Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
PSALMS.
[Prologue on the book of Psalms.]
This book Sauter is clepid, that is to seie, the book of songis of Dauith, and of
Asaph, the chauntour of the temple of the Lord; wherynne is conteyned profesie of
the comynge of Crist, of his birthe, and of his power and teching; of his passioun and
his rising a&yogh;en fro deeth, and of his ascencioun and of his comynge a&yogh;en in the laste
doom; whiche songis ben red in holi cherche in to wurschiping and preising of the
Lord, knoulechinge his hei&yogh; maieste, and hise grete werkis; and that he do merci to
vs, whanne we trespasen a&yogh;ens him, brekinge hise comaundementis, that we perische
not for oure synnes.
Incipit prologus in librum Psalterij.
Whan it is knowe, alle the profetis to han spoke bi reuelacioun of the Holi Gost,
Dauid most of profetis to han spoken sum wise in wrthiere and ouer passende maner,
as the trumpe of the Holi Gost, than othere profetis. Othere forsothe profetis profecieden
bi sum maner ymagis of thingus, and withinne coueryngis of woordis, that is, bi
sweuenes, and viseouns, and deedis, and sawis; Dauid forsothe, thur&yogh; stiring of the
Holi Gost alone, withoute vttermor helpe his profecie made out. Wherfor couenabli
this boc is seid, The boc of solitarie spechis. It is also seid a Sauter, the whiche name
it toc of a musik instrument, that Ebruli is clepid nablum, Grekli a sauter, of this
Grek woord sallim, that is, touching; Latinli is seid an orgne, that is of ten cordis, and
fro the ouere part &yogh;iueth soun, bi the touch of hondis. Of that forsothe instrument at
the lettre therfore is nemned `this boc, for at the vois of that instrument Dauid song
salmys beforn the arke in the tabernacle of the Lord; and as alle the sweete songus of
that instrument weren clepid salmys, so and alle the particlis of this boc, or clausis.
Also aftir the spirituel vnderstonding wel of that instrument it taketh name, for as
that instrument is of ten cordis, so this boc techeth the al aboute keping of the ten
hestis; and as that instrument &yogh;iueth soun fro the ouere part bi the touch of hondis, so
this boc techeth wel to werche, not for ertheli thingis, but for heuenli thingus, that ben
-- --
aboue. This boc stant in an hundrid and fifti salmys, not biside the resoun of he&yogh;ere
signefiyng; this forsothe noumbre is notid to most solempne mysteries. It stant forsothe
of ei&yogh;teti and seuenti. And ei&yogh;tety al oon signefieth that ei&yogh;te, and seuenti the
same that seuene. Ei&yogh;te forsothe signefieth the ei&yogh;tthe age of a&yogh;een rising; for sithen
ther ben sixe agis of men liuende, and the seuenthe of men diende, the ei&yogh;the age shal
ben of men a&yogh;een risende. Bi seuene forsothe is betocned the time of this lif, that is
passid bi the oftesithes comyng of seuen da&yogh;es. Ri&yogh;tli thanne this boc is maad in such
a noumbre of salmys, whos partyes signefien `the beforseid mysteries; for it techeth
so vs in the seuenthe of this lif to werken and to liuen, that in the ei&yogh;the of a&yogh;een
rising wee be not clad with the doublefold cloth of confusioun, but with the stole of
double glorifiyng. Or therfore in that noumbre of salmys it is maad, for, as wee han
seid, this noumbre stant of ei&yogh;teti and seuenti, that al oon betocnen that ei&yogh;te and
seuene. Ei&yogh;te forsothe betocneth the newe testament, the fadris forsothe of the newe
testament to ogdoadi, that is, to ei&yogh;te deseruen. Thei kepen forsothe the ei&yogh;the dai
of the resureccioun of Crist, that is, the sone dai, and the vtas of seintis, and abijden
the ei&yogh;te of the a&yogh;een rising. Bi seuene forsothe is betocned the olde testament
therfore; for the fadris of the olde testament serueden to ebdoady, that is, to seuene.
