Jerom
on Jonas, and Lire on the bigynnyng of Genesis, and in many placis of hooli scripture,
and Ardmakan in his book of Questiouns of Armenyes. Therfor men moten seke
the treuthe of the text, and be war of goostli vndurstondyng, ether moral fantasie,
and &yogh;yue not ful credence therto, no but it be groundid opynly in the text of hooli
writ, in o place or other, ethir in opyn resoun, that may not be auoidid; for ellis
it wole as likyngli be applied to falsnesse as to treuthe, and it hath disseyued grete
men in oure daies, bi ouer greet trist to her fantasies. Literal ether historial
vndurstondyng techith what thing is don; allegorik techith what we owen for to
bileue; moral ether tropologik techith what we owen to do to fle vices, and kepe
vertues; anagogik techith what we owen to hope of euerlastynge meede in heuene.
Of these foure vndurstondyngis `schal be seid pleynlier, `if God wole, on the bigynnyng
of Genesis. Also it is to wyte, that the profetis speken sum tyme bi figuratif
speche, and liknen men to vnresonable beestis, and clepen men bi figuratif speche,
liouns, beris, culueris, and ofte othere vnresonable beestis, for certeyn synnes whiche
thei vsen acordynge with the kyndis of vnresonable beestis; as men ben clepid
liouns for pride, ether raueyn, ether sum other synne; and sum tyme a lioun signefieth
Crist, for his power, and sum tyme a lioun signefieth the deuel, for tirauntrie
and raueyn; and men ben clepid beeris, for gredynesse ether glotonye, and mulis,
for letcherie; and so of othere beestis and othere synnes. Men ben clepid culueris
sum time for madnesse, and sum tyme for innocence, symplenesse, and charite. Bi
these reulis and bisi studiyng of the text, men moun li&yogh;tli vndurstonde the derk
placis of profetis; and algatis loke wel that the sentence takun of the text be trewe,
and acorde with charyte, and thanne it is the sentence of the Hooli Goost, as seynt
Austyn seith.
Here endith the prolog on Ysaye.
-- --
Here bigynneth the Profecie of Ysaye.
CAP. I.
1 The viseoun of Isaie, sone of Amos,
that he sa&yogh; vp on Judam and Jerusalem,
in the da&yogh;es of Osie, Joathan, Acha&yogh;,
Esechie, kingus of Juda.
2 Hereth, &yogh;ee
heuenus, and with eres parceyue, thou
erthe, for the Lord spac. Sonus I nurshede
out and enhauncede; thei forsothe
dispiseden me.
3 The oxe kne&yogh; his weldere,
and the asse the cracche of his
lord; Irael forsothe me kne&yogh; not, and
my puple vnderstod not.
4 Wo to synful
folc, to the puple heuy with wickidnesse,
to the shreude sed, to the sonus ful
of hidous giltes; thei forsoken the Lord,
thei blasfemeden the hoeli of Irael,
thei ben aliened awei bacward.
5 `Vp on
what thing I shal smyte &yogh;ou, ferthermor
addende lawe breche, `or trespassing
a&yogh;eyns the lawe? Eche `hed ful of langour,
and eche `herte ful of mornyng.
6 Fro the plante of the foot vnto the top,
ther is not in hym helthe; wounde, and
wannesse, and siknesse swellende is not
bounden aboute, ne curid with leching,
ne nurshid with oile.
7 &YOGH;oure lond is
desert, &yogh;oure cites ben brend vp with
fyr; &yogh;oure regioun deuouren biforn &yogh;ou
alienus, and it shal be desolat as in enemyful
wastete.
8 And the do&yogh;ter of Sion
shal ben forsaken as a shadewy place in
a vyne&yogh;erd, and as an hylet in a place
of goordes, and as a cite that is wastid.
-- --
9 But &yogh;if the Lord of ostes hadde laft to
vs sed, as Sodom wee hadden ben, and
as Gomorra lijc wee shulden ben.
10 Hereth
the wrd of the Lord, &yogh;ee princes of
Sodom; and parceyueth with eres the
lawe of &yogh;oure God, &yogh;ee puple of Gomorre.
11 What to me the multitude of &yogh;oure slayn
sacrifise? seith the Lord. Ful I am; the
brent sacrefises of wetheres, and the tal&yogh;
of fatte bestus, and the blod of calues,
and of lombes, and off goet, I wolde not.
12 Whan &yogh;ee shulden come biforn my si&yogh;te,
who so&yogh;te these thingus of &yogh;oure hondis,
that &yogh;ee shulden go in my porches?
