Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. I.
1 Ther was a man in the lond of Hus,
Job by name; and that man was simple,
and ri&yogh;t, and dredende God, and goende
awei fro euel.
2 And ther ben born to
hym seue sones, ad thre dou&yogh;tris;
3 and
his possessioun was seuen thousend of
shep, and thre thousend of camailis, also
fiue hundrid &yogh;okis of oxen, and fiue hundryd
assis, and ful myche meyne; and
that man was gret among alle the men
of the est.
4 And his sones wenten, and
maden festis bi housis, eche in his day;
and sendende thei clepeden ther thre sistris,
that thei shulden ete, and drinke win
-- --
with hem.
5 And whan the da&yogh;es of the
feste hadden passid aboute, Job sente to
them, and haliwide them, and risende
erli, offride brent sacrifise bi alle. Forsothe
he seide, Lest perauenture my sonys
synnen, and blisse to God in ther hertis.
6 So Job dide alle da&yogh;is. On a dai forsothe,
whan the sones of God wer come, that
thei shulde stonde nee&yogh; before God, was
nee&yogh; among hem and Sathan.
7 To whom
seide the Lord, Whennus comest thou?
The whiche answerende seith, I haue
enuyround the erthe, and thur&yogh; gon it.
8 And the Lord seide to hym, Whether
hast thou not beholde my seruaunt Job,
that ther be not lic to hym in the erthe,
a man simple, and ri&yogh;t, and dredende
God, and goende awei fro euel.
9 To whom
answerde Sathan, Whether in vein Job
dredith God?
10 Whether hast thou not
strengthid hym, and his hous, and al his
substaunce bi enuyroun? To the werkis
of his hondis thou hast blissid, and his
possessioun wex in the erthe.
11 But
strecche out a litil thin hond, and touche
alle thingus that he weldeth; but in the
face he blesse to thee.
12 Thanne the Lord
seide to Sathan, Lo! alle thingus, that he
hath, in thin hond ben; onli in hym ne
strecche thou out thin hond. And Sathan
is gon out fro the face of the Lord.
13 Whan forsothe on a dai the sones and
his do&yogh;tris shulden ete, and drinke win
in the hous of ther firste gote brother,
a messager cam to Job,
14 that shulde sein,
Oxen ereden, and she assis weren fed
beside them;
15 and Sabeis feerly fellen to,
and token alle thingis, and smyte the
-- --
childer with swerd; and I alone scapide
that I shulde telle to thee.
16 And whan
&yogh;it he spac, cam an other, and seide, The
fyr of God cam doun fro heuene, and the
shep touchid, and the childer wastide;
and I alone flei&yogh; awei that I telle to thee.
17 But &yogh;it hym spekende, cam and an other,
and seide, Caldeis maden thre cumpanyes,
and asailiden the camailis, and token
hem, also and the childer thei smyten
with swerd; and I alone flei&yogh; awei that
I telle to thee.
18 And &yogh;it he spac, and lo!
an other cam inne, and seide, Thi sones
and do&yogh;tris etende, and drinkende win in
the hous of ther firste goten brother,
19 feerli an hidous wind fel in fro the regioun
of desert, and smot togidere the
foure corneres of the hous, the whiche
fallende opresside thi fre childer, and
ben deade; and I alone flei&yogh; awei that I
telle to thee.
20 Thanne Job ros, and kutte
his clothis, and his hed shauen fel in to
the erthe,
21 and honourede, and seide, Nakid
I wente out fro the wombe of my moder,
and nakid I shal gon a&yogh;een thider; the
Lord &yogh;af, the Lord toc awei; as to the
Lord pleside, so it is do; be the name
of the Lord blissid.
22 In alle thes thingus
Job synnede not with his lippis, ne any
foli thing a&yogh;en God spac.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