Forsothe thei kepten the seuenthe dai, and the seuenthe wike, the seuenthe moneth,
the `seuenthe &yogh;er, and the seuenthe &yogh;er of the seuenthe, `that is, the fiftithe, that is
seid iubile. Wherfore Salomon seith, “&YOGH;if partis seuene and also ei&yogh;te.” And Mychias,
“Wee shul reren ‘vp on hym seuen shepperdis, and ei&yogh;te primatis.” Weel therfore this
boc in that noumbre of salmys is maad, whos partis betocnen the doctrine of either
testament, that bi that be shewid the hestis of either testament to be contened in this
boc. This boc forsothe is deuydid bi thre fifties; bi the whiche thre statis of cristene
religioun ben betocned. Of whiche the firste is in penaunce, the secounde in ri&yogh;twisnesse,
the thridde in preising of the euere lastende lif. Wherfore the firste fifti is endid
in penaunce, that is, the salm that begynneth “Haue mercy of me, God;” the secounde
in ri&yogh;twisnesse, that is, this salm, “Mercy and dom I shal singen to thee;” the thridde
in preising of the euere lastende lif, that is, this woord “Eche spirit preise God.” And
for these thre thingus techeth Dauid in this boc, therfore this threfold distinccioun of
salmys is maad. Also it is to be notid, this scripture mor than othere to ofte ben vsid
in chirche seruysis, that therfore is don, for in this boc is the fulle ending of the hole
boc of Godis woord. Heer forsothe ben discriued the meedis of goode men, the tormentis
of euele men, the pleyne techyngus of begynende men, the forth going of profitende
men, the perfeccioun of ful comynge men, the lif of actif men, the spirituel
beholding of contemplatif men; heer also is ta&yogh;t what synne doth awei, what penaunce
restoreth, what the gilti of synne othenkende seye, that is, “Lord, in thi wodnesse
vndernyme thou not me,” and in an other place, “Haue mercy of me, God, aftir thy
mychile mercy;” and what bi penaunce be purchasid, whan he vnderioyneth, “I shal
teche wicke men thi weies, and vnpitous men to thee shul be conuertid;” bi whiche
is shewid to no man, hou myche euere ‘trespasinge to be, to mystrosten of for&yogh;iuenesse,
and of the merci of God, taken to the mecnesse of othenking; whan forsothe
-- --
wee beholden Dauid, a man sleere and auoutrer, bi penaunce maad a doctour and a
profete, to no man doende penaunce is laft place of wanhope; as of the conuerting of
Powil and his auaunsing in to apostil of the mercy of God pleynli wee ben certefied.
Wherfore the chirche vsith in offisis, as the profecie of Dauid, the epistolis of hym
more than of othere; and therfore this profecie is oftene had in vse, for among
othere profecies it passith in openyng of sawys; tho forsothe thingus that othere profetis
dercly and as bi figure seiden of the passion and the resureccioun of Crist, and
of the euerlastende geteng, and of othere mysterijs, Dauid of profetis most excellent so
euydentli openede, that more he be seen to euangelisen than to profecien.
Another prolog.
Dauyd, the sone of Jesse, whan he was in his reume, foure he ches that salmes
shulden maken, that is, Asaf, Eman, Ethan, and Iditym. Ei&yogh;tety and ei&yogh;te forsothe
seiden the salmys, and two hundrid the vndersinging, and Abiud smot the harpe.
Whan Dauid hadde a&yogh;en bro&yogh;t the arke, a&yogh;een clepid fro Asotis in to Jerusalem aftir
twenti &yogh;er, and abod in the hous of Amynadab, this he putte on in a newe `&yogh;okid
karte, and bro&yogh;te in to Jerusalem; men chosen of al the kinrede of the sonis of Israel,
seuenti thousend, of the lynage forsothe of Leuy, two hundrid seuenti and ei&yogh;te
thousend men; of whiche foure princis he ordeynede to ben beforn to the songus, Asaf,
Eman, Ethan, and Iditym, to eche of hem deuydende two and seuenti men, vnder
criende preising of the songis to the Lord. And oon forsothe of hem smot the simbal,
an other the harpe, an other the hornene trumpe enhauncende. In the myddel forsothe
of hem `stod Dauid, holdende hymself a sautre; forsothe thei wenten befor
the arke in seuene queris, and the sacrifise, a calf. Forsothe al the puple folewide
after the arke. Thanne alle the salmys of Dauid ben in noumbre an hundrid and
fifti, of whiche alle forsothe nyne made Dauid himself, two and thretti han not superscripcioun,
fifti and two and twenti in to Dauid, twelue in to Asaf, twelue in to
Iditym, nyne to the sones of Chori, oon to Moises, two in to Salomon, two in to Aggie
and Zacharie. And so alle the salmys of Dauid ben maad in noumbre of an hundrid
and fifti. The deuyseoun of salmys that ben clepid diasalmys ben in noumbre of
seuenti and fiue; the canticlis of grees ben in noumbre of fiftene. The firste salm to
no man is asigned, for it is of alle. Therfore what other man is vnderstonde in the
firste but the firste goten, that wrthili inscripcioun shul not be necessarie. Ferthermor
for that salm maketh mencioun of Crist, as a&yogh;en thi Crist expounende the persone
`to ben inscriued, vttirli thei han not withinne chaungid the ordre of storie. Wee reden
and in the titlis of salmys; but the salmys not after the storie, but aftir the profecie
ben rad, so the ordre of titlis mai not disturben the order of salmys. Alle the
salmys that ben inscriued to hym Dauid, pertenen to the sacrament of Crist, for Dauid
is seid Crist.