13 Ne
bringe &yogh;ee to more sacrifises in veyn;
encens abhominacioun is to me; the
newe moone, and sabot, and othere festus
I shal not bern.
14 Wicke ben &yogh;oure cumpanyes;
&yogh;oure kalendis and &yogh;oure solempnetees
hatede my soule; thei ben
mad to me greuous, I trauailede suffrende.
15 And whan &yogh;ee shul strecche out
&yogh;oure hondis, I shal turne awei myn e&yogh;en
fro &yogh;ou; and whan &yogh;ee shul multeplien
orisoun, I shal not heren; forsothe &yogh;oure
hondis ben ful of blod.
16 Be &yogh;ee washen,
beth clene; taketh awei the euel of
&yogh;oure tho&yogh;tes fro myn e&yogh;en; resteth to do
shreudely, lerneth to do wel.
17 Secheth
dom, helpeth to the opressid, demeth to
the faderles child, defendeth the widewe.
18 And cometh, and vndernemeth mee, seith
the Lord. If &yogh;oure synnes weren as
flaume red silc, as sno&yogh; thei shuln ben
mad white; and if thei weren rede as
blod red silc, as whit wlle thei shul be.
19 If &yogh;ee wiln, and shuln heren me, the
goodis of the erthe &yogh;ee shuln ete.
20 That
-- --
if &yogh;ee wiln not, and me to wrathe &yogh;ee
shulden terren, swerd shal deuoure &yogh;ou;
for the mouth of the Lord spac.
21 What
maner is mad a strumpet the feithful
cite ful of dom? ri&yogh;twisnesse dwellede
in it; now forsothe mansleeres.
22 Thi
syluer is turned in to dros; thi wyn is
mengd with water.
23 Thi princes vnfeithfull,
felawes of theues; alle thei
loouen &yogh;iftus, folewen &yogh;eldyngus; to the
faderles child thei demen not, the cause
of the widewe goth not in to them.
24 For
that, seith the Lord God of ostes, strong
of Irael, Allas! I shal be coumfortid vp
on my straunge enemys, and I shal be
vengid vp on myn enemys, that shulden
be frendis.
25 And I shal turne myn hond
to thee, and I shal sethen out to the
pure thi dros, and I shal taken awei al
thi tyn.
26 And I shal restoren thi domesmen,
as they weren biforn, and thi counseileris,
as bi old tyme. Aftir these
thingus thou shalt ben clepid the cite of
the ri&yogh;twis, the cheef citee of the feithful.
27 Syon in dom shal ben a&yogh;ee bo&yogh;t,
and thei shul bringe it a&yogh;een in to ri&yogh;twisnesse;
28 and he shal to-trede the hydous
gilteres and the synneres togidere,
and thatt forsoken the Lord, shul ben distro&yogh;id.
29 Thei shul ben confoundid forsothe
of the maumetes, to the whiche thei
sacrifieden; and &yogh;ee shuln ben shamed
vp on the gardynes, that &yogh;ee hadden
chosen.
30 Whan &yogh;ee shul ben as an oek,
the leues fallende doun, and as a gardyn
with oute water.
31 And &yogh;oure strengthe
shal ben as a `deed sparke of a flax top,
and &yogh;oure werk as a sparcle; and eithir
shal be brend vp togidere, and ther shal
not ben that quenche.
-- --
CAP. II.
1 The wrd that sa&yogh; Isaie, the sone of
Amos, vp on Judam and Jerusalem.
2 And
ther shal be in the laste da&yogh;es beforn mad
redi the mount of the hous of the Lord
in the cop of mounteynes, and it shal be
rered out vp on hillys. And ther shul
flowe to it alle Jentilis;
3 and ther shul go
many puples, and seyn, Cometh, ste&yogh;e
wee vp to the mount of the Lord, and
to the hous of God of Jacob; and he shal
teche vs his weyes, and wee shul go in
his sties, `or pathes. For fro Sion shall
go out the lawe, and the wrd of the Lord
fro Jerusalem.
4 And he shal deme Jentiles,
and vndernymen many puples; and
thei shul bete togidere their swerdes in
to shares, and ther speres in to sithes;
ther shal not reren folc a&yogh;en folc a swerd,
ne thei shul ben enhauntid more to
bataile.
5 &YOGH;ee hous of Jacob, cometh, and
go wee in the li&yogh;t of the Lord oure God.
