Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XVIII.
1 Done it is forsothe aftir thes thingis,
that Dauid schuld smijten Philisteis, and
meeken hem, and taken Geth and the
dou&yogh;tirs of it fro the hond of Philisteis,
and smijten Moab;
2 and Moabitis schulden
ben maad the seruauntis of Dauid, offringe
to hym &yogh;iftis.
3 That tyme also
-- --
Dauid smote Adadeser, kyng of Soba, of
the regyoun of Emath, whanne he wente
for to largen his empyre vnto the flode
of Eufraten.
4 Thanne Dauid toke a thousand
foure whelid cartis of hym, and
seuen thousand of hors men, and twenty
thousand of fote men; and he kutte the
knee senewis of alle the hors of the
chaaris, out taken an hundrith foure
whelid cartis, the whiche he reseruede to
hym silf.
5 Forsothe and Cyre Damascen
came ouer, that he &yogh;eue helpe to Adadeser,
kyng of Soba, bot and of this Dauid
smote twenty thousand of men;
6 and he
putte kny&yogh;tis in Damasc, that Cyrie also
schuld seruen to hym, and offre &yogh;iftis.
And the Lord herde hym in alle thingis
to the whiche he wente.
7 Also Dauid
toke the golden arewe cases, that the
seruauntes of Adadezer hadden, and
brou&yogh;te hem in to Jerusalem;
8 also and
fro Thebath and Cum, cytees of Adadezer,
myche of brasse, of the whiche
Salomon made the brasen se, and pylers,
and brasen vessels.
9 The whiche thing
whanne Thou, kyng of Emath, hadde
herd, that is, Dauith to han smyten al
the hoost of Adadeser,
10 kyng of Soba, he
sente Aduram, his sone, to kyng Dauid,
that he aske of hym pese, and thanckide
to hym, for thi that he hadde ouercommen
and smyten Adadezer; forsothe
kyng Adadezer was aduersarie to Thou.
11 Bot and alle the golden vesselis, and sylueren,
and brasen kyng Dauid sacride to
the Lord; and the syluer, and the gold,
that the kyng hadde taken fro alle gentiles,
as wele of Ydume and Moab, and
the sonys of Amon, as of the Philisteis
and Amalech.
12 Forsothe Abisai, the sone
of Saruye, smote Edom in the valey of
salt placis, ten and ey&yogh;t thousand.
13 And
he sett in Edom a streyngthe, that Ydume
-- --
schulde seruen to Dauid. And the
Lord sauede Dauid in alle thingis, to the
whiche he wente.
14 Thann Dauid regned
vpon al Yrael, and dide dome and ri&yogh;twisnesse
to al his puple.
15 Bot Joab, the
sone of Saruye, was vpon the hoost; and
Josephath, the sone of Ailuth, chaunceler;
Sadoch forsothe,
16 the sone of
Achitob, and Achymalech, the sone of
Abither, prestis;
17 and Susa, scribe; Bananyas
also, the sone of Joiade, vpon the
legiouns Cerethi and Pherethi; forsothe
the sonys of Dauid first at the kyngis
hond.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|