Explicit prologus super psalterium.
-- --
The boc begynneth of ympnes and
solitarie spechis of the profete Dauyd,
of Cryst.
PSALM I.
1 noteBlisful the man, that went not awei
in the counseil of vnpitouse, and in the
wei off sinful stod not; and in the cha&yogh;er
of pestilence sat not.
2 But in the lawe
of the Lord his wil; and in the lawe of
hym he shal sweteli thenke dai and ny&yogh;t.
3 And he shal ben as a tree, that is plauntid
biside the doun rennyngis of watris; that
his frut shal &yogh;iue in his time. And the
lef of hym shal not fade; and alle thingus
what euere he shal don shul waxe welsum.
4 Not so the vnpitouse, not so; but as
poudre, that aferr throwith the wind fro
the face of the erthe.
5 Therfore eft rijsen
not the vnpitouse in dom; ne sinful in the
counseil of ri&yogh;twise.
6 For the Lord hath
knowe the weie of the ri&yogh;twise; and the
goyng of the vnpitouse shal pershen.
PSALM II.
The salm of Dauyd.
1 noteWhi gruccheden Jentilis; and puplys
sweteli tho&yogh;ten inwardli veyne thingus?
2 Ther stode nee&yogh;h the kingus of the
erthe; and princis kamen togidere in to
oon, a&yogh;en the Lord, and a&yogh;en his Crist.
3 To-breke we the bondis of hem; and aferr
throwe we fro vs the &yogh;oc of hem.
4 That
dwelleth in heuenes shal scorne them;
and the Lord shal bemowe them.
5 Thanne
he shal speke to hem in his wrathe; and
in his wodnesse disturbe them togidere.
6 I forsothe am sett king fro hym vpon
Sion, the holi mount of hym; prechende
-- --
his heste.
7 The Lord seide to me, My
sone thou art; I to day gat thee.
8 Aske of
me, and I shal &yogh;iue to thee Jentilis thin
eritage; and thi possessioun the termes of
erthe.
9 Thou shalt gouerne them in an
irene &yogh;erde; and as a vessel of a crockere
breke them togidere.
10 And now, kingus,
vnderstondeth; beth ta&yogh;t, that demen the
erthe.
11 Serueth to the Lord in drede; and
ful out gladeth to hym with trembling.
12 Taketh discipline, lest any time be wrathid
the Lord; and &yogh;ee pershe fro the ri&yogh;twis
weie.
13 Whan his wrathe shal brenne out
in short; blisful alle that trosten in hym.
PSALM III.
1 Salm of Dauid, whan he shulde flee
fro the face of Absolon, his sone.
2 noteLord, wherto ben multiplied that trublen
me? manye inwardli rijsen a&yogh;en me.
3 Manye seyn to my lif, Ther is not helthe
to hym in his God.
4 Thou forsothe, Lord,
art myn vndirtakere: my glorie, and enhansende
myn hed.
5 With my vois to the
Lord I criede; and he ful out herde me
fro his holi hil.
6 I sleep, and was a slepe,
and ful out ros; for the Lord vndertoc
me.
7 I shal not drede thousendis of puple
goende aboute me; rys vp, Lord; mac
me saf, my God.
8 For thou hast smyte
alle doende aduersite to me with oute
cause; the teth of the sinful thou hast
to-brosid.
9 Of the Lord is helthe; and
vpon thi puple thi blessing.
PSALM IV.
1 In to the ende, in ditees, the salm of
Dauid; or, In to the ende, the salm of
the song of Dauid.
2 noteWhan I inwardli clepide, ful out herde
me the God of my ri&yogh;twisnesse; in tribulacioun
-- --
thou spraddest out to me.
3 Haue
merci of me; and ful out here myn orisoun.