6 Forsothe thou hast throwen afer thi puple,
the hous of Jacob, for thei ben fulfild
as sum tyme; and deuynoures thei
hadden, as Filisteis, and to alien childre
thei cleueden.
7 Fulfild is the erthe of
siluer and gold, and ther is noon ende of
the tresores of it; and fulfild is his lond
with hors, and vnnoumbreable the foure
horsid carres of it.
8 And fulfild is his lond
with maumetes, the werk of ther hondis
thei honoureden, that `ther fingris maden;
and a man bowede hymself,
9 and meekid
is the stronge man. Thanne ne for&yogh;yue
thou to them.
10 Go in to the ston, be
thou hid in a dich with erthe, fro the
face of the dreede of the Lord, and fro
the glorie of his mageste.
11 The e&yogh;en of
the he&yogh;e man ben meekid, and ther shal
-- --
ben inwardly crookid the hei&yogh;te of
stronge men; forsothe the Lord alone
shal ben enhauncid in that dai.
12 For the
dai of the Lord of ostes vp on eche proud
man and hee&yogh;, and vp on eche enhauncende
hymself, and he shal be mekid;
13 and vp on alle the cedres of Liban he&yogh;e
and vpri&yogh;t, and vp on alle the oekis of
Basan,
14 and vp on alle the he&yogh;e mounteynes,
and vp on alle the `rered vp
hilles;
15 and vp on eche he&yogh; tour, and vp on
eche strengthyd wal;
16 and vp on alle the
shipis of Thars, and vp on alle thing
that is fair in si&yogh;t.
17 And ther shal be
inwardly bowid al the hei&yogh;nesse of men,
and ther shal be meekid the hei&yogh;te of
stronge men; and ther shal be rered vp
the Lord alone in that day,
18 and the
maumetes hoelly shul be to-brosid.
19 And
thei shul go in to dennes of stones, and
in to swolewes of the erthe, fro the face
of the drede of the Lord, and fro the
glorie of his mageste, whan he shal rise
to smyten the erthe.
20 In that day shal
a man throwe awey the maumetes of
his siluer, and the symulacris of his gold,
that he hadde mad to hym, that he
shulde honoure moldewerpes and reremees.
21 And he shal go in to the chynes,
`or creuessis, of stones, and in to the
dennes of huge stones, fro the face of the
drede of the Lord, and fro the glorie of
his mageste, whan he shal risen to smyte
the erthe.
22 Resteth thanne fro a man,
whos spirit is in his nose therles, for hei&yogh;
holden is he.
CAP. III.
1 Loo! forsothe the lordshepere, Lord
of oestes, shal do awei fro Jerusalem and
fro Juda the stalwrthe, and the stronge,
and al the strengthe of bred, and al the
-- --
strengthe of water;
2 the stronge, and the
man fi&yogh;tere, and domesman, and profete,
and deuynour,
3 and the olde prince vp on
fifty, and the wrshepeful in cheere, and
counseilor, and wis man of cheef crafty
thingus, and the prudent of priue speche.
4 And I shal &yogh;yue childer the princes of
hem, and the mad wommanysh men shuln
lordshipen to them.
5 And the puple shal
falle, man to man, eche to his ne&yogh;hebore;
ther shal striue the child a&yogh;en the old
man, and the vnnoble a&yogh;en the noble.
6 A
man forsothe shal take his brother, the
homli man of his fadir, and seyn, Clothing
is to thee, oure prince be thou; this
forsothe falling vnder thin hond.
7 And
he shal answern in that day, seiende, I
am not a leche, and in myn hous is not
bred, ne clothing; wileth not sette me
prince of the puple.
8 Ther fel doun
forsothe Jerusalem, and Juda fel with;
for the tunge of them, and the findingus
`of hem a&yogh;en the Lord, that thei shulden
terre the e&yogh;en of his mageste.
9 The knowing
of ther chere shal answere to them;
and ther synne as Sodom thei precheden,
and hidden not. Wo to the soule of hem,
for &yogh;olden ben to them eueles.
10 Seith to
the ri&yogh;twis, for weel; for the frute of hys
fyndyngus he shal ete.
11 Wo to the vnpytous
man in to euel; &yogh;elding forsothe
of his hondis shal be do to hym.
12 My
puple his pleteres, `or wrong axers,
spoileden, and wymmen lordshipeden of
it. My puple, that blisful thee seyn, thee
thei disceyuen, and the weie of thi goyngus
scateren.
