Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XII.
Iff thou shul wel do,
1 wite thou to
whom thou shalt wel do; and ther shal
be myche grace in thi goodys.
2 Wel do
to the ri&yogh;twis, and thou shalt finde gret
&yogh;elding; and if not of hym, certes of the
Lord.
3 It is not weel to hym that is besi
in eueles, and to the not &yogh;yuende almes
deede; for and the hei&yogh;est to hate hath
syneres, and hath merci to penaunce doeres.
4 &YOGH;if to the merciful, and vndertake `or
resseyue thou not the synnere; and to
-- --
vnpitouse and synneres he shal &yogh;elde veniaunce,
kepende them in the day of veniaunce.
5 &YOGH;if to the goode, and resceyue
thou not the synnere.
6 Weel do to the
meeke, and &yogh;yue thou not to the vnpitous;
forfende to &yogh;yuen to hym loeues,
lest in hem he be my&yogh;tiere than thou.
7 For double eueles thou shalt fynde in
alle goodus, what euere thou shalt do to
hym; for and the hei&yogh;este to hate hath
synneres, and to the vnpitous he shal
&yogh;elde veniaunce.
8 A frend shal not be
knowen in goodis, and an enemy shal
not ben hid in eueles.
9 In the goodes of
a man the enemys of hym; and in the
sorewe and in the malice of hym the
frend is knowen.
10 Ne trowe thou to thin
enemy vnto withoute ende; forsothe as
bras rusteth out the shreudenesse of
hym.
11 And if meekid he go crookid,
thro&yogh; awei thi wil, and keep thee fro
hym.
12 Set not hym biside thee, and sitte
he not at thi ri&yogh;t half, lest turned he
stonde in thi place; lest perauenture
turned in to thi place he inwardli seche
thi chai&yogh;er, and in the laste thou knowe
my wrdes, and in mi wrdis thou be
prickid.
13 Who shal lechen to the enchauntere
smyten of the eddere, and to
alle that ne&yogh;hen to bestes, and that folewith
with the wicke man, and is aboute
wrappid in his synnes?
14 Oon hour with
thee he shal abide stille; if forsothe thou
bowe doun, he shal not vnderbern.
15 In
his lippis the enemy putteth in swetnesses,
and in his herte he spieth, that
he turne thee vp so doun in to the dich.
16 In thin e&yogh;en the enemy wepith; and if
he shul fynde tyme, he shal not be fulfild
with blod.
17 If ther shul falle to thee
eueles, thou shalt finde hym there rathere,
`or former.
18 In thin e&yogh;en the enemy shal
wepen, and as helpende he shal vnderdelue
thi plantes.
19 His hed he shal moue,
and flappe for io&yogh;e with the hond; and
many thingus grucchendeli whistrende
shal with chaunge his chere.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