Sones of men, hou longe with
greuous herte? whereto looue &yogh;ee vanyte,
and sechen lesing?
4 And witeth, for the
Lord hath maad merueilous his seynt;
the Lord ful out shal here me, whan
I shal crie to hym.
5 Wrathe &yogh;ee, and
wileth not synnen; that &yogh;ee seyn in
&yogh;oure hertis and in &yogh;oure couchis, haue
&yogh;ee compunccioun.
6 Sacrifiseth sacrifise of
ri&yogh;twisnesse, and hopeth in the Lord;
many seyn, Who shewith to vs goode
thingis?
7 Markid is vpon vs the li&yogh;t of
thi chere, Lord; thou &yogh;eue gladnesse in
myn herte.
8 Of the frut of whete, win,
and oile of hem; thei ben multiplied.
9 In
pes into itself; I shal slepe, and reste.
10 For thou, Lord; singulerli in hope hast
togidere set me.
PSALM V.
1 Into the ende, for hir that getith the
eritage.
2 noteMy woordis with eris parceyue thou,
Lord; vnderstond my cry.
3 Tac heede to
the vois of myn orisoun; my king, and
my God.
4 For to thee I shal pre&yogh;e, Lord;
erli thou ful out shalt here my vois.
5 Erly
I shal nee&yogh;h stonde to thee, and seen;
for thou art God not willende wickidnesse.
6 Ne shal dwelle beside thee the
shrewe; ne shul dwelle stille the vnri&yogh;twise
before thin e&yogh;en.
7 Thou hast
hatid alle that wirken wickidnesse; thou
shalt leesen alle that speken lesing. The
man of blodis and trecherous the Lord
shal wlate;
8 I forsothe in the multitude
of thi mercy. I shal entre in to thin hous;
I shal honouren at thin holi temple in thi
drede.
9 Lord, bring forth me in thi ri&yogh;twisnesse
for myn enemys; mac redi in
thi si&yogh;te my weie.
10 For ther is not in the
mouth of hem treuthe; the herte of hem
-- --
is veyn.
11 An open sepulcre is the throte
of hem, with ther tungis treccherousli
thei diden; deme them, thou God. Falle
thei doun fro ther tho&yogh;tis; after the multitude
of the vnpitousnessis of hem, put
hem awei; for thei han terrid thee, Lord.
And glade thei alle, that hopen in thee;
in to withoute ende thei shul ful out
gladen; and thou shalt dwellen in hem.
12 And alle shul glorien in thee that loouen
thi name;
13 for thou shalt blisse to the
ri&yogh;twise. Lord, as with the sheeld of thi
goode wil, thou hast crouned vs.
PSALM VI.
1 In to the ende, the salm of Dauid,
for the ei&yogh;the.
2 noteLord, in thi wodnesse vndernyme thou
nott me; ne in thi wrathe chastise thou
me.
3 Haue mercy of me, Lord, for I am
syk; hele me, Lord, for disturbid ben
alle my bonys.
4 And my soule is disturbid
gretli; but thou, Lord, hou longe?
5 Be
turned, Lord, and delyuere my soule;
mac me saaf, for thi grete mercy.
6 For
ther is not in deth, that be myndeful of
thee; in helle forsothe who shal knouleche
to thee?
7 I haue trauailid in my
weilinge, I shal wasshe bi alle ny&yogh;tis my
bed; and with my teres my bedding I
shal watrin.
8 Disturbid is of wodnesse
myn e&yogh;e; I haue inwardli eldid amongis
alle myn enemys.
9 Goth awei fro me,
alle that werken wickidnesse; for the
Lord ful out herde the vois of my weping.
10 The Lord ful out herde my louli pre&yogh;ing;
the Lord myn orysoun hath vndertaken.
Shamen and be disturbid hugely
alle myn enemys;
11 be thei turned, and
shame thei ful swiftli.
-- --
PSALM VII.
1 In to the ende; the salm to Dauid,
whom he song to the Lord for the
woordus of Cusi, sone of the ri&yogh;thalf,
`or Gemyny.
2 noteLord, my God, in thee I hopide; mac
me saf fro alle men pursuende me, and
delyuere me.
3 Lest any time he raueshe
me as a leoun my soule; whil ther is not
that a&yogh;eenbie, ne that make saf.