13 The Lord stant to
deme, and he stant to the puples to be
demed;
14 the Lord to the dom shal come,
with the elderes of his puple, and with
his princes. &YOGH;ee forsothe han distro&yogh;ed
my vyne&yogh;erd; and the raueyn of the pore
in &yogh;oure hous.
15 Whi to-brose &yogh;ee my
-- --
puple, and the faces of pore men &yogh;ee
confounden? seith the Lord God of
ostes.
16 And the Lord God seide, For thi
that arered ben the do&yogh;tris of Sion, and
thei wenten with stra&yogh;t out necke, and
in beckes of e&yogh;en &yogh;iden, and flappeden
with hondis for io&yogh;e, and &yogh;iden, and with
ther feet in curious goyng &yogh;iden,
17 the
Lord shal fully maken ballid the top of
the do&yogh;tris of Syon, and the Lord the
her of hem shal nakenen; and for ournement
shal be shenshipe.
18 In that dai
the Lord shal don awei the ournement
of shon,
19 and boces, and be&yogh;es, and
brooches, and armcercles, and mytris,
and combys,
20 and ribanes, and `reuerses
at the hemmis, and `oynement boxes,
and ere ringus,
21 and ryngus, and iemmes
in the frount hangende,
22 and chaunging
clothis, and litil palles, and shetes, and
pynnes,
23 and sheweres, and `necke couercheues,
and filetes, and roketes.
24 And
ther shal be for swote smel stync, and
for girdil a litil corde; and for crisp her
ballidnesse, and for the brest bond an
heire.
25 Also thi most faire men with
swerd shuln falle, and thi stronge men
in bataile.
26 And thei shuln sorewen, and
weilen shuln hir &yogh;ates; and desolat in
the erthe she shal sitten.
CAP. IV.
1 And seuen wymmen shul taken o man
in that dai, seiende, Oure bred we shul
ete, and with oure clothis wee shul be
couered; onli be inwardly clepid thi
name vp on vs, do awei oure repref.
2 In
-- --
that dai shal be the buriounyng of the
Lord in gret doyng and glorie; and frut
of the erthe hee&yogh;, and ful out io&yogh;ing to
them that shul be saf of Irael.
3 And it
shal be, eche that shal be laft in Sion,
and residue in Jerusalem, hoeli shal be
clepid; eche that is writen in lif in Jerusalem.
4 For the Lord shal washen awey
the filthes of the do&yogh;tris of Sion, and the
blod of Jerusalem shal wasshen fro the
myddes of it, in spirit of dom, and spirit
of brennende looue.
5 And the Lord bro&yogh;te
forth vp on eche place of the mount of
Sion, and wher he is inwardli clepid, a
cloude bi dai, and smoke, and shynyng
of fyr flaumende in ny&yogh;t; vp al forsothe
the glorie ouercoueryng.
6 And a tabernacle
shal ben in to a shadewe hilet of
the dai, fro brennyng, and in to sikirnesse
and hiding, from whirlewynd and
from reyn.
CAP. V.
1 I shal synge to my looued a song off
`myn emes sone, of his vyne&yogh;erd. The
vyne&yogh;erd is mad to my looued, in the
horn `to the sone of oile.
2 And he heggede
it, and stones he ches of it, and plauntede
a chosen vyne&yogh;erd; and he bilde vp a
tour in the myddel of it, and a presse
he rerede vp in it; and he abod, that it
shulde bringe forth grapes, and it bro&yogh;te
forth wilde vynes.
3 Now thanne, &yogh;ee
dwelleris of Jerusalem, and men of Juda,
demeth betwe me and my vyne&yogh;erd.
-- --
4 What is that I aw&yogh;te mor to do to my
vyne&yogh;erd, and dide not to it? whether
that I abod, that yt shulde bringe forth
grapes, and bro&yogh;te forth wilde vynes?
5 And now I shal shewen to &yogh;ou, what I
shal do to my vyne&yogh;erd. I shal do a wei
his heg, and it shal be in to destruccioun;
I shal breke doun his wal, and it
shal ben in to `to-tredyng;
6 and I shal
setten it desert. It shal not be kut, and
it shal nott be doluen, and ther shul
ste&yogh;e vp vp on it breres and thornes; and
to the cloudis I shal comaunde, that thei
reyne not vp on it weder.
7 Forsothe the
vyne&yogh;erd of the Lord of hostes is the
hous of Irael, and the men of Juda his
delytable buriounyng. I abod, that it
shulde do dom, and lo! wickidnesse; and
ri&yogh;twisnesse, and lo! cry.
