Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXII.
1 Answerende forsothe Elifath Temanites
seide,
2 Whether to God mai a man ben
comparisound, also whan he shal be of
perfit kunnyng?
3 What profitith to
God, if thou shul be ri&yogh;twis? or what to
hym bringist thou, if thi lif were vndefoulid?
4 Whether dredende he shal vndernyme
thee, and come with thee in to
dom,
5 and not for thi myche malice, and
thi wickidnessis vnendid?
6 Forsothe thou
hast take awei the wed of thi brethern
with oute cause; and nakid men thou
hast spoilid fro clothis.
7 Water to the
weri thou &yogh;eue not; and to the hungri
thou withdrowe bred.
8 In the strengthe
of thin arm thou weldedest the erthe;
and most my&yogh;ti thou heelde it.
9 Widewis
thou laftist voide; and the brawnes of
moderles childer thou to-brosidist.
10 Therfore
thou art enuyround with granes;
and feerli drede disturbide thee.
11 Thou
wendest thee not to seen dercnessis; and
thur&yogh; bire of rennynge watris not to
ben opressid.
12 Whether thenkest thou,
that God be he&yogh;ere than heuene, and
ouer the cop of sterres he be he&yogh;ed?
13 And
thou seist, What forsothe the Lord knew&yogh;?
and, As bi dercnesse he demeth?
14 A cloude
-- --
his hidelis, ne oure thingus he beholdeth,
and aboute the vttermostis of heuene he
goth.
15 Whether the sti of worldis thou
coueitist to kepe, the whiche wicke men
treden?
16 The whiche ben rerid befor
ther time, and the flod turnede vp so doun
the foundement of hem.
17 The whiche
seiden to God, Go awei fro vs; and as the
Almy&yogh;ti mi&yogh;te do no thing, thei eymeden
hym,
18 whan he hadde fulfild ther housis
with goodis; whos sentence ferr be fro
me.
19 Ri&yogh;twis men shul seen, and be
glad; and the innocent shal scorne them.
20 Whether is nott hewe doun the rering vp
of hem, and fyr shall deuoure ther relikis?
21 Assente thanne to hym, and haue pes;
and bi these thingus thou shalt han best
frutis.
22 Tac of his mouth the lawe, and
put his woordis in thin herte.
23 If thou
shul be turned a&yogh;een to the Almy&yogh;ti, thou
shalt be bild vp; and aferr thou shalt make
the wickidnesse fro thi tabernacle.
24 He
shal &yogh;iue for the erthe flint, and for the
flint goldene stremes.
25 And the Almy&yogh;ti
shal ben a&yogh;en thin enemys; and seluer
shal ben hepid to thee.
26 Thanne vp on
the Almy&yogh;ti delicis thou shalt flowen;
and thou shalt reren vp to God thi face.
27 Thou shalt pre&yogh;en hym, and he shal here
thee; and thi vouwis thou shalt &yogh;elde.
28 Thou shalt beholden a thing, and it shal
come to thee; and in thi weies li&yogh;t shal
shyne.
29 He forsothe that shal be mekid,
shal ben in glorie; and he that bowith
his e&yogh;en, shal be saued.
30 The innocent
shal be saued; forsothe he shal be saued
bi the clennesse of hyse hondys.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