4 Lord
my God, if I dide this, if ther is wickidnesse
in myn hondis;
5 if I quitte to the
men &yogh;eldende to me euelis, I shal falle doun
thur&yogh; desert fro myn enemys inwardli
voide;
6 pursue the enemy my lif, and
cacche, and to-trede in the erthe my lif;
and my glorie in to poudre bringe doun.
7 Rys vp, Lord, in thi wrathe; and be
thou enhauncid in the coostis of myn
enemys.
8 And ris vp, Lord my God, in
the heste that thou hast sent; and the
congregacioun of puplis shal enuyroun
thee.
9 And for it in to hei&yogh; go a&yogh;een; the
Lord demeth puplys. Deme me, Lord,
aftir my ri&yogh;twisnesse; and aftir my innocence
vpon me.
10 Shal ben endid the
shreudenesse of synneres, and thou shalt
dresse the ri&yogh;twis; God serchende hertis
and reenes.
11 Ri&yogh;twis myn helpe of the
Lord; that maketh saaf ri&yogh;te men in
herte.
12 God ri&yogh;twis demere, strong and pacient;
whether he wrathith bi alle da&yogh;es?
13 But &yogh;ee shul ben conuertid, his swerd he
shal braundishen; his bowe he bende,
and made it redi.
14 And in it he maade
redi vesselis of deth; his arewis with
brennende thingus he made out.
15 Lo!
he withinne wro&yogh;te vnri&yogh;twisnesse; conceyuede
sorewe, and bar wickidnesse.
16 A
lake he openede, and dalf it out; and
-- --
fel in to the dich that he made.
17 His
sorewe shal be turned in to the hed of
hym; and in to his nol the wickidnesse
of hym shal descenden.
18 I shal knouleche
to the Lord, after the ri&yogh;twisnesse of
hym; and I shal sein salm to the name
of the he&yogh;est Lord.
PSALM VIII.
1 In to the ende, the salm of Dauid, for
the pressis.
2 noteLord, oure Lord; hou myche merueilous
is thi name in al the erthe. For rerid vp
is thi grete doing, ouer heuenes.
3 Of the
mouth of vnspekende childer and soukende
thou performedist preising, for thin
enemys; that thou destro&yogh;e the enemy
and the veniere.
4 For I shal see thin
heuenes, the werkis of thi fingris; the
mone and the sterris, that thou hast
foundid.
5 What is a man, that myndeful
thou art of hym; or the son of man, for
thou visitist hym?
6 Thou lassedest hym
a litil lasse fro aungelis; with glorie and
worshipe thou crounedest hym,
7 and settist
hym ouer the werkis of thin hondys.
8 Alle thingus thou leidist vnder his feet,
shep and oxen alle; ferthermor and the
bestis of the feeld;
9 the foulis of heuene,
and the fishis of the se; that thur&yogh; gon
the sties of the se.
10 Lord, oure Lord;
hou myche merueilous is thi name in al
erthe.
PSALM IX.
1 In to the ende, for the hid thingus of the
sone, the salm of Dauid.
2 noteI shal knoulechen to thee, Lord, in al
myn herte; and telle alle thi merueilis.
3 I shal gladen and ful out io&yogh;en in thee;
I shal sey salm to thi name, thou he&yogh;est.
4 In turnynge myn enemy bacward; thei
shul be feblid, and pershe fro thi face.
-- --
5 For thou didist my dom, and my cause;
thou sittist vp on the trone, that demest
ri&yogh;twisnesse.
6 Thou feredist Jentilis, and
the vnpitous pershide; the name of hem
thou didist awei in to with oute ende,
and in to the world of world.
7 Of the
enemy failiden the swerdis in to the ende;
and the cites of hem thou destro&yogh;edist.
Pershide the mynde of them with soun;
8 and the Lord in to withoute ende abit
stille. He made redy in dom his trone;
9 and he shal deme the roundnesse of the
erthe in equite; he shal deme puplis in
ri&yogh;twisnesse.
10 And `maad is the Lord
refut to the pore; helpere in tho thingus
that nede is, in tribulacioun.
11 And hope
thei in thee, that knewen thi name; for
thou hast not forsake the sechende thee,
Lord.
12 Singeth salmys to the Lord, that
dwellith in Sion; telleth among Jentilis
the studies of hym.
13 For a&yogh;een sechende
the blod of hem he recordide; he for&yogh;at
not the cry of pore men.
14 Haue mercy
of me, Lord; see my mecnesse fro myn
enemys.
15 That enhauncist me fro the
&yogh;atis of deth; that I telle alle thi preisingus
in the &yogh;atis of the do&yogh;ter of Sion.