8 Wo that ioynen
hous to hous, and feeld to feeld coupleth,
vn to the terme of a place. Whether
dwellen &yogh;ee shuln alone in the myddel
of the erthe?
9 In myn eres ben these
thingus, seith the Lord of ostes; but &yogh;if
manye houses grete and faire shul be
desert, and withoute dwellere.
10 Forsothe
ten acris of vyne&yogh;erdis shul maken o
potell wyn, and thretti bussheles of sed
shul make thre bussheles.
11 Wo that risen
erly to drunkenhed to be folewid, and to
drinken vn to euen, that with wyn &yogh;ee
brenne.
12 Harpe, and syngende instrument,
and tymbre, and trumpe, and wyn
in &yogh;oure festes; and the werk of the Lord
&yogh;ee biholden not, ne the werkes of his
hondis &yogh;ee waiten.
13 Therfor lad caitif is
my puple, that hadde not kunnyng; and
his noble men dieden thur&yogh; hunger, and
his multitude thur&yogh; thirst al out driede.
14 Therfore helle spredde abrod his soule,
and openede his mouth with oute any
-- --
terme; and ther shul falle doun his
stronge men, and his puple, and hee&yogh;e,
and his gloriouse to it.
15 And ther shal
be ful crookid a man, and meekid a
strong man; and the e&yogh;en of `he&yogh;e men
shul be threst doun.
16 And ther shal be
enhauncid the Lord of ostes in dom, and
the hoeli God shal be halewid in ri&yogh;twisnesse.
17 And lombis shul be fed aftir ther
order, and desertes in to plente turned
comelingus shul ete.
18 Wo that drawen
wickidnesse in the litle cordes of vanyte,
and as the bond of a wayn synne;
19 that
seyn, Hee&yogh;e, `or haaste, he, and soone
come his werk, that wee see; and ne&yogh;he,
and come the counseil of the hoeli of
Irael, and wee shul witen it.
20 Wo that
seyn euel good, and good euel; puttende
derknesses li&yogh;t, and li&yogh;t derknesses; puttende
bitter in to swete, and sweete in to
bitter.
21 Wo that wise ben in &yogh;oure e&yogh;en,
and bifor &yogh;ouself slee&yogh;e.
22 Wo that my&yogh;ty
ben to drinke wyn, and stronge men to
be mengd drunkynhed;
23 that iustefien the
vnpitous for &yogh;iftes, and the ri&yogh;twisnesse
of the ri&yogh;twyse &yogh;ee taken awey fro hym.
24 For that, as deuoureth the tunge of fyr
stobil, and the hete of flaumme brenneth
out, so the roote of hem as a gnast shal
be, and the buriownyng of hem as
pouder shal ste&yogh;e vp; forsothe thei
casten awei the lawe of the Lord of
ostes, and the speche of the hoeli of
Irael thei blasfemeden.
25 Therfor wrathede
the wodnesse of the Lord in his
puple, and stra&yogh;te out his hond vp on it,
and smot it; and the mounteynes ben disturbid,
and mad ben the `deed carens
-- --
of hem as drit in the myddel of stretes.
In alle these thingus is not turned awei
his wodnesse, but &yogh;it his hond stra&yogh;t out.
26 And he shal rere vp a signe in naciouns
aferr, and he shall whistle to hym fro
the coestes of the erthe; and lo! hastid
he shal come swiftli.
27 Ther is not failing
ne trauailyng in hym; he shal not nappen,
ne slepen, ne shal ben loosid the
girdil of his renes, ne shal be to-broke
the thowng of his sho&yogh;yng.
28 His arwis
sharpe, and alle his bowes bent; the cles
of the horses of hym as flynt, and his
wheles as the byre of tempest.
29 His
roring as off a leoun; he shal roren as
the whelpis of leouns; he shal gnasten,
and holden the prei, and biclippen, and
ther shal not be, that delyuere out.
30 And
ther shal sowne vp on hym in that day,
as the soun of the se; wee shul biholde
in to the erthe, and lo! derknesses of
tribulacioun, and li&yogh;t al to-derked is in
the derknyng of hym.
CAP. VI.
1 In the &yogh;er `in which diede king Osias,
I sa&yogh; the Lord sittende vp on an hei&yogh;
sete, and rered vp; and ful was the hous
of his mageste, and tho thingus that
vnder hym weren, fulfilden the temple.
2 Serafyn stoden vp on it, sixe wenges to
the oon, and sixe to the other; with two
they couereden the face of hym, and with
two thei couereden the feet of hym, and
with two thei flown.
