Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. III.
1 Child forsothe Samuel mynystrede to
the Lord before Hely, and the sermoun
of the Lord was precious; in tho dais
was noon opyn visioun.
2 It was maad
thann on a day, Heli leye in his place,
and his eyen daswiden, and he my&yogh;te not
see the lanterne of God, before it were
quenchid.
3 Forsoth Samuel slepte in the
temple of the Lord, where was the arke
of God.
4 And the Lord clepide Samuel;
the which answerynge seith, Loo! I.
5 And he ranne to Hely, and seide to hym,
Loo! Y; thou hast clepid forsothe me.
The which seide, I haue not clepid thee;
turn a&yogh;en and sleep. And he &yogh;ede and
slept.
6 And the Lord eft leyde to to clepe
Samuel; and Samuel rysynge &yogh;ede to
Heli, and seide, Loo! Y; for thou hast
clepid me. The which answeryde, Y
haue not clepid thee, sone myn; turn
a&yogh;en and sleep.
7 Forsothe Samuel &yogh;it not
knewe the Lord, ne the sermoun of the
Lord was openyd to hym.
8 And the
Lord leide to, and &yogh;it clepide Samuel the
thridde tyme; the which rysynge &yogh;ede
to Hely, and seith, Loo!
9 Y; for thou
hast clepid me. Thanne Hely vndurstood,
that the Lord clepide the child;
and he seith to Samuel, Go and sleep;
-- --
and if herafter he clepe thee, thou shalt
seye, Spek, Lord, for thi seruaunt herith.
Thanne Samuel wente and slept in his
place.
10 And the Lord cam, and stood,
and clepide as he clepide the secounde
tyme, Samuel, Samuel. And Samuel
seith, Spek, Lord, for thi seruaunt herith.
11 And the Lord seide to Samuel, Loo! Y
doo a word in Yrael, the which who so
euere herith, bothe his eeris shulen tynclen.
12 In that day I shal arere a&yogh;ens
Hely alle thingis, the whiche I haue
spokun vpon the hows of hym; Y shal
bigynne, and fulfille.
13 Forsothe I seide
before to hym, that I was to deme his
hows without ende for wickidnes; for thi
that he knewe his sonys vnworthili to
doon, and vndurnam hem not.
14 Therfore
Y swore to the hows of Hely, that the
wickidnes of hys hows shal not be doon
a seeth before with slayn sacrifices and
&yogh;iftis vnto with out ende.
15 Forsothe
Samuel slept vnto the morwe, and he
openyde the dorys of the hows of the
Lord; and Samuel dredde to shewe the
visyoun to Hely.
16 Thanne Hely clepide
Samuel, and seide, Samuel, my sone. The
which answerynge seith, Y am redy.
17 And
he askide hym, What is the word that
the Lord hath spoken to thee? Y preye
thee, ne hele thou fro me; thes thingis
do to thee God, and thes thingis adde, if
thou hidist fro me a word of alle the
wordis that ben seyd to thee.
18 And Samuel
shewide to hym alle the wordis,
and hidde not fro hym. And he answerde,
A Lord he is; that good is in his
eyen, do he.
19 Forsothe Samuel wexe, and
the Lord was with hym, and there felle
not into the erthe of alle the wordis of
hym.
20 And alle Yrael knew&yogh; fro Dan
vnto Bersabee, that Samuel was the feithful
-- --
prophet of the Lord.
21 And the Lord
addide that he shulde apere in Sylo, for
the Lord was shewid to Samuel in Sylo
after the word of the Lord; and the word
of Samuel felle `into al Yrael.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