16 I shal ful out gladen in thi &yogh;iuere of
helthe; ful ficchid ben the Jentilis in the
deth, that thei maden. In this grene,
that thei hidden, ca&yogh;t is the foot of hem.
17 The Lord shal be knowe doende domys;
in the werkis of his hondis ca&yogh;t is the
sinful.
18 Be turned the synneres in to helle;
alle Jentilis, that for&yogh;eten God.
19 For not
into the ende for&yogh;eting shal ben of the
pore; the pacience of pore men shal not
pershen in to the ende.
20 Rys, Lord, be
not coumfortid a man; be demed the
Jentilis in thi si&yogh;te.
21 Sett, Lord, a lawe
&yogh;iuere vp on hem; wite the Jentilis, for
they ben men.
1 noteWherto, Lord, wentist
thou awei along? thou despisist in nedfultees
-- --
in tribulacioun.
2 Whil proudeth
the vnpitous with inne, tend is the pore
man; thei ben ca&yogh;t in the counseilis, bi
the whiche thei thenken.
3 For preisid is
the synnere in the desiris of his soule;
and the wicke is blissid.
4 The synnere
sharpli ful out terrede the Lord; after
the myculnesse of his wrathe he shal
not sechen.
5 Ther is not God in his si&yogh;t;
defoulid ben the weies of hym in alle
time. Thi domes be taken awei fro the
face of hym; of alle his enemys he shal
lordshipen.
6 Forsothe he seide in his
herte, I shal not be moued, fro ieneracioun
in to ieneracioun withoute euel.
7 Whos mouth is ful of cursing, and bitternesse,
and treccherie; vnder his tunge
trauaile and sorewe.
8 He sitt in aspies
with riche men in priuytes; that he sle
the innocent.
9 The e&yogh;en of hym beholden
in to the pore; he waitith in hid place,
as a leoun in his den. He waiteth, that
he raueshe the pore; to raueshe the pore,
whil he draweth hym to.
10 In his grane
he shal meken hym; he shal bowen hymself
and fallen; whan he shal lordshipen
of pore men.
11 Forsothe he seide in his
herte, For&yogh;eten is God; he turneth awei
his face, lest he see in to the ende.
12 Rys
up, Lord God, and be haunsid thin hond;
ne for&yogh;ete thou of the pore.
13 For what
the vnpitouse terrede God? forsothe he
seide in his herte, He shal not a&yogh;een
sechen.
14 Seest thou, for trauaile and
sorewe thou beholdist; that thou take
them in to thin hondis. To thee laft is
the pore; to the faderles child thou shalt
ben helpere.
15 To-brose the arm of the
synnere, and of the malice doere; the
synne of hym shal be so&yogh;t, and not be
founde.
16 The Lord shal regne in to with
oute ende, and in to the world of world;
perishe shuln &yogh;ee, Jentilis, fro the lond
of hym.
17 The desyr of pore men ful out
-- --
herde the Lord; the befor rediyng of the
herte of hem herde thin ere.
18 To deme to
the moderles child and to the meeke;
that no more ley to to magnefie hymself
a man vp on erthe.
PSALM X.
1 In to the ende, the salm of Dauid.
2 noteIn the Lord I trostne; hou sey &yogh;ee to
my soule, Passe forth in to the hil, as
a sparewe.
3 For loo! synneres benten
bowe, maden redy ther arwis in the arwe
girdil; that thei shete in derc the ri&yogh;te
men in herte.
4 For thoo thingus that
thou parformedest, thei destro&yogh;eden; the
ri&yogh;twis man what dide forsothe?
5 The
Lord in his holy temple; the Lord, in
heuene the sete of hym. His e&yogh;en in to
the pore beholden; the e&yogh;elidis of hym
asken the sones of men.
6 The Lord asketh
the ri&yogh;twis man, and the vnpitous;
he forsothe, that looueth wickidnesse,
hatith hys soule.
7 He shal reyne vp on
synneres grenes; fyr, brunston, and the
spiritis of tempestis, part of the chalis of
hem.
8 For ri&yogh;twis the Lord, and ri&yogh;twisnesse
he loouede; equite sa&yogh; the chere of
hym.
PSALM XI.
1 In to the ende, the salm of Dauid, for
the ei&yogh;the.
2 noteLord, mac me saf, for ther failith the
holy; for mynusht ben treuthis fro the
sonys of men.
