Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. VII.
1 Wile thou not don eueles, and thei
shul not cacche thee.
2 Go awei fro the
wicke, and ther shul failen eueles fro
thee.
3 Sowe thou not eueles in foorewes
of vnri&yogh;twisnesse, and thou shalt not
repen them in to the seuethe fold.
4 Wile thou not sechen of a man the dignete
of a ledere, ne of a king the cha&yogh;er
of wrshepe.
5 Iustefie thou not thee bifor
God, for he ys knowere of the herte; and
anent the king wile thou not wilne to
ben seen wys.
6 Wile thou not sechen to
be mad a domes man, but if thou mowe
bi vertue breken wickidnesses; lest parauenture
thou out drede the face of the
my&yogh;ti, and putte sclaunder in thin hider
and thider deliuernesse.
7 Synne thou not
in the multitude of the cite, ne poote
thee in to the puple;
8 ne bynde thou to
double synnes, ne forsothe thou shalt be
in oon gilteles.
9 Wile thou not ben a
couward in thi soule, to pre&yogh;en;
10 and to
don almesse deede, ne dispise thou.
11 Ne
sei thou, In the multitude of my &yogh;iftus
God shal beholde; and me offrende to the
he&yogh;est God, my &yogh;iftis he shal take.
12 Scorne
-- --
thou not a man in the bitternesse of
soule; God forsothe the lokere aboute is,
that enhaunceth and meketh.
13 Wile thou
not looue lesing a&yogh;en thi brother; and in
to a frend lic maner do thou not.
14 Wile
thou not wilne to lien eche lesing; the
besynesse forsothe of hem is not good.
15 Wile thou not be ful of wrdis in the
multitude of prestus; and reherse thou not
a wrd in thin orisoun.
16 Hate thou not
trauailous werkes, and cherlish doing
foormed of the hei&yogh;est.
17 Ne acounte thou
thee in the multitude of men withoute
discipline.
18 Haue mynde of wrathe, for
it shal not tarie.
19 Meeke gretli thi spirit,
for veniaunce of the flesh of the vnpitous,
fyr and werm.
20 Wile thou not trespasen
`in to thi frend dela&yogh;ende monie; ne
dispise thou thi derwrthe brother for
gold.
21 Wile thou not gon awei fro a wel
felende womman, and a good, whom thou
hast goten in the drede of the Lord; forsothe
the grace of the shamefastnesse of
hir ouer gold.
22 Hurte thou not a seruaunt
in treuthe werchende, ne an hired
man &yogh;yuende his lif.
23 A wel felende seruaunt
be to thee looued as thi soule;
bygile thou not hym fro fredam, ne
forsake thou hym helpeles.
24 Beestis to
thee ben? tac heed to them; and if thei
ben profitable, abide thei stille anent
thee.
25 Sonus ben to thee? tech hem, and
bowe hem fro the childhed of hem.
26 Do&yogh;tris
ben to thee? keep the body of hem,
and shewe thou not thi face glad to them.
27 Bytac a do&yogh;tir, and a gret werk thou
shalt do; and to a wel felende man &yogh;if
hyr.
28 A womman if she is to thee aftir
thi soule, thro&yogh; hir not awei; and to an
hateful tac thou not thee in al thin herte.
29 Honoure thi fader; and the weilingus of
thi moder for&yogh;ete thou not.
30 Haue mynde
for but bi them thou haddest not ben,
and &yogh;eeld to them what maner and thei
to thee.
31 In al thi soule dred God, and
-- --
the prestes of hym halewe.
32 In al thi
vertue looue hym that made thee; and
the seruauns of hym forsac thou not.
33 Wrshepe thou God of al thi soule; and
wrshipe prestus, and purge thee forth
with armes.
34 &YOGH;if to them part, as and
maundement is to thee, of first frutes,
and of purging; and of thi necgligence
purge thee with fewe.
35 The &yogh;ifte of thin
armes, and the sacrifise of halewing, thou
shalt offre to the Lord, the bigynyngus
of hoeli thingus.
36 And to the pore put
forth thin hond, that plesing be parformed,
and thi blessyng.
37 Grace of &yogh;ifte in
the si&yogh;te of alle lyuyng; and to the deade
forfende thou not grace.
38 Fayle thou not
to wepende men to ben in coumforting;
and with weilende men go thou.
39 No&yogh;e
it not thee to visiten the sike; of these
thingus forsothe in louyng thou shalt
be fastned.
40 In alle thi werkes haue in
mynde thi laste thyngus; and withoute
ende thou shalt not synne.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|