3 And thei crieden
the tother to the tother, and seiden,
Hoeli, hoely, hoeli, Lord God of ostes;
ful is al the erthe of the glorie of hym.
4 And to-moued ben the thresholdes of the
heenglis fro the vois of the criende, and
the hous fullfild is with smoke.
5 And I
seide, Wo to me, for I heeld my pes; for
-- --
a man defoulid in lippis I am, and in
the myddel of the puple defoulid lippes
hauende I dwelle, and the king Lord of
ostes I sa&yogh; with myn e&yogh;en.
6 And ther
flei&yogh; to me oon of the serafyn, and in
his hond a cole, that with the toenge he
toc fro the auter.
7 And he touchede my
mouth, and seide, Lo! I haue touchid
with this thi lippes, and ther shal be
don awei thi wickydnesse, and thi synne
shal be clensid.
8 And I herde the vois of
the Lord, seiende, Whom shal I sende,
and who shal go to &yogh;ou? And I seide,
Lo!
9 I am; send me. And he seide, Go,
and thou shalt sey to this puple, Hereth
herende, and wileth not vnderstonde; and
seeth a viseoun, and wileth not knowen.
10 Blynde out the herte of this puple, and
his eres agregge, and his e&yogh;en close; lest
par auenture he see with his e&yogh;en, and
with his eres here, and with his herte
vndyrstonde, and be conuertid, and I
hele hym.
11 And I seyde, Hou longe,
Lord? And he seide, To the tyme that
ben desolat the citees with oute dwellere,
and houses with oute man. And the lond
shal be laft desert,
12 and aferr shal make
the Lord men. And ther shal be multeplied
that was laft in the myddel of the
erthe, and &yogh;it in it tithing;
13 and it shal
be conuertid, and it shal be in to shewyng
as a terebynt, and as an oek, that
spredeth out his braunches; hoely sed it
shal ben, that that shal stonden in it.
CAP. VII.
1 And it is don in the da&yogh;es of Achaz,
sone of Joathan, sone of Osie, king of
Juda, ther ste&yogh;ede vp Rasyn, king of
Cyrie, and Fascee, the sone of Romelie,
king of Irael, in to Jerusalem, to fi&yogh;te
a&yogh;en hym; and thei my&yogh;te not ouercome
it.
2 And thei tolden to the hous of Dauid,
-- --
seiende, Siria restede vp on Effraym, and
to-moued is his herte and the herte of
his puple, as ben moued the trees of
wodis fro the face of the wynd.
3 And
the Lord seide to Isaie, Go out in to a&yogh;encomyng
of Achaz, thou, and that is laft,
Jasub, thi sone, to the ende of the water
condute of the ouere pond, in the weie
of the feeld of the fullere.
4 And thou
shalt sey to hym, See, that thou holde
thi pes; wile thou not dreden, and thin
herte be not ferd of the two tailes of these
smokende fyr brondis in to the wrathe
of the wodnesse, of Rasyn, king of Sirie,
and sone of Romelie.
5 For thi that euel
counseil he wente in a&yogh;en thee, Ciria, and
Effraym, and the sone of Romelye, seiende,
Ste&yogh;e wee vp to Judam,
6 and rere
wee hym, and pulle wee hym vp to vs;
and putte wee a king in his myddel, the
sone of Thabel.
7 These thingus seith the
Lord God, This shal not be, and shal not
stonde;
8 but the hed of Sirie Damasch,
and the hed of Damasch Rasyn; and &yogh;it
sixti and fyue &yogh;er, and Effraym shal cese
to ben a puple;
9 and the hed of Effraym
Samarie, and the hed of Samarie, the
sone of Romelie. If &yogh;ee shul not leeuen,
&yogh;ee shul not abide stylle.
10 And the Lord
leide to to speke to Achaz,
11 seyende, Aske
to thee a tokne fro the Lord thi God, in
to the depthe of helle, or in to hei&yogh;te
aboue.
12 And Achaz seide, I shal not aske,
and I shal not tempte the Lord.
13 And
he seyde, Hereth thanne, &yogh;ee the hous of
Dauid; whether litil to &yogh;ou is to ben
greuous to men, for &yogh;ee ben greuous and
to my God?
14 For that he the Lord shal
&yogh;yue to &yogh;ou a tocne. Lo! a mayde shal
conceyue, and bern a sone; and thou
shalt clepe his name Emanuel.
15 Butter
and hony he shal ete, that he kunne repreuen
-- --
euel, and chesen good.
