Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXIII.
1 Joiada forsothe the seuenth &yogh;eer comfortide,
toke the maisters of hundrithes,
Azariam, that is, the sone of Jeroboam,
and Ismael, the sone of Johannan, also
Azariam, the sone of Obed, and Maaziam,
the sone of Adaye, and Elisaphath,
the sone of Ysecry; and he wente in with
hem counseyl and pese couenaunt.
2 The
whiche enuyrounynge Judam, gaderden
Leuytis of alle the cytees of Juda, and
the princis of the meynes of Irael, and
camen `in to Jerusalem.
3 Thanne wente
in couenaunt al the multitude in the hous
of the Lord with the kyng. And Joiada
seide to hem, Loo! the sone of the kyng
schal regnen, as the Lord spake vpon the
sonus of Dauid.
4 This is thanne the word
that &yogh;e schul done.
5 The thridde part of
&yogh;ou that ben commen to the saboth, of
prestis, and of Leuytis, and of porters,
schal ben in the &yogh;aatis; the third forsothe
part at the hous of the kyng; and
the thrid part at the &yogh;aate, that is clepid
of the foundement. Al forsothe the tother
comoun be in the porches of the hous of
the Lord;
6 ne eny other man comme in
to the hous of the Lord, bot the prestis,
and that mynystren of Leuytis; thei
aloonly commen in, that ben halowed,
and alle the tother comoun keepe wele
the wardis of the Lord.
7 The Leuytis
forsothe enuyroun thei the kyng, eche
hauynge their armes; &yogh;if eny other schal
commyn in to the temple, be he slayn;
-- --
and be thei with the kyng commynge in
and goinge out.
8 Thanne the Leuytis
diden, and al Juda, after alle thingis that
Joiada, the bischop, hadde comaundide;
and alle thei token the men, that weren
vndir hem, and thei camen by ordre of
the saboth with hem, that nowe hadden
fulfild the saboth, and weren gon out.
9 Forsothe Joiade, the bischop, hadde not
leetyn the cumpanyes to gon awey, the
whiche weren wont by sundre weekis to
comme after to hem selue. And Joiada,
the prest, &yogh;af to the leders of hundrithis
speres, and tergetis, and bokelers of kyng
Dauid, the whiche he hadde sacride in
to the hous of the Lord.
10 And he sette
al the puple, of holdyng daggers, fro the
ri&yogh;t partie of the temple vnto the left
part of the temple, before the auter and
the temple, by enuyroun of the kyng.
11 And thei ladden out the kingus sone, and
putten on to hym a dyademe; and &yogh;euen
to hym in his hond the lawe to ben
holden, and thei setten hym kyng. And
Joiada, the byschop, enoyntide hym, and
his sonus; and thei inwardly preyden,
and seyden, Lyue the kyng!
12 That
whanne Athalia hadde herde, that is, the
voice of men rennyng and preysyng the
kyng, sche wente in to the puple, into
the temple of the Lord.
13 And whanne
sche had seen the kyng stondynge upon
the gree in the entre, and princis and
companyes abouten hym, and al the puple
of the lond ioyinge, and criynge in
trumpis, and orgnys of dyuerse maner,
syngynge to gydir, and the voice of men
preysynge, sche kutte hir clothis, and
seith, Aspyes! aspyes!
14 Forsothe Joiada,
the bischop, gon out to the leeders of
-- --
hundrithes, and princis of the hoost, seide
to hem, Ledith hir out of the purseyntis
of the temple, and be sche slayn with
out forth with swerd; and the prest comaundid,
that sche shuld not be slayn in
the hous of the Lord.
15 And he putte on
hondis to the nollis of hyre; and whanne
sche had gon in the &yogh;ate of the hors, of
the hous of the king, thei slewen hir
there.
16 Forsothe Joiada couenauntide couenaunt
of pese betwene hym and al the
puple and the kyng, that ther were a
puple of the Lord.
17 And so al the puple
wente `in to the hous of Baal, and thei
distroyeden it; and auters, and mawmetis
of it thei to-breeken; Mathan also, the
preste of Baal, thei slewen before the
auters.
18 Forsothe Joiada sette prouostis
in the hous of the Lord, that vndir the
hondis of prestis, and Leuytis, the whiche
Dauid delide in the hous of the Lord,
that thei schulden offeren brent sacrifices
to the Lord, as it is writen in the boke
of Moysy, in ioye and songus, after the
disposicyoun of Dauid.
19 Also he sette
porters in the &yogh;atis of the hous of the
Lord, that ther schulde not gon in to
it vnclene in eny thing.
20 And he toke
leeders of hundrithes, and most stronge
men, and princis of the puple, and al the
comoun of the lond. And thei maden
the kyng to comme doun fro the hous
of the Lord, and gon in by the mydil of
the ouer&yogh;ate in to the hous of the kyng;
and thei setten hym in the kyngus see.
21 And al the puple of the lond gladide,
and the cytee restyde; bot Athalia is
slayn with swerde.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|