3 Veyn thingus thei speeken,
eche to his ne&yogh;hebore; ther treccherous
lippis in herte and herte speeken.
4 The
Lord scatere alle trecherous lippis, and
the tunge gret speche.
5 That seiden,
Oure tunge wee shul magnefien; oure
lippis of vs ben; who is oure lord?
6 For
-- --
the wrecchidnesse of the nedy, and the
weiling of the pore; now I shal vp rise,
seith the Lord. I shal putte in thin
helthe &yogh;iuere; trostily I shal don in hym.
7 The spechis of the Lord chaste spechis;
siluer examyned bi fyr, proued of the
erthe, purgid seuefold.
8 Thou, Lord, shalt
withholden vs; and kepen vs fro this
ieneracioun and in to withoute ende.
9 In
enuyroun vnpitous men gon; aftir thin
hei&yogh;nesse thou hast multiplied the sones
of men.
PSALM XII.
1 In to the ende, the salm of Dauid.
noteHou longe, Lord, thou for&yogh;etist me in
to the ende? hou longe thou turnest
awei thi face fro me?
2 Hou myche while
I shal putte counseilis in my soule; sorewe
in myn herte bi day?
3 Hou longe
shall ben enhauncid myn enemy vp on
me?
4 Behold, and ful out here me, Lord
my God. Li&yogh;te thou myn e&yogh;en, lest any
tyme I slepe al doun in deth;
5 lest sum
time sey myn enemy, I haue wonnen the
maistri a&yogh;en hym. That trubblen me shul
ful out glade, if I shul be moued;
6 I forsothe
in thi mercy haue hopid. Myn
herte shal ful out gladen in thin helthe
&yogh;iuere; I shal singe to the Lord, that
goodis &yogh;af to me; and do salm to the
name of the hei&yogh;est Lord.
PSALM XIII.
1 In to the ende, the salm of Dauid.
noteThe vnwise man seide in his herte,
Ther is not God. Corupt thei ben, and
abhominable ben maad in ther studies;
ther is not that do good, ther is not
vnto oon.
2 The Lord fro heuene forth beheeld
vp on the sonus of men; that he
see, if ther is vnderstondende, or a&yogh;een
sechende God.
3 Alle ben bowid doun, togidere
-- --
vnprofitable ben maad; ther is not
that do good, ther is not vnto oon. A
sepulcre opened is the throte of hem, with
ther tungis treccherously thei diden; the
venym of edderes vnder the lippis of hem.
Whos mouth of cursing and bitternesse
is ful; swifte the feet of hem to sheden
out blod. To-brosing and vnwelsumnesse
in the weies of hem, and the weie of pes
thei knewen not; ther is not the drede of
God befor ther e&yogh;en.
4 Whether alle shul
not knowen, that werken wickednesse;
that deuoure my folc, as mete of bred?
5 God they inwardli clepeden not; there
thei trembliden bi drede, wher was not
drede.
6 For the Lord is in a ri&yogh;twis ieneracioun;
the counseil of the nedi &yogh;ee
han confoundid, for the Lord is his hope.
Who shall &yogh;iue fro Sion the helthe &yogh;iuere
of Irael? Whan the Lord shal take awei
the caitifte of his puple; Jacob ful out
shal io&yogh;en, and Irael shall gladen.
PSALM XIV.
The salm of Dauid.
1 noteLord, who shal duelle in thi tabernacle;
or who shal eft resten in thin
holy hil?
2 That goth in withoute wem;
and werkith ry&yogh;ttwisnesse.
3 That speketh
treuthe in his herte; that dide not trecherie
in his tunge. Ne dide to his ne&yogh;hebore
euel; and reprof toc not to a&yogh;en hise
ne&yogh;hboris.
4 To no&yogh;t is bro&yogh;t doun in his
si&yogh;t the malice doere; forsothe the dredende
the Lord he glorifieth. That swereth
to his ne&yogh;hebore, and desceyueth not;
that his monee &yogh;af not to vsure;
5 and
&yogh;iftis vp on the innocent toc not. He, that
doth these thingus, shal not be moued in
to without ende.
-- --
PSALM XV.
Of the title, the inscripcioun to hym
Dauid.
1 noteKep me, Lord, for I hopide in thee;
I seide to the Lord, My God art thou;
2
for of my goodis thou nedist not.
3 To the
seintis that ben in the lond of hym; he
made merueilous alle my willis in hem.
