Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXIV.
1 Thanne Dauid stiede vp thens, and
dwelte in moost siker placis of Engaddi.
2 And whanne Saul was turned a&yogh;en, after
that he hadde pursued the Philisteis, thei
toolden to hym, seiynge, Loo! Dauid is
in the deseert of Engaddi.
3 Thanne Saul,
takynge to thre thousandis of chosen
men of al Yrael, wente to aserche Dauid
and his men, vpon moost hei&yogh; rochis, that
oneli to wijlde capretis ben thur&yogh; weyes.
4 And he cam to the fooldys of sheep, the
which offrede hemself to the weye goer.
And a spelunk was there, the which
Saul wente yn, that he purge the wombe;
forsothe Dauid and his men lurkeden in
the innere parti of the denne.
5 And the
seruauntis of Dauyd seiden to hym, Loo!
-- --
the day of which the Lord spak to thee,
I shal take to thee thin enemy, that
thou doo to hym as it plesith in thin
eyen. Thanne Dauid roos, and kyttide
of the hemme of the mantil of Saul
stilly.
6 After thes thingis the herte of
Dauid smoot hym, forthi that he hadde
kut a wey the hemme of the mantil of
Saul.
7 And he seide to his men, Merciful
be to me the Lord, that I doo not this
thing to my lord, the crist of the Lord,
that I putte myn hoond into hym, for
the crist of the Lord he is. The Lord
lyueth, for but the Lord smyte hym,
other the day of hym come, that he dye,
other comynge doun into batayl perish,
merciful be to me the Lord, that I putte
not myn hoond into the crist of the
Lord.
8 And Dauid brak togidre his men
with thes wordis, and suffrede hem not,
that thei rysen into Saul; forsothe Saul
rysynge fro the denne, wente in the weye
begun.
9 Forsothe Dauid roos after hym,
and wente out of the denne, and criede
after the bak of Saul, seiynge, My lord
kyng! And Saul beheelde bihynde hym;
and Dauyd bowynge hym self redi into
the erthe honourede.
10 And he seide to
Saul, Whi herist thou wordis of men
spekynge, Dauid sechith yuel a&yogh;ens thee?
11 Loo! to dai thin eyen seen, that the
Lord took thee in myn hoond in the
denne, and I thou&yogh;t for to slee thee, but
myn eye sparide to thee; forsothe I seide,
I shal not stretche out myn hoond in my
lord, `for the crist of the Lord he is.
12 But more ouere, fader myn, se, and know
the hemme of thi mantil in myn hoond,
for whanne I kut the coope of thi mantil,
I wold not stretch out myn hoond
into thee; inwardly tak hede, and se, for
there is not in myn hoond euel ne wickidnes,
ne I haue synned in thee; forsothe
-- --
thou aspyist my lijf, that thou doo it
awey.
13 The Lord deme bitwix me and
thee, and the Lord wreke me on thee;
forsothe myn hoond be not in thee,
14 as
in the oold prouerbe it is seid, Fro vnpiteuous
men goth out vnpiteuousnesse;
myn hoond forsothe be not in thee.
15 Whom pursuyst thou, kyng of Yrael?
whom pursuist thou? A deed dog thou
pursuist, and a quyk fly&yogh;e.
16 The Lord
be domesman, and the Lord deme bitwix
me and thee, and see, and deme my
cause, and delyuere me fro thin hoond.
17 Forsothe whanne Dauid hadde ful eendid
spekynge siche maner wordis to Saul,
Saul seide, Whether this is thi voys, sone
myn Dauyd? And Saul reryde vp a voys,
and wepte.
18 And to Dauid he seide, More
ri&yogh;twise thou art than Y; forsothe thou
hast &yogh;oldun to me gode thingis; forsothe
I haue &yogh;oldun a&yogh;en to thee yuel thingis.
19 And thow hast shewid to me to day,
what goode thingis thou hast doo to me,
what maner wise the Lord took me in
thin hoond, and thou slew&yogh; not me.
20 Forsothe
who, whanne he fyndith his enemy,
leeueth hym in a good weie? But the
Lord &yogh;eelde to thee this while, for that,
that to day thou hast wrou&yogh;t in me.
21 And
`now, for I knowe, that moost certeynli
thou art to regne, and to haue in thin
hoond the kyngdom of Yrael,
22 swere to
me in the Lord, that thou do not a wey
my seed after me, ne doo a wey my name
fro the hows of my fader.
23 And Dauid
swore to Saul. Thanne Saul wente into
his hows, and Dauid and his men stieden
vp to more sykyr placis.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|