Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XLII.
1 Ne double thou the sermoun of heering,
of the openyng of the hid wrd; and
thou shalt ben verrely withoute confusioun,
and thou shalt fynde grace in the
si&yogh;t of alle men. Ne for alle these thingus
be thou confoundid; and ne accepte thou
-- --
persone,
2 that thou gilte of the lawe of
the he&yogh;est, and of the testament of dom,
to iustefien the vnpitouse;
3 of the wrd of
felawes, and of weie goeres, and of the
&yogh;yuyng of the eritage of frendis;
4 of the
euenes of balaunces, and of wei&yogh;tes, of
purchasyng of manye thingus, and of
fewe;
5 of the corrupcioun of biyng,
and of marchaundis, and of myche disciplyne
of sonus; and of the werst seruaunt,
to make the side to bleden.
6 Vp on a
shreude womman good is a signe.
7 Where
ben many hondis, close thou; and what
euere thou shalt take, `noumbre thou,
and peise; the &yogh;yuen thing forsothe, and
the taken, al diskryue, `or wryte.
8 Of the
disciplyne of the mysfelende, and of the
fool, and of the elderes, thatt ben demed,
of the &yogh;unge waxen men; and thou shalt
ben lerned in alle thingus, and prouable
in the si&yogh;te of alle men.
9 The do&yogh;ter of
the fader is hid, the wache and the
bysynesse of hir shal don awey slep;
lest par auenture in hir &yogh;unge waxen
age auoutresse she be mad, and with a
man dwellende, hatefull she be mad;
10 lest any tyme she be pollutid in hir
maydenhed, and in hir fader keping she
be founde with child; lest par auenture
with hir man dwellende, she trespasse,
or certus bareyn she be mad.
11 Vp on a
leccherous do&yogh;tir set warde, lest any
tyme she make thee in to repref to
comen to thin enemys, of bacbiting in the
citee, and of casting awey of the puple;
and she confounde thee in the multitude
of the puple.
12 To alle men wile thou not
`taken heed in the fairnesse; and in the
myddel of wymmen wile thou not dwellen.
13 Forsothe of clothis cometh the mo&yogh;he,
and of a womman the wickidnesse of a
man.
14 Betere forsothe is the wickidnesse
of a man, than a womman doende benefet,
-- --
and a womman confoundende in to
repref.
15 Myndeful be `Y shal therfore
of the werkes of the Lord; and which
I sa&yogh;, I shal shewen out, in the wrdis of
the Lord, his werkus.
16 The sunne shynende
thur&yogh; alle thingus biheeld; and of
the glorie of the Lord ful is his werk.
17 Whether not the Lord made seyntes to
tellen out alle his merueiles, the whiche
the Lord almy&yogh;ty shal confermen stable
in his glorie?
18 The depthe of the se, and
the herte of men he shal enserchen; and
in the `sly&yogh;e wit, or gile, of hem he shal
out thenke.
19 The Lord forsothe kne&yogh; al
kunnyng, and beheeld in to the tocne of
the spiritueell world; shewende out that
ben passid, and that ben ouer to come;
openende the steppis of hid thingus.
20 And ther passeth not biside hym any
thenking, and any wrd hidde not it self
fro hym.
21 He made faire the grete wrthi
werkes of his wisdam, the whiche is biforn
the world, and vnto the world; ne
it is echid,
22 ne it is lassid, and it nedeth
not the counseil of any man.
23 Hou desirable
ben alle the werkes of hym, and
as a sparcle that is, to beholden.
24 Alle
these thingus lyuen, and dwellen in to
the world; and in alle nede alle thyngus
obeshen to hym.
25 Alle thingus double,
oon a&yogh;en oon; and he made not any
thing to failen. Of euery thing he shal
conferme the goodus; and who shal be
fulfild, seende the glorie of hym, and who
witende shal conferme the strengthe of
hym?
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