4 Ther ben multiplied the infirmytes of
hem; aftirward thei hee&yogh;eden to. I shal
not gadere togidere the conuenticulis of
hem of blodis; ne I shal be myndeful of
the namys of hem bi my lippis.
5 The Lord
the part of myn eritage, and of my chalis;
thou art, that shalt restore myn eritage
to me.
6 Cordis fellen to me in ful cleer
thingis; forsothe myn eritage ful cler
is to me.
7 I shal blisse the Lord, that
&yogh;af to me vnderstondinge; ouermor `and
vnto the ny&yogh;t myche blameden me my
reenys.
8 I purueiede the Lord in my si&yogh;te
euermor; for fro the ri&yogh;t partis he is
to me, lest I be with moued.
9 For that
gladede myn herte, and ful out io&yogh;ede
my tunge; furthermor and my flesh shal
a&yogh;een resten in hope.
10 For thou shalt not
forsake my soule in helle; ne &yogh;iue thin
halewe to seen corupcioun. Knowen to
me thou hast maad the weies of lif;
thou shalt fulfille me therto in gladnesse
with thi chere; delitingus in thi ri&yogh;tt
hond vnto the ende.
PSALM XVI.
1 The orisoun of Dauid.
noteHere, Lord, my ri&yogh;twisnesse; vnderstond
my lowe pre&yogh;ing. With eris perceyue
myn orisoun; not in treccherous
lippis.
2 Fro thi chere my dom go forth;
thin e&yogh;en see thei equites.
3 Thou prouedest
myn herte, and visytedist in the ny&yogh;t;
-- --
bi fyr thou examynedest me, and ther is
not founde in me wickidnesse.
4 That my
mouth speke not the werkis of men; for
the woordis of thi lippis I kepte harde
weies.
5 Parforme my goingus in thi sties;
that my steppis be not meued.
6 I criede,
for thou, God, herdest me; bowe fully
thin ere, and ful out here my woordis.
7 Mac merueilouse thi mercyes; that makist
saf the hopende in thee.
8 Fro the withstonderes
to thi ri&yogh;thalf kep me, as the
appil of the e&yogh;e. Vnder the shadewe of
thi weengis defend me;
9 fro the face of
vnpitous men, that me han tormentid.
10 Myn enemys my soule cumpasiden; ther
tal&yogh; thei closiden togidere; theyr mouth
hath spoken pride.
11 Throwende me aferr
now thei enuyrounden me; ther e&yogh;en thei
ordeyneden to bowe doun in to the erthe.
12 They toke me doun, as a leoun redy to
the prey; and as a leoun whelp dwellende
in hid placis.
13 Rys vp, Lord, befor
come hym, and supplaunte hym; tac
awei my soule fro the vnpitous; thy
swerd,
14 fro the enemys of thin hond.
Lord, fro a fewe fro the lond deuyde hem
in ther lif; of thin hidde thingus fulfild
to is the wombe of hem. Thei ben fulfild
with sones; and laften ther relikis to
ther childer.
15 I forsothe in ri&yogh;twisnesse
shal apere to thi si&yogh;te; I shal be fulfild,
whan thi glorie shal apere.
PSALM XVII.
1 In to the ende, to the child of the Lord,
Dauid; the whiche woordus of this
song he spac to the Lord, in the dai
that the Lord toc hym out fro the
hond of the enemys of hym, and fro
the hond of Saul; and seide:
2 noteI shal looue thee, Lord, my strengthe;
the Lord my fastnyng, and my refut,
-- --
and my delyuerere.
3 My God, myn helpere;
I shal hope in to hym. My defendere,
and the horn of myn helthe; and
myn vndertakere.
4 Preisende I shal inwardly
clepe the Lord; and fro myn
enemys I shal be saf.
5 The sorewis of
deth enuyrounden me; and the stremes
of wickidnesse togidere sturbiden me.
6 The sorewis of helle wenten aboute me;
befor ocupieden me the grenes of deth.
7 In my tribulacioun I inwardly clepide
the Lord; and to my God I criede. And
he ful out herde fro his holi temple my
vois; and my cry in his si&yogh;te wente in to
the eris of hym.
8 Moued is togidere, and
togidere tremblide the erthe; the foundemens
of mounteynes ben togidere sturbid,
and togidere moued, for he wrathide to
them.
9 Ther ste&yogh;ede vp smoke in his
wrathe, and fyr fro his face ful out
brente; and colis ben vndertend of hym.
10 He ful bowide heuenes, and cam doun;
and dercnesse vnder his feet.
|