16 For er
the child kunne repreuen euel, and chesen
good, the lond shal be forsaken, the
whiche thou hast abhominacioun of, fro
the face of ther two kingus.
17 The Lord
shal bringe to vp on thee, and vp on thi
puple, and vp on the hous of thi fader,
da&yogh;es that camen not fro the da&yogh;es of the
seueryng of Effraym fro Juda, with the
king of Assiries.
18 And it shal be, in that
day the Lord shal whistle to the fle&yogh;e,
that is in the vtmostes of the flodus of
Egipt; and to the bee, that is in the lond
of Assur;
19 and thei alle shuln come, and
resten in the stremes of valeys, and caues
of stones, and in alle busshi places, and
in alle holis.
20 In that dai the Lord shal
shauen in a sharp rasour in hem, that
be&yogh;unde the flood ben, in the king of
Assiries, hed, and the heres of feet, and
eche berd.
21 And it shal be, in that day
a man shal nurshen a cow of oxen, and
two shep,
22 and for plente of mylc he shal
eten butter; butter and hony shal `ete
eche man, that shal be laft in the myddel
of the lond.
23 And it shal be, in that
day eche place wher shul be a thousend
vynes for a thousend syluer penys, and
in to thornes and in to breres they shul
be,
24 with arwes and bowe thei shul go
in thider; forsothe breres and thornes
shul be in al the lond.
25 And alle hilles
that in a wode bil shul be purgid, `or
kytt off, ther shal not come thider ferd
of thornes and of breres; and it shal be
in to oxe leswe, and in treding of feld
beste.
CAP. VIII.
1 And the Lord seide to me, Tac to
-- --
thee a gret boc, and writ in it with the
poyntel of a man, Swiftli spoiles tac
awey, soone refe.
2 And I toc to me feithful
witnesses, Vrie, the prest, and Sacharie,
the sone of Barachie.
3 And I wente
to a prophetesse; and she conceyuede,
and bar a sone. And the Lord seide to
me, Clep his name Haste thou spoiles to
tac awey, hee&yogh;e thou to refen.
4 For er the
child kunne clepe his fader and his moder,
shal be taken awei the strengthe of
Damasch, and the spoiles of Samarie, bifor
the king of Assiries.
5 And the Lord
leide to to speke to me,
6 seiende, For thi
that this puple hath cast awey the watris
of Siloe, that gon with cilence, and more
toc to Rasyne, and the sone of Romelie,
for that lo!
7 the Lord shal bringe to vp
on hem watres of the flod stronge and
manye, the king of Assiries, and al the
glorie of him; and he shal ste&yogh;en vp
vp on alle his ryueres, and flowen vp
on alle his stremes.
8 And he shal gon
thur&yogh; Judam flowende, and passende `vn
to the necke he shal come; and ther
shal be the spredyng out of his wenges,
fulfillende the breede of thi lond, O!
9 Emanuel. Beth gedered, &yogh;ee puples, and
beth bounde togidere; and hereth, alle
&yogh;ee londis aferr. Beth coumfortid, and be
&yogh;ee ouercomen; `girdeth &yogh;ou, and beth
ouercomen;
10 goth in counseil, and it shal
be scatered; speketh a wrd, and it shal
not be do, for with vs is God.
11 These
thingus forsothe seith the Lord to me, as
in a strong hond he ta&yogh;te me, lest I shulde
go in to the weie of this puple, seiende,
Seith not,
12 Coniuracioun, alle thingis forsothe
that speketh this puple is coniuracioun;
and his drede ne drede &yogh;ee, ne
takith ferd.
13 The Lord of hostes him
halewith, and he &yogh;oure inward drede, and
he &yogh;oure outward drede; and he shal be
to &yogh;ou in to halewing;
14 in to a ston forsothe
of offencioun, and in to a ston of
sclaunder, to the two houses of Irael;
and in to a grene, and in to falling, to
-- --
men dwellende Jerusalem.
15 And manye
of hem shul offenden, and fallen, and
ben to-brosid, and grened, and ben taken.
16 Bind the witnessing, marke the lawe in
my disciples.
17 I shal abide the Lord, that
hidde his face fro the hous of Jacob, and
I shal sechen hym.
18 Lo! I and my childer,
whom &yogh;af to me the Lord in to tocne,
and in to wunder to Irael, fro the Lord
of ostes that dwelleth in the hil of Sion.
19 And whan thei shul sey to &yogh;ou, Secheth
of deuel cleperes, and of deuynoures, that
sounen strongli in their chauntingus, whethir
not a puple of his God shal seche
a viseoun for the quyke and the deade?
