Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXXIV.
1 Tellende forth forsothe Elyu, thes
thingis also spac,
2 Hereth, wise men, my
woordis, and ta&yogh;t, herkneth me;
3 the ere
forsothe woordis proueth, and the throte
metis bi tast demeth.
4 Dom chese we to
vs; and among vs see wee what is betere.
5 For thou seidist, Job, Ri&yogh;twis I am, and
God turnede vp so doun my dom.
6 In
demyng forsothe me is lesing, and violent
is myn arewe withoute any synne.
7 Who
is a man, as is Job, that drinketh scornyng
as water?
8 that goth with men wirkende
wickidnesse, and wendeth with vnpytous
men?
9 Forsothe he seide, A man
shal not plese to God, also if he shul
-- --
renne with hym.
10 Therfore, herty men,
hereth me; ferr be fro God vnpitousnesse,
and fro the Almy&yogh;ti wickenesse.
11 Forsothe the werk of man he shal &yogh;elde
to hym; and after the weies of echone
he shal quite to them.
12 Vereli forsothe
God shal not condempne in veyn; ne
the Almy&yogh;ti shal turne vpsodoun dom.
13 Whom other sette he vp on erthe? or
whom putte he vp on the world, that he
forgide?
14 If he shul dresse to it his herte,
the spirit of it and blast he shal drawe
to hym.
15 Al flesh shal faile to gidere;
and a man into askis shal be turned
a&yogh;een.
16 If thou hast thanne vndirstondinge,
here that is seid, and herkne the
vois of my speche.
17 Whether he that
looueth not dom mai ben helid? and
hou thou hym, that is ri&yogh;twis, in so
myche condempnest?
18 That seith to the
king, Apostata; that clepeth dukys vnpitous.
19 That taketh not the persones of
princis, ne knew&yogh; the tiraunt, whan he
shulde striuen a&yogh;en the pore; forsothe
the werk of his hondis ben alle men.
20 Feerli thei shul die, and in mydny&yogh;t
puplis shul be boowid; and passen, and
taken awei the violent withoute hond.
21 Forsothe the e&yogh;en of hym vp on the
weies of men, and alle the goingus of
hem he beholdeth.
22 Ther ben not dercnessis,
and ther is not shadewe of deth,
that ther ben hid there that werken
wickidnessis;
23 ne forsothe more ouer in
mannys power is, that he come to God
in to dom.
24 He shal to-trede manye and
vnnoumbrable; and make to stonden
othere men for hem.
25 Forsothe he knew
the werkis of hem; and therfore he shal
bringe in ny&yogh;t, and thei shul be to-trede.
-- --
26 As vnpitous, he smot hem in the place of
men seende.
27 The whiche as bi studie
wente awei fro hym, and alle his weies
thei wolde not vnderstonde.
28 That thei
make to come to hym the cri of the nedi,
and he here the vois of pore men.
29 Hym
forsothe grauntende pes, who is that condempneth?
Sithen he hath hid his chere,
who is that beholdeth hym? And vpon
Jentilis and vpon alle men,
30 the whiche
maketh to regne an ipocrite man, for the
synnes of the puple.
31 Thanne for I spac
to God, thee also I shal not forfende.
32 If
I haue errid, thou teche me; if wickidnesse
I spac, I shal adde no mor.
33 Whether
God of thee asketh it out, for he displeside
to thee? Thou forsothe begunne
to speke, and not I; that if any thing
thou knewe betere, spec.
34 Vnderstondende
men, speke thei to me; and a wis man,
here he me.
35 Job forsothe folily spac, and
the woordis of hym soune not disciplyne.
36 Fader myn, be preued Job vnto the ende;
ne leue thou fro a man of wickidnesse,
37 that addeth vp on his synnes blasfemye.
Amongis vs euere among be he streyned;
and thanne at the dom terre he God
with his woordis.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