20 To the lawe more and to thi witnessing,
that if thei `schul not sei aftir this
wrd, shal not be to them morutid li&yogh;t.
21 And he shal passe thur&yogh; it, and it shal
falle, and hungre. `And when it shal
hongre, it shal wrathen, and cursen to
his kyng and to his God, and it shal beholden
vp.
22 And to the lond it shal loken,
and lo! tribulacioun, and dercnesses, `and
vnbyndyng, and anguysh, and derk myst
pursuende; and it shal not moun flee
awei fro his anguysh.
CAP. IX.
1 The firste tyme is allegid, `or maad
li&yogh;t, the lond of Zabulon and the lond of
Neptalym; and the laste tyme agreggid
is the weie of the se be&yogh;unde Jordan of
Galilee of Jentiles.
2 The puple that wente
in derknesses sa&yogh; a gret li&yogh;t; to the men
dwellende in the regioun of the shadewe
of deth, li&yogh;t sprungen is to them.
3 Thou
hast multeplyed the folc of kinde, not
magnefiedist gladnesse; thei shul glade
bifor thee, as thei that gladen in rip, as
-- --
ful out io&yogh;en ouercomeres, the prey taken,
whan thei deuyden spoiles.
4 The &yogh;oc forsothe
of his charge, and the &yogh;erde of
his shulder, and the kingus power of his
`wrong asker thou ouercame, as in the
dai of Madian.
5 For eche violent reuyng
with noise, and clothing mengd with blod
shal be in to brennyng, and mete of fyr.
6 A litil child forsothe is born to vs, and
a sone is &yogh;oue to vs, and mad is princehed
vp on his shulder; and his name shal
be clepid Merueilous, Counseiler, God,
Strong, Fadir of the world to come, Prince
of pes.
7 His empire shal be multeplied,
and of pes ther shal not ben ende; vp on
the see of Dauid, and vpon his regne he
shal sitte, that he conferme it, and
strengthe in dom and ri&yogh;twyssnesse, fro
now and unto withoute ende. The
huge looue of the Lord of ostes shal don
this.
8 A wrd the Lord sente in to Jacob,
and it fel in Irael.
9 And al the puple
of Effraym shal wite, and the men dwellende
Samarie, in pride and gretnesse `of
herte seiende,
10 Sclattes fellen, but with
square stones wee shul bilden vp; sicomore
trees thei hewen doun, but ceder
trees wee shul newen, `or chaungen.
11 And the Lord shal reren enemys Rasyn
vpon hym, and his enemys in to noise he
shal turne,
12 Cirie fro the est, and Filisteyn
fro the west; and thei shul deuoure
Irael with al the mouth. In alle thes
thingus is not turned awei the wodnesse
of hym, but &yogh;it his hond stra&yogh;t out;
13 and the puple is not turned a&yogh;een to the
smytende hym, and the Lord of ostes thei
inwardlyche so&yogh;ten not.
14 And the Lord
shal scatere fro Irael the hed and the
tail, the inbowende and the shrewende, in
o day.
15 The longe lyuende and the wrshepefull,
he is the hed, and the profete techende
lesyng, he is the tail.
16 And thei shul
be, that maken blisful this puple, bigilende;
and that ben mad blisful, throwe
-- --
doun.
17 For that vp on the &yogh;unge waxen
men of hym the Lord shal not deliten,
and of his faderles childer and widewis
he shal not han mercy; for eche ipocrite
is and a shrewe, and eche mouth spac
folie. In alle thes thingus is not turned
a wei his wodnesse, but &yogh;it his hond
stra&yogh;t out;
18 and the puple is not turned
a&yogh;een to the smytende hym. Tend vp
is forsothe as fyr vnpitousnesse; thoo
breres and the thorne it shal deuoure,
and it shal be brend vp in the thickenes
of the wilde wode, and it shal be al towrappid
in the pride of the smoke.
19 In
the wrathe of the Lord of ostes al disturbid
shal be the lond, and the puple
shal be as the mete of fyr; a man to
his brother shal not spare.
20 And he shal
bowe doun to the ri&yogh;t, and hungren, and
he shal ete at the lift, and not be fulfild;
eche the flesh of his arm shal deuoure.
Manasses Effraym, and Effraym Manasses,
and togidere thei a&yogh;en Judam.
21 In alle these thyngus is not turned awei
his wodnesse, but &yogh;it his hond stra&yogh;t out.